GENIVI TUANBIA (III)

2 min read

ZUMHAWKTLAK NU GENIVI Tuanbia Part III

Genivi cu a lung a leeng a ngaih a chiatuk i thlalangawngin khua a cuan i a mitthli aa hnawt lengmang. Cu tluk in a ngaih a chia ko nacun mi hmuh ahcun lunglawm thanuam ngaite bangin aum tawn. Pumh can zongah hmaipanh tein biakinn lei a panh tawn. A ngakchiat lio tein an inn chungkhar ah dawtnak le zangfahnak a ngei tawnmi a si bantukin mizaw va zoh le misifak va bawm cu a rianțhabik ah aa ruah. Thla a campiak hna i an lunglawmh khawhnak dingah bia thawthaw a chimh a ruah tawn hna. A dawtmi a vapa Count biacah takmi zong philh lo tein thla a campiak lengmang.

A vapa Count nih amah aiawh in rianțuantu ding a chiah takmi pa kha mifim mi depde a si; a min ah Golo a si. Mi hmuhah țha ngaiin a um khomi mi zerngai a si i Count zong nih khan mițha ngai ah a ruah. Count a um ti lo cangka a duh paoh in a tlong i, I porhlawtnak le ruamkainak a phunkip a tlinh. A um tuning kha Genivi nih a hmuh tikah a thinlung a fak ngaingai. An ram chung cozah rianțuan lahkhah zong a zuh dih hna i puai tuahnak le nuamhnak ah a hman dih. Cu lawng hmanh si loin Genivi sin ahcun a va kal riangmang i “Na va pa cu a thi cang lai. Na mui aa dawh tung i a lak in um awk ahcun na pam tuk, keimah he kan i um lai” tiah a va ti. “Na va pa cu a nun a si zongah kan rak thah te ko lai. Kan thah lo zongah ramdