Pu Dr. Za Hlei Thang Thuanthutawi

Honoring his life

Celebrating His Patriotism

Chin Miphun Duhdawttu
Pu Dr. Za Hlei Thang
(1943 – 2018)

By – Salai Van Cung Lian (UK)

Ramkhel lamih kanpabik pakhat a si mi, Pu Dr. Za Hlei Thang ih in tansan thu ka rak thei tikah, ka thin a nuam lo zet. Dr. Za Hlei Thang ih in tansan cu, Chin mipi in kan ui cio, kan pamhmai cio timi a lang. Pumpak in ka rehsia ih tlun ah, 1960s, 1970s, 1980s, 1990s lai pawl ih Chin ram le Chin miphun hrang ih a rak cangvainak le a rak zuamnak thuanthu pawl, keimah rori in tuanten ka rak sut lo mi pawl hi, ka sir aw zet sal. Pu Major William Sa Lian Zam thu ih ka thei duh zetmi a siih, Dr. Za Hlei Thang ih fale hnen ah “na pa ka biak duh nan” tiah a damlo le a besia thu thei lo in, ka rak sut rero. UK ram ah tlawng ka kai hnu ihsin, Dr. Za Hlei Thang hi a hmin cu ka rak thei ṭheu nan, a thu hla ngaingai cu Salai BA Thang ih tawlrelmi hrekkhat Chin World Media ihsin ka rak thei ngah. Chin Community of USA ih 2005 kumah Person of the Year an pek thu, 1990 kum Election ah Falam peng ih sin MP (Hlutdaw-Amat) a rak tlingthu, Chin paralṭha Salai Tin Maung Oo thawn rualpi ṭha an rak sithu le a rak bawm daan thu, Tahan khua ah kan ṭong le calai karhzai theinak ding ih a rak zuam daan thuhla le Chin National Front (CNF) Chairman a si thu pawl ka rak thei ngah ih ka upat le ka ṭihzah zetmi a si.

Dr. Za Hlei Thang hi 2013/14 ih kan rak tuah mi Falam Youth Conference (FYC) lawngah ka voikhat tonnak a si. FYC conference laiih “lungrualnak” a thupit zia a sim ih kan uar zet. Conference ih thu a sim mi ah “ṭhansonak (development) timi cu a thupi zet .. asinan .. cuhnakih thupi sawn cu” tiah a cawl ih .. ka kiang ih ding Salai LaL Ram Hngak in a ṭong ding mi a rak thei cia ih Dr. Za Hlei Thang thawn “Unity (Lungrualnak) timi hi a si” tiah an pa hnih in an ṭong tlang. Dr. Za Hlei Thang hi USA a um lai ih thu a sim mi pawl khal ah, Chinmi pawl kan lungrual ding thu hi, a sim ringring mi a si ih, a nun ih a feh pi mi khal a si tiah ka hmu vivo.

Falam Youth Conference lai ah Sayamah Chin Chin in rawl ei in sawm ih, cumi ah Dr. Za Hlei Thang khal a rak um ve ih, kapa Pu Thawng Bil Lian thu, Tlauhmun an um lai ih, Pu Mang Lian Ham (kapa ih u) te thawn caw an rak khal thu pawl kaa thaw zetin a rel. Thuanthu lam ka theinak a mal tuk lai ruang ah, ziang thu ngaingai sut ding ka rak thei lo. Thuanthu ka zingzoi vivo ih, a thu hla ka thei sinsin tikah ka upat nak a sang sinsin. Thuanthu zingzoinak ka nei tik ahhin, Chinmi pawl lak ih larsang pawl thuanthu khal zingzoi nak ka nei ṭheu. Dr. Za Hlei Thang tla hi Chin mi pawl lak ih larsang pakhat a si ruang ah, a thu hla ngan ka duh nak a si. A thuhla hi, kei mah pumpak in zingzoi mi ka nei lo, hmansehla, BA Thang, Chin World Media, Chin TV pawl ih interview an tuah mi tete le Chinland Today le Surbung Tlang Thuthang Editor Pu Khuang Lian Sum ih interview an tuah mi pawl par ihsin, Pu Dr. Za Hlei Thang upat le sunloih ka pek duh ruang ah, a thuanthu hi, ka ti theitawk in ka rak ngan.

Pu Za Hlei Thang ih Zahau ram, Tlauhmun khua suak a si. April 6, 1943 ah a suak ih, a nu le pa tla cu Pu Hrang Sin le Pi Khaw Lian Cuai tla an si. Fapa neih sun a si ih, Tlauhmun khua ah phun thum tiang a kai hnu ah, Falam tlawng ihsin phun li a ong. Apa Pu Hrang Sin hi Tlauhmun ah tlawng sayagyi a rak si ih, Con le Laam hnakin a fapa ih fimthiamnak hrang ah a neih siah a rak hmang sawn. Pu Za Hlei Thang cu cathiam a rak si ruang ah, scholarship a ngah ih 1960 ihsin Yangon khawlipi ah tlawng kai ding in a rak feh. Yangon ah tlawng a rak kai ih, phun 10 hi Myoma National High School (Atuih No.2 Dagon) in a rak ong. Phun 10 phitu tlawng ta 400 lenglo lak ah, a mah lawng hi Medical kai thei a rak si. Kawlram phunhra ong zaten sung ah 136 nak a rak si. Cutin, 1965 ih sin, Medical College (MC-1) phunsang tlawng ah, Medical lam zirnak a rak nei thok.

Phunsang Tlawng Kailai ih Chin Miphun Hrang Cangvainak

Pu Za Hlei Thang hi 1965 in, phunsang tlawng (University) ah Medical lam zirthoknak a rak nei. Kan theih cia zo vek in, Gen. Ne Win in March 2, 1962 ah rampi thuneihank (coup d’etat) a laak ih, Burma Socialist Programme Party (BSPP) cu July 4, 1962 ah a rak din. 1964 ah Gen. Ne Win in mipi ih neih mi private company le dawr pawl hmuahhmuah Acozah hmin in (Nationalized) a rak ting thluh. Education system khal a rak thleng thluh ih, mipi ih neih mi private company/ dawr pawl a ting thluh mi, phunsang tlawngta pawl cazin a rak tuah ter. Cumi cazin pawl check ding ah phunsang tlawngta Za Hlei Thang cu, tlawng a pit caan ah tlanghna (lokeaape) in 1965 kum ah Tongzang, 1966 kum ah Hakha ah a rak feh. 1964 kum ih rak din mi Chin Literature and Culture Committee (CLCC) ah si seh, phunsang tlawng ih cangvaihnak pawl khal ah a rak tel vivo. Pu Za Hlei Thang hi phunsang tlawng a kai lai ih sin ramkhel lam paih zet mi a si ih thuthangca, megazine, times megazine, reader digest tivek a rak siar ringring nak ih sin, ramkhel lam ah theihkaunak a rak nei sinsin.

Cutawklai, Yangon ih phunsang tlawng rak kai tu Chin tlawngta pawl hi, mi harsa tete hlir an rak si. Mi hrekkhat tla cu, an umnak inn san man hman an rak pek thei lo. Cumi tlawngta pawl bawmnak ding ah, Yangon le Mandalay ih Falam phunsang tlawngta pawl ko khawm in, 1968 ṭhal tlawng pit ah, lei cek in fund an rak hawl. Cumi fund hawlnak ah paisa 3,200 Kyats an rak ngah ih, tlawngta harsa pawl bawmnak ah an rak hmang.

Gen. Ne Win homi Revolution Council cun December 2, 1968 ah Interim Unity Advisory Board (IUAB) (ျပည္္တြင္းညီညြတ္ေရး အၾကံေပးအဖြဲ႕) timi a rak din. Himi IUAB ah 1962 hlan ih mipi ih rakhrilmi MP palai 33 an rak tel ih himi board cu “Thuron Palai 33” (သံုးဆယ့္သံုးဦးအၾကံေပးအဖြဲ႔) tin khal an rak ko. Himi IUAB ih an ṭuan ding cu, Revolution Council hnen ah daanhrampi (Constitution) thawn pehpar in, ruahnak (advice) pek ding an si. Cun, Revolution Council khal in daanhrampi a thar ngan ding a si ih, daanhrampi thar hrang ah pumpak in siseh, pawlkom in seh, Acozah ih palai (Liaison Officer) hnen ihsin, zalenzet in ruahnak nan pek thei tiah 1968 kumcem ah thusuahnak an rak nei. Cutin, thusuahnak an rak nei tik ah, Daan (Law) lam a rak zir tu Pu Lian Uk ih ho in, “Chin Mino Pawl Ih Ruahnak Peknak” ခ်င္းလူငယ္မ်ားအၾကံေပးတင္ျပခ်က္ timi Democracy uknak daan sungah Federal System in um kan duh timi cabu an rak suah. Cumi cabu cu, phunsang tlawng ta le Chin mino pawl hnen ah an rak zem darh thluh. Cabu sung ih a tel mi, Revolution Council hnen ih kuat ding mi thuhla pawl an lung kim a si ah cun, hmin ngan ding a rak si. Himi ah cun Dr. Za Hlei Thang, Salai Kipp Kho Lian te pawl tel in, Chin tlawng ta tamzet hmin in an rak lung kim pi hi, an hmin an rak ngan cio. Cu hlei ah, Pu Lian Uk, Pu Ngin Thawng pawl ho-in Chin ram khua tin kim ah an va feh ih, thusimnak (campaign) an va tuah. Nehhnuah, hmin ngan tu pawl thawng thlak thluh ding timi thu hla a rak suak tikah, tlawngta hrekkhat tla cu, an hmin ngan mi an va phyat sal.

1969 kumthok lam ah, himi ခ်င္းလူငယ္မ်ားအၾကံေပးတင္ျပခ်က္ hi IUAB ihsin, Gen. Ne Win hnen ih a thleng tikah a rak thinheng zet. Ziangah tile, a rak tuah tum mi hi Socialist Party pakhat lawng um ding, cumi party ah amah Chairman tuan ih kumkhua a mah lal ringring ding kha a rak tumtah mi a si. Chin mino pawl ih, ca kuatnak ah cu Democracy uknak daan sungah Federal system thawn fehpi ding timi thu a rak si. Cule, himi kan dil vek in in pek lo a si len, sandah piahnak kan nei ding, a tul ah cun hriamhrei kai tiang in ramhnuai kan lut ding tiah hotu lam pawl karlak ah thurelnak an rak nei. Cutikah, Gen. Ne Win a thinheng tuk ih, himi ခ်င္းလူငယ္မ်ားအၾကံေပးတင္ျပခ်က္ cabu ngan tu, cabu parih dilmi par ah lungkim in hmin ngan tu pawl, cabu a zemdarh tu pawl le Chin ram khaw tinkim ah feh in Chin mipi a va sim tu pawl zaten 1972 October thla lam ih sin an rak kai vivo. Gen. Ne Win cu “Sin-Phyu-Daw Operation – ဆင္ျဖဴေတာ္စစ္ဆင္ေရး” timi in an rak kai thluh mi a si. Dr. Za Hlei Thang hi Yangon ah phungsang tlawng a kai lai fang a si thawn, Chin ram ih hotu pawl meeting ah a tel lo ruang ah himi ṭum ah cun kaih a rak tuar lo.

Major William Sa Lian Zam teih Chin Democracy Party A Bawmnak, A Thawng Tlak Nak le Salai Tin Maung Oo

1970 a rak thleng tikah U Nu te pawl cu Gen. Ne Win ih ho mi Revolution Council do ding in Thailand ah an rak tlan ih Thaliand ah Ramtlan Acozah (Government in Exile) an rak din. Pu Mang Tling (Cinzah) khal Thailand ah a rak tlan ve ih, U Nu te hnen ah a va kom. Asinan, Thailand ah cun Chin mi pawl an mah ten an ding ih, Chin Democracy Party (CDP) timi cu February 1971, ah an rak din. Pu Mang Kham le Pu William Sa Lian Zam (Khaute) khal, Gen. Ne Win do ding in Thailand ah an va tlan ih, Chin Democracy Party ah an va pehzom. CDP ih Chairman hi Pu Mang Tling a si ih, Vice Chairman hi Major William Sa Lian Zam a rak si.

Pu Mang Kham hi Bualzawl khua mi a si ih, Dr. Za Hlei Thang thawn sungkhat unau an si. Falam boarding school ih an um lai ah, hmunkhat ih rawl suang tlaang le ei tlaang in kum hnih sung (1954-55) an rak um tlang. Pu Mang Kham hi Gen. Ne Win Acozah do ding ah, Falam ih sin Yangon ah Pu No Zam in a rak hruai mi a si. William Sa Lian Zam hi Zahau ram, Khaute khua suak a si ih, a nih khal Dr. Za Hlei Thang thawn Falam high school tlawng kai pi rualpi ṭha zet an rak si. William Sa Lian Zam cu high school a ṭheh hnu ihsin, Ralkap (Navy) ah a lut ih, Dr. Za Hlei Thang cu Medical lam a rak zir. Yangon ah khal hmunkhat ah an rak um tlang. Pu Mang Kham le William Sa Lian Zam hi an mah ten, Thailand lam ih feh ding in Kawhtaung khua tiang an va feh nan, a feh daan an thei lo tikah, Yangon ah an va kir sal ih Dr. Za Hlei Thang le Salai Kipp Kho Lian te pawl thawn, Thailand ram feh daan ding an rak tawlrel. Salai Kipp Kho Lian te pawl cu ramhnuai tlan zo pawl thawn pehtlaih awknak an rak nei cia zo tik ah a feh dan ding lamzin an rak thei. Cutin, ni khat cu Dr. Za Hlei Thang, Pu No Zam, Pu Mang Kham, William Sa Lian Zam, Pu Khai Za Nang, Pu Hau Za Cin le Lt.Col. Thian Kho Khai ih fapa Pu Thang Za Pau pawl thawn lakphak dawr ah tonkhawmnak an rak nei. Cutin, Pu Thang Za Pau in Thailand ram ah hruai hai ding in an rak rel. William Sa Lian Zam cu ralkap hotu ding le training pektu ding a rak si. Anih tla cu, a sung pawl a sim ngam lo ruang ah Dr. Za Hlei Thang hnen lawng ah a rak sim. An tlan ding zaan netabik cu Lanmadaw Medical Hostel an riak ih, zinglam ah Pu Thang Za Pau in a rak hruai hai ih, Taungo khua ihsin KNU ramah, cutawk ihsin Thailand ram ah an rak feh suak.

Thailand an thlen hnuah Pu Mang Tling ho in an rak um ih William Sa Lian Zam cu Major rank in ralkap pawl training a rak pek. Thailand ih Chin Democracy Party le Dr. Za Hlei Thang cu a thupten pehtlaihnak an rak nei ih, ramsung ramleng thuhla an rak sim aw ringring. Ramsung lam ih, an ṭul mi hmuah hmuah Dr. Za Hlei Thang ih a rak tawlrel sak. Culai ah, U Nu in Thailand ramri Mesariang khua ah Radio station cakzet a rak tuah ih Kawl ṭong le Lai ṭong in thu an rak than ṭheu. Lai ṭong thu than hi an mahte than asi ih an thiam tuklo ruangah Lai ṭong ih thuthan tu ding an rak ṭul zet ih, ramsung lam ih um Dr. Za Hlei Thang hnen ah an rak cah. Anmah khalin lamzin dangdang in milai an hawl ve. Netabik ah an sawmtummi kha ralkap Military Intelligence (MI) pawl in an rak kai ngah. Thu an sut tikah, Dr. Za Hlei Thang khal a rak phuang ruangah a nih khal, luat thei nawn loin 1972 December ah an rak kai. Dr. Za Hlei Thang khal hi “Sin-Phyu-Daw Operation” tang ah kaih mi a rak si thotho.

Gen. Ne Win do ding ah Thailand ram ih a tlan mi Chin mi pawl cu August 24, 1972 ah tonkhawmnak an rak nei ih Chin Liberation Army (CLA) timi an rak din. Army Chief of Staff ah Pu Mang Tling a rak si nan, thlakhat a rei hnu ah, Major William Sa Lian Zam hnen ah Army Chief of Staff ṭuanvo a rak pek. Cutin, Major William Sa Lian Zam cu CLA ih Chief of Staff a rak cang. CLA ih Chin ralkap pawl cu training an tuah hnu ah, Chin ram ah cangvaih ding in Thailand ram ih sin an rak pok. Khaing Moe Lin ih homi Arakan Liberation Army (ALA) ih ralkap pawl khal Yakhine ram lam an rak pan ih CLA thawn an rak pok tlang. Major William Sa Lian Zam te cu 1976 December thla ih sin KNU headkuater, Maneepawlaw ih sin Shan ram – Kachin ram – Naga ram ihsin Chin ram (Tedim peng) ah an hung thleng. Chin ram an rak thleng tikah cun, furpi a si thlang tikah harsatnak phunkim an rak tong. A dang unit pawl thawn an biakawknak radio le a siat tikah van sang an rak lam. Rawl ei ding an nei nawn lo tikah, Thuklai khua ah rawl an va lak mi cu BSPP ralkap pawl in an rak thei ih an rak dawi. Phunnuam khua le Saizam khua ah an rak kap awk ih, Chin ralkap pa thum hma an rak pu. Rawl ei ding le an nei nawn lo, hnipuan thleng ding khal an rak nei lo, thli le ruah lakah vansanglam in an rak um tikah, Major William Sa Lian Zam homi Chin ralkap pawl cu Vangte khua ah BSPP ralkap pawl in an rak kai. ALA ih ralkap pawl khal an rak kai thluh. Cutin an kai ngah hnu ah, Major William Sa Lian Zam le a homi Chin ralkap pawl cu lamzin kapah a tlar in an ding ter ih, an rak kap that thluh. ALA hotu pawl a si mi, Khaing Moe Lin, Khaing Ba Kyaw le Arakan ralkap (revolutionaries) pawl khal thah an rak tuar ve.

“Sin-Phyu-Daw Operation” lai December 11, 1972 ah Dr. Za Hlei Thang le Salai Kipp Kho Lian pawl cu ralkap MI pawl in an rak kai. Gen. Ne Win ho ih tuah mi, 1974 Daanhram pi cu 1973 sungah, mipi hnen ah thusuhnak (referendum) nei thlang ding an si ruang ah, cumi sung ah buainak um lo ding in, Daanhrampi thawn pehpar mi milai hmuahhmuah “Sin-Phyu-Daw Operation” tang ah kai thluh an rak si. Bahan MI 6 ah cun Dr. Za Hlei Thang le Salai Kipp Kho Lian cu an rak hruai. Zing an tho ih, hmai phiahnak lam an pan ah, an pa hnih ten an tong awk. MI pawl cun, an pa hnih an thei aw mi an hmu tikah, thu an sut bet ciam co. Dr. Za Hlei Thang cu Bahan MI 6 ah, it lo sing loin ni nga sung an duh tawkin an hremih thu an rak sut. An thu sut mi pawl tla cu, Pu Lian Uk ho in Chin mino pawl ih cakuat thu ah an tel daan le Gen. Ne Win do ding in Thailand ah mi lai an kuat thu pawl a si. Revolution Council in bulpak in siseh, pawlkom in siseh ruahnak in pek thei tin thu an suah ruang ah, kan pek mi a si, daan pahbal mi kan nei lo tiah a sawn sal. Cun, Thailand lam ih Pu Mang Kham le William Sa Lian Zam te thu pawl ka thei lo a si tiah a sim hai. Tu le cu cumi thu cu an sut rero nan, a nih khal in ka thei lo tiah a el hai. Chin mi phunsang tlawngta an kaih mi cu Dr. Za Hlei Thang le Salai Kipp Kho Lian lawng an rak si. Cutin, Bahan MI 6 ah thusutnak an nei hnu ah cun, an mit an hup ih Insein thawng inn ah an hruai. Dr. Za Hlei Thang cu Insein thawnginn sung ih, sung sin khan (taikpeik-တိုက္ပိတ္) sung ah thla kua sung an kharh khum. Cumi hnu ah, thawngtlak tampi um khawmnak hall sung ah an rak thawn sal.

Insein thawng inn sung ih Asaung 4 ah a rak thleng. Dr. Za Hlei Thang hi Asaung 4, Room No.6 ah a um ih, Salai Kipp Kho Lian hi Room No.12 ah a um. Salai Kipp Kho Lian cun: “thawng inn sung ah, ka hmel theih mi thawn kan tong awk cu a sunglawi tuk” tiah a sim sal. Cumi, a saung 4 sung thotho ah Kawlram phunsang tlawngta cangvaihnak in, thawng a rak tlak vetu Asho Chin paralṭha Salai Tin Maung Oo thawn khal an rak tong aw. Dr. Za Hlei Thang kheng a kholh lai ah, Salai Tin Maung Oo cun: “Ka u … kei khal Chin miphun ka si tiah” tiah hmel theihnak a rak tuah. Salai Tin Maung Oo hi Dr. Za Hlei Thang thawn an tonawk hlan ah cun, Salai ti khal a hmang lo ih Chin mi ka si ti khal zohnen hmanah a rak sim dah lo. Dr. Za Hlei Thang le tlawng ta thawng tlak pawl cu, 1974 Daanhrampi nemhnget ni ah an suah thluh sal. Salai Tin Maung Oo thawn Insein thawng inn ih sin nikhat ni-ah an suak tlang.

Thawng inn sung ah Dr. Za Hlei Thang le Salai Tin Maung Oo cu u nau vek in an rak um tlang ih, Dr. Za Hlei Thang cun, Chin thinlung nei ding in a rak sim hnuah a hmin khal ah Salai Tin Maung Oo tiah a ti aw sal. Thawng inn ih sin an suak hnu lawng ih sin, phunsang tlawng ih a rualpi le midang pawl khal in Chin mi a si ti an thei. Amah ten Chin mi a ti awk lawng si lo in, 1974-1975 hi Chin Literature and Cultural Committee ah General Secretary tiang a rak cang. Asinan rei a ṭuan man hlanah U Thant ruak phumnak thu ruangah a buai ciamco ih tlawngta hotu a sivekin Salai Tin Maung Oo cu thawng a tlak sal lala. Hi ṭumah mitampi thawng an tlak ih Salai Kipp Kho Lian khal a tlak sal ve. Salai Tin Maung Oo cu thawng a suak hnu ih sin, Thailand ah a tlan in Ralkap Acozah a do cih ta. Thailand le Kawlram a hlehka ih Yangon a feh caan ah Dr. Za Hlei Thang in, a rak thup ṭheu. A caan caan le zarhkhat, thlakhat tivek in a in ah a um. Cun, MI pawl in kai lo ding in a rak thup ṭheu. Dr. Za Hlei Thang ih nupi Pi Ni Dong in Salai Tin Maung Oo thawn an komh awkdan hitin a sim: “Hi te pahnih hi midang lam zet an si. Hnihsuahsai in an hni lai ka theih dah lo. Chin mi lungrualnak thu le lungrual dan ding thu lawnglawng an rel. Tlang le phairawn Chin mino pawl kutkai aw ih pumkhat si thei dan ding thu a sun a zan in an rel. Rawl ei a cu ka ti khal le a cu rel phah in rawl an ei” ti’n a sim. A netnakah ralkap MI in an kai ngah ih a voi thumnak Insein thawnginn a thleng sal lala. Salai Tin Maung Oo hi University tlawngta hotu a si lawng siloin Chin mi a sinak le mi ralṭha thil ti thei a si ruangah Gen. Ne Win Acozah in a tih ih a hua fawn. Cu ruangah reilote sung lawng thawng an thlak ih June 26, 1976 ah hri thawn a hngawng in, thlai that a rak tuar a si.

Dr. Za Hlei Thang cu Medical degree MBBS hi kum 7 sung zirding a si ih, 1972 ah MBBS ngah ding a rak si nan, thawng a rak tlak ruang ah MBBS Degree hi 1977 lawngah a lak suak thei. MBBS a ngah hnu, 1977-78 kum ah Mawlemyaing Sizungpi ah House Surgeon a tuan ih, 1979 ihsin Tahan ah a thawn.

Dr. Za Hlei Thang hi Moulemyaing ah House Surgeon a tuan hnu, 1979 January thla ah Highlander Si-khan timi cu Tahan ah a rak ong thok. Tahan cu Lai mi pawl hi khawpi bik a rak si ih Lusei ṭong an rak hmang. Tahan a thleng ih sin, mina damlo pawl thu sut thei ding le sim thei ding in Lusei ṭong le Tedim ṭong a rak zir. Tahan a thleng hnu ih sin, Lai ṭong karhzai theinak ding, Lai ṭong hi lai mi pawl in ningzak lo le thla phang loih an hmang ngam theinak ding hrang ah nasatak in hmai a rak nor. Midang pawl siatsuah le hnaihnok loin, kan miphun le kan ṭong kan khaisan theinak ding ah le mino pawl ṭhangphawk theinak dingah cun Music Group tuah a ṭhabik ding tiah ruahnak a rak nei. Cui thuruahnak cu, a inn hnen pa Pu Thang Thuan hnen ah a rak sim ih tha tho hlawp tlo zet in a rak lungkim pi hnuah Dr. Than Bil Luai le a dang upa neinung deuh mi 30 lenglo an sawm khawm aw in Cekan khawlu ih um Tihaang tiva ah, picnic tuah phah in thoron khawmnak an rak tuah. Thurelnak an neih mi cu an lungkim hnuah, paisa an khongaw ih Ks.3000 lenglo an rak ngah thei. A sinan Music Group hrang thlungdar (Music Instruments) kim teih lei ding cun Ks.5000 tlun a ṭul ruangah cui thu rel dingin a hmaisabik committee meeting Dr. Than Bil Luai inn ah an rak tuah ih Drum Set an lei. Cutin, Music Group hmin ah Salai-M tiah Dr. Za Hlei Thang in a rak pek. Hi tin a rak phuah san nak cu Pu Dr. Za Hlei Thang in hi tin a rak sim sal. “Salai-Mai timi hi, hmunrawn Laimi (Asho-Chin) Unau pawl tong a si ih a tican cu Tlangval Fala, Nunau Mipa ti nak asi. Ka phuah san cu Hmin hmai ih Salai le Mai a um veten Kawl pawl in Chin mi ti in thei mai, Tlangpar ummi le hmun rawn ummi Lai mi kanzaten unau kan si, bangrep kan si ti lang ternak le, thawnginn sungih ka sar mi hmunrawn lai mipa Salai Tin Maung Oo hngilh lonakih ka phuahmi a si” tiah a rak sim.

Salai-M Music Group

Cutin, Salai-M music group cu harsatnak phunkim pahtlang in an rak dinsuak. Thuhla ziang kim a tawlrel tu bik hi, Dr. Za Hlei Thang le Pu Thang Thuan an rak si. Sumpai lam a ṭul sam mi pawl khal Dr. Za Hlei Thang in a rak suah. Salai-M music group cu ṭong phunkhat tengteng timi policy nei lo in, mipi duh mi hla Lai hla, Kawl hla, Mirang hla, Lusei hla tin a za ten an rak sak. Stage show khal an rak tuah ih an rak larsang vivo ih cutin, Kawl rawn ih music group hmin thang bikah an rak cang. Cui tlunah Salai-M hmin in Rangoon ih May Studio ah hla khui 3 (series 3) Kawl hla, Lai hla le Lusei hla an rak thun suak. A zaten paisa Ks.30000 lenglo an rak cem.

Harsatnak phun kim pah tlang ih hmai a nor nak ruang ah, mino pawl khal, mi lak ah hmai hngal zet in mai hnam ṭong, Lai ṭong an hmang ngam vivo theinak a si. Salai-M an din hnu kum ruk sung tiang a cem mi hmuahhmuah cu Dr. Za Hlei Thang ih liam thluh a rak si. Dr. Za Hlei Thang hi, hi tivek miphun duhdawt in ke a rak kar tikah, do dal tu khal tamzet a rak nei. Asinan, a hmuitin mi cu a hlawh tling leh ding tiah zumnak a rak nei ih, dung a rak sip duh lo. “Kan miphun pawl, Lai ram ih sin kan ra thawn tikah, hnam dang lak ah hnam dang vek in kan um lai hi kan thei kaunak a mal lai ruang ah a si, ni khat khat kan mit a van ni ahcun ziang kim kanmah a neitu dik kan si leh ding” tiah thazang a rak lak. Cutin, dungsip loin thazang a laknak, sum pai a cemnak pawl zar ah, mino pawl khal, mi lak ah hmai hngal zet in mai hnam ṭong le hla pawl an rak sak vivo. Tu ni ih kan dinhmun vun zoh ah, Dr. Za Hlei Thang hohanak in an rak zuamnak, an tuarnak le an taimaknak pawl hi a rak thupi zet ih, a mah rori khal a tuh ta mi thlaci a rah a hmu ngah ta ih, a di riam zet. Lai mi pawl khal in, a rak zuamnak hi kan theih pi ih, kan u pat zet timi kan hmu thei.

El-Bethel, Bethel Theological Seminary le Lairawn Baptist Association hrang cangvainak

Dr. Za Hlei Thang hi Tahan a rak thleng pek ah Baptist kawhhran a rak um lo. Curuangah, Baptist kawhhran din ding in a rak tum. Dr. Za Hlei Thang cun Tahan ihsin Satawm Baptist biakinn ih a va khawm ṭheutu Hakha unau pawl thawn Baptist kawhhran an rak din suak. Baptist biak inn an rak din in, Falam le Hakha pawl khal mai ṭong hmannak tiah an rak pan vivo. Hakha lam inn sang an tam vivo tik ah, an mah ten khawhran dang ah an rak ding. Cutin, Hakha lam pawl an mahten an ding tik ah Falam cu inn nga lawng an rak tang. Dr. Za Hlei Thang, Rev. Dr. B. Saw Ling, Pu Tawk Kam, Pu Hrin Ceu le Pu Sui Ling te inn sang nga pawl tla cu, a tu Tahan ih El-Bethel Baptist Church a rak din tu pawl (El-Bethel Church Founding Members) ah an rak cang. Hi inn sang nga in El-Bethel hi 1983 ah rak din a si zo nan, official in cu El-Bethel Baptist Church cu May 20, 1984 niah nemhnget a rak si.

Dr. Za Hlei Thang te ih rak din mi El-Bethel Baptist Chruch khal cu an rak din pek te ah cun Kalay Valley Baptist Association (KVBA) tang ah an rak um. Asinan, mai phun hnam ṭong ten Pathian biak le Pathian thuzirhawk an rak duh ve tik ah, KVBA ihsin suak in Lairawn Baptist Association (LBA) din ding in timtuah nak an rak nei. Cutin, Falam lam khawtin kawhhran upa pawl, thu an rel khawm ih, LBA din ding in lungkimnak an rak nei. LBA hrang hmun le ram a ṭul tik ah Dr. Za Hlei Thang cun Kalemyo ih a inn hmun cu, a lei nak vek in man ol ten a rak pek, a hlu tluk khi a si. Asinan, harsatnak tete a rak um ruang ah LBA cu ol sam ten an rak dinsuak loh li thei lo. Cuhnu April 5, 1989 ah Falam Chin Christian Literature Society (FCCLS) annual meeting cu Pinkhung Baptist Church ah tuah a si ih, cutawk ah Association Committee cu an rak din. LBA din ding in, Committee cun mipi tonkhawmnak cu December 22, 1989 ah Haikhawl Baptist Church ah an rak tuah. Baptist pastors hmuahhmuah le Baptist church pakhat ih sin palai pa hnih ciar sawm an rak si. Cutawk ah Lairawn Baptist Association din ding in nemhngetnak an rak nei a si. Tuniah, LBA cu Area 12 in ṭhen a si ih, Churches 65 le member thawngkul hluanli lenglo an nei.

Dr. Za Hlei Thang cu LBA a cangsuak theinak ding khal ah a rak zuambik tu pakhat a si. Cun, Bethel Theological Seminary (BTS) timi Bible tlawng dinsuak tu pakhat khal a si. LBA thuanthu kan sim tik ah, Bethel Bible tlawng thuanthu khal sim cih a ṭul. Hite pa hnih hi ṭhen thei mi an si lo. Dr. Za Hlei Thang cu, Rev. Dr. B. Saw Ling thawn Bible tlawng neih a ṭul tiah khua an rak ruat. Cutin, Bible tlawng din ding thu cu 1989 April thla ih tuah mi, FCCLS ih annual meeting ah rel khawm a rak si. Bible tlawng din ding in an lung kim cio ih a hmin ah Bethel Theological Seminary (BTS) tiah an rak pek. Principle ding ah Rev. Dr. Bernard Luai Hre an rak sawm suak. Bible tlawng hrang hmunram a rak um lo tikah, Dr. Za Hlei Thang ih inn ah rak ong. Cutin, June 13, 1989 ah BTS Bible tlawng cu tlawng ta 26 le Bible tlawng saya pa 5 thawn an rak thok. BTS tlawng cu kum thum sung Dr. Za Hlei Thang ih inn ah an um hnu in, Taungphila tui hmunah ṭhawn a rak si leh.

Dr. Za Hlei Thang cu hitivek harsatnak narak tong mi pawl an sirawk nak na nei maw tiah Pu Khuang Lian Sum in a rak sut tikah, hitin a rak let. “Ka sir awk lo tlunah ka lung a kim sinsin. Ziangah ti le, tuini tiang ka tuahmi a sual lo ti ka theih fiang ruangah a si. Mai ṭong thiam ding, mai ṭong duh ding le ṭong ngam dingih ka zuam pinak le tha ka peknak hi Pathian duh zawng a si tin ka zum. Kan phunhnam hi kanmah te tuahmi a si lo ih kan ṭong khal kan mahte phuah mi a si lo, in sersiamtu cung Pathian ih tuah mi le pekmi a si. Cui ruangah zozo khal mah le hnam kan sunlawih ih mah le ṭong kan fahsak thiam a si le in sersiamtu le tong in petu kan Pathian a thu kan ngai ih a duh zawng kan tuah thawn a bang aw tin ka ruat” tiah a rak sim.

1990 Rampi Hrilawknak (1990 General Election)

1988 rampihuap buainak a hung suak laifang ah, Dr. Za Hlei Thang cu Tahan ih a um lai fang a si. Cutin, mipi khal in hotu ding ah an rak ko, amah khal in a paihve ruang ah, cangvainak a rak thok. Tahan cargate khal ah thusimnak a rak nei. Cutin, rampi huap mipi le tlawngta pawl duhphorhnak (sandahpiah) nei lai fang ah, Dr. Za Hlei Thang cu Falam ah a rak tlung. Falam ih a um lai ah Gen. Saw Maung ih homi Council cun, thuneihnak an lak ih, cutin ramsung ah duhphorhnak a rak cem. Cuṭhehah, Gen. Saw Maung ih homi Council cun, hrilawknak (Election) a um ding, party khal din thei a si ih, Yangon ah register tuah theih thu an rak phuang. Cumi thu an thei ngah ih, Dr. Za Hlei Thang ho in Falam ah Chin Democratic Party (CDP) timi an rak din ih Dr. Za Hlei Thang hi party Chairman a rak si. CDP party cu register tuahding ah, Dr. Za Hlei Thang cu Yangon ah a rak feh. Yangon a thleng tikah, 1988 buainak a suak lai ih duhphorhnak a nei tu Chin tlawng ta pawl le Chin politicians pawl kom khawm ih rak din mi Chin National League for Democracy (CNLD) hi hotu pawl thawn tonkhawmnak an rak nei. Culaiah, Chinram khuapi tinkim in party an rak din cio ih, Yangon ah register ding in an rak feh cio. Cupawlcu, CNLD hotu pawl in Chin party tamtuk kan um hi Chin mipi hrang ah a ṭha mi a si lo ruang ah, pumpak in party register tuah lo in, CNLD ih kom ding in an rak sawm cio.

Culai ih CNLD ih Gen.Secratary Salai Ngai Sak cun Dr. Za Hlei Thang le CNLD hotu pawl an rak tong aw thu hitin a sim sal. “Mah le pumpak cio in party kan din ah cun Chin mipi hrang ah a ṭha lo ding ruang ah CNLD ah kan kom aw thluh sawn le a ṭha ding tiah, Chin u pa pawl kan rak leng. A hrekkhat pawl cun voi 10 tlun lai kan va leng nan, Dr. Za Hlei Thang cu, Chin miphun zaten kan lungrualnak ding a si ahcun, ka thu rel cat zo mi hman, ka thleng sal thei tiah in rak sim. Falam ih kan party hotu pawl hnen khal ah, phone in ka rak sim ding ih, ka lo sim sal cih ding tiah thatho zet in, in rak sim. Neta kan va tong ah cun, a remcang thluh. 1989 February thla ah CNLD party conference kan tuah ih, CNLD party hrang ah hotu pawl kan hril tik ah, mi tam pi cun a mah hi party Chairman ding ah an duh cio. Asinan, Dr. Za Hlei Thang cun, Chairman hnak in Secretary pawl thazangcak ding in tuah sawn seh la a ṭha ding, cule, Secretary ah hin Salai Ram Ling Hmung in a ho ding ruang ah, Chairman le Secretary ah Falam le Falam kan si ah cun, party sung ah lungrualnak a um lo thei, tiah in rak sim sal. Cutin, Chin mipi lungrual theinak ding le Chin mipi pawl ramkhel ih kan cak sinsin thei nak ding ah, a mai ngah ding mi Chairman hmun khal a kian thiam tu le a kian thei tu a si” tiah a sim.

CNLD hotu pawl le Dr. Za Hlei Thang khal tongkhawmnak an rak nei. Lungrualnak duhzettu Dr. Za Hlei Thang cun, Chin party pakhat ah lungrualten kan um a si len, kan thazang a cak sawn ding timi a rak thei fiang. Chin mipi hrang ah Chin mi pawl kan lungrualnak ding, hmai ah ret in, an mai dinmi CDP party cu register a rak tuah nawn lo ih CNLD party ah a rak kom ih, CNLD (Falam) hrang ah Chairman a rak ṭuan. Dr. Za Hlei Thang hi a mah MP a ṭuan duh ruang ih party din khal a rak si lo. CNLD in Falam peng Constituency (mee-san-dah-nay) I le II ih palai an hril tik khal ah, Constituency I (Falam peng nisuahnak lam) hrang ah Pu C.K. Taikwel (Pu Kap Ve) an rak hril. Falam peng Constituency 2 (Falam peng nitlaknak lam) palai hrang ah Pu Lal Bik cu CNLD palai ding ah a rak lungkim. Party members tamsawn cu Dr. Za Hlei Thang an rak duh sawn nan, Dr. Za Hlei Thang in a rak kian. Asinan, Pu Lal Bik cun, khawte lam khual ka tlawng thei lo ding ruang ah tiah, Dr. Za Hlei Thang kha MP cuh ding in a rak ti ih Dr. Za Hlei Thang cu CNLD party ih MP palai ah hril a rak si.

Falam peng ah cun National League for Democracy (NLD) le Dr. Za Hlei Thang teih party Chin National League for Democracy (CNLD) rak zuam aw ding an si ih, khatlam a zuam tu ding pawl in, Dr. Za Hlei Thang cu an rak hek. Dr. Za Hlei Thang cu 1988 rampi buainak hnu ih Acozah a do tu tapung tlawngta pawl thawn pehtlaih awknak an nei a si tiah hek a rak tuar. Cutin, ralkap MI pawl in Tahan ih an inn ah voi thum lai an va check. A voi thumnak ih an inn an check ah cun, tlawngta pawl thawn pehtlaih awknak ca pawl ziang hman an rak hmu lo nan, Panglong Conference cachuk copy, an mah CNLD party hrang ih an rak suah mi ca pawl le cabute pawl an rak lak ih 1962 Printers and Publishers Registration Act, Article 20 na pahbal a si tiah, an rak kai ih taya an rak cuai. Himi daan pahbal cu kum 7 tiang thawng thlak theih a rak si. Asinan, aa-mah-khan in a rak suak sal. Dr. Za Hlei Thang hi Election ih tel thei lo ding in, a phunphun in dokalh a rak tuar. Election hlan zarh khat tiang, Election Commission in thu an sut. Cutin, 1990 April thla ah Election a rung thleng ih Dr. Za Hlei Thang cu Falam Constituency II ah a rak zuam. Hitin a rak zuam lai fang ih, aa-mah-khan thawn a luat lai fang a si. Falam Constituency II ah a zuam tu palai pa 3 an rak si. Vote pek thei tu milai 12,501 an rak si. Cumilak ah vote pek tu hi 9,899 an si ih, valid votes hi 9,454 a rak si. Dr. Za Hlei Thang cun 4,753 votes a rak ngah ih, Member of Parliament (MP) ding ah mipi in an rak hril.

Mipi ih hrilmi Dr. Za Hlei Thang cu MP a si hnu ah khal, Election hlan ih an buaipi mi thu in an rak buai pi thotho. Cutin, December 21, 1990 ah, Kalay Township Court feh ding a rak si. Dr. Za Hlei Thang cun a phun phun in a-yuu-khan (appeal) a rak tuah. Township Court, Sagaing District Court ih sin High Court tiang in a-yuu-khan a tuah nan, ralkap lam in kaih ding in pressure an pek tikah, High Court in a thu an rak rel ngam lo ih, taya an suai thok nak Township (myone) court ah an hluai sal. Cutin kaih ding a fiang tuk, a lawyer pawl khal in an lo kai thlang ding tiah thu an rak sim tikah, tayazung a feh ding ni December ni 21 hlan, December ni 17, 1990 ah Tahan ihsin a tlan ih Aizawl ah December ni 20 ah a thleng.

Kawlram Election Commission cun February 22, 1991 ni ah thusuah nak No.914 an rak nei. “Hlutdaw palai U Za Hlei Thang cu The Printers and Publishers Registration Law, Section 20 daan a pahbal ih, tayasuai a si lai ah Mizoram State, Aizawl ah a tlan. Curuangah, Kalay Township Court cun tayasuai lai ah a tlanhlo tiah thu an ṭhen cat. Election Commission cun February 22, 1991 ah MP ih sin kan suah a si” tiah thu an phuang.

1990 – 2000 tiang Dr. Za Hlei Thang ih Chin ram hrang a Cangvaihnak

Dr. Za Hlei Thang cu Aizawl ah khal Si-khan ong in pumcawmnak a rak hawl. Ramkhel lam cangvaihnak khal ah thatho zet in a rak tel. Chin National League for Democracy khal ramdang (exile) in an rak nung ter sal ih, Chairman a rak ṭuan. Ramleng ih a tlan mi Kawlram politicians pawl thawn pehtlaih awknak nei ringring in, KNU, Headkuarter a rak si dah mi Manepawlaw ah khal meeting pawl vakai in, a rak cangvai. Cun, Chin National Council (CNC) le Chin Forum ih Managing Borad khal ah member a rak si. Dr. Za Hlei Thang a dam sung ah Chin Forum cun Chin ram hrang daanhrampi (Chinland Constitution) an rak ngan, Future Chinland Economics and Education Policy an rak tuah, ramleng ih um Chin mi pawl lungrual theinak ding in an rak zuam ih, Chin ram mah ten ukawk theinak ding (self determination) hrang ah an rak zuam.

1990 Election hnu Ralkap Acozah an kai tikah, Dr. Sein Win ho in Ramleng Acozah (Government in Exile) National Coalition Government of the Union of Burma (NCGUB) timi an rak din. A thok ah Dr. Sein Win te in an rak sawm nan, tlangpar mi unau dang pawl an tel lo ruang ah, a rak pehzom lawk lo. Dr. Za Hlei Thang cu lungrualnak duhzetmi a si ih, tlangpar mi unau dang pawl an tel hnu, 1995 ah himi NCGUB cu a rak pehzom. Himi NCGUB ah hin Minister of Social Welfare and Development ṭuanvo a rak lak. Cun, July 1997 ihsin Minister of Health and Education a rak ṭuan. NCGUB ih Cabinet Minister a ṭuan sungah Burma ram in Democracy a ngah theinak dingthu tawlrelin ram dangdang ah a tlawng vivo ih, ram dangdang thuneitu pawl a tong vivo. Dr. Za Hlei Thang hi Toxic Goiter (turnei orpaw naknak) a rak nei tikah 1997 hnu ih sin a damtuk nawn lo tik ah, ramkhel cangvaihnak in tuanvo a rak lak mi hmuah hmuah a rak ap sal. 2000 kum, March thla ah a nu fa umnak USA, Maryland State, Frederick khua ah a rak feh.

Chin National Front Chairman Dr. Za Hlei Thang

Ralkap Acozah in 2008 Danhrampi an ngan hnu ah, USA ih um Myanmar Embassy pawl ih, Kawlram na tlung duh len kan lo bawm thei tiah an rak sim nan a rak duh lo. 2010 hnu ih sin President Thei Sein Acozah san ah, Ralkap le tlangpar mi hriamhrei kai pawl remdaihnak (Peace Process) tuah thok ding a rak si. Chin National Front (CNF) palai pawl le Ralkap Acozah palai pawl Thailand ah thurelnak an rak nei ih, cutin, ceasefire agreement nei ding thu pawl an rak rel. CNF khal cu, an mah sung ah thleng awknak tuah ding ah, conference tuah ding an rak si. Himi conference hrang ah, Dr. Za Hlei Thang le a ṭuanpi Pu Lian Uk, Salai Kip Kho Lian pawl an rak sawm. Dr. Za Hlei Thang hi CNF thawn hnaṭuan ding hih a rak tumtah mi a si lo. Asinan, a thleng awk mi Kawlram dinhmun ruang ih, CNF thawn hnaṭuan a rak si. CNF conference ah cun, Acozah thawn remdaihnak tuahding thu le ziangvek in hmailamah Chin ram hrang ah hnaṭuan thei daan ding pawl rel ding a si. Phunsang tlawng a kai lai ih sin rak cang vai tu a rual pi pawl Pu Lian Uk, Salai Kipp Kho Lian pawl an feh ding ti a rak thei, cun, Burma ram ah ramkhel a thleng aw lai fang a si thawn, Chin mipi hrang huap in a thupi mi a si tiah, dam lo cing tein, a fapa a damlo lai zet lai a si nan, a rak feh. CNF conference cu nithum an tuah hnu ah, CNF sung ah thleng awknak kan tuah ding ih, nanmah upa pawl in in tel pi a ṭul tiah an rak sim. Cutin, CNF daanhrampi khal an rak thleng ih peng tin ih palai an rak hril tikah Dr. Za Hlei Thang cu Falam peng palai, Pu Nang Lian Thang cu Tedim peng le Salai Kipp Kho Lian cu Sizang ram palai tivek in an rak ret. A ṭuanpi (comrade) Salai Kipp le Pu Lian Uk pawl thawn thu an rel tik ah, CNF ah member lut lo in kan tel thei ding a si ah cun, ka lut ding tiah an lung kim. Himi ah kan tel lo a si ah cun, Chin ram hrang ah hnaṭuan duh lo kan bang ding tiah, an rak tel. Dr. Za Hlei Thang cu CNF ih Chairman ah termkhat sung a rak ṭuan a si. Chin mi kan lungrual theinak ding ah le Chinram hrangih hnaṭuan tumtahnak thawn a rak telnak asi.

Thunetnak
Mina thawngza dam ter tu Pu Dr. Za Hlei Thang ..

Harstnak phunkim, dodalnak phunkim pah tlang in, Chin mi pawl lungrualnak hmaisabik ah a ret ringring tu Pu Dr. Za Hlei Thang ..

Lai ṭong karhzai thei sinsin nak ding hrang, Lai mi pawl in kan ṭong hi hmai hngal zet in, thlaphang lo le thla phang lo in, ningzak pi lo in kan ṭong ngam theinak ding hrang ah …. soiselnak, dodalnak le harsatnak phunkim tuar in, neih mi hmuah ui lo in, hmai a rak nor tu Pu Dr. Za Hlei Thang ..

El-Bethel Baptist Church, Bethel Theological Seminary le Lairawn Baptist Association cangsuak thei ding ah a rak zuam bik tu kan pa Pu Dr. Za Hlei Thang ..

Chin politicians pawl lak ih arsi tleu, ramkhel lam ih kan pa bik Pu Dr. Za Hlei Thang cu pailral in kan san tikah Chin mi pawl in kan siang lo zet. Sihman sehla, a rak tuh ta mi thlaici pawl, tu san ah a rah an par rero zo mi a hmuh ta ih, a mah khal a lungawi in a di riam zet. Lai mi pawl khal ih, a rak zuamnak, a taimaknak pawl par ah, kan/an upat zet mi kan hmu thei.

Salai Ting Maung Oo a rak bawm nak, a rak thup ngam nak hrimhrim hi a ral ṭhatnak a lang. Tusanah, mi tam pi cun a mah dinhmun ah um seh la, Salai Ting Maung Oo hi kan rak bawm/thup ngam ding ka zum lo. Meithal thawn a rak ra tik khal ah, Dr. Za Hlei Thang cun, ṭih a nung zet, a mah khal thawng a talk thei ti a rak thei ko nan, a rak thup ngam tho tho. Voikhat cu Kawl Lian in Salai Tin Maung Oo ih rakenmi pistol meithal thawn, inn sung ah cawhnawipaung a rak bat ih an inn kiang ihi tlang-ak pawl khal an rak zam thluh ih an rak thinphang zet.

Dr. Za Hlei Thang hi ruangrai khal ṭhazet, hmel khal ṭhazet mi a si ih, ramkhel a ṭuan pi tu pawl ih an upat zet mi tla a si. Amah vek thinlung picang nei in “Lungrualnak” timi hmai ah ret ringring in hmailam ah kan miphun le kan ram hrang ṭuan vivo thei ding in khal, a mah a rak ṭuan ta mi par ih thazang lak in, tusan ih mino pawl kan zir ding mi a si.

Harsatnak phunkim pahtlang in, kum 75 sung Chin mipi hrang ih a ṭuannak a cawl thlang, a duhdawt mi a sungkua tansan in Bawipa hnen ah March 17, 2018 ah in feh san. Dr. Za Hlei Thang hi pialral in kan san ko nan, a zuamnak, a taimaknak pawl cu kumkhua ih a hmun ring ring ding. Kumkhua in u pat a si ringring ding.

Mi na a tuam hlawmnak, ramkhel lam ih a cangvaihnak le ram le miphun hrang ih a zuamnak ah thinlung thiang ten hna a ṭuan ringring tu, Miphun dundawt tu, kan ram ih sin suak duh lo na cing in a rak suak, tlung a duh zet ko nan kum rei pi a rak tlung thei lo nak, a duhdawt mi Chin ram, Falam khuapi (tui hlan ih Chin ram capital) ah kumkhua cawl thlang ding a si.

Chin ram arsi tleu … Pu Dr. Za Hlei Thang … upat sunloihnak ka lo pek a si.

Hminsin: Himi Pu Dr. Za Hlei Thang ih thuanthu hi “Salai Van Cung Lian(UK) in Chinlandtoday.com ih a nganmi a si. Ca ngantu/tawlreltu pawl siannak ih ka ngan/tarlangmi a si lo nan, a thuanthu ka siar tikah a thuanthu ka duh zet fawn, curuang bikih ka run ngan/tarlangmi a si. Himi a ngantu pawl hnen khalah ngaithiam ka run dil cih.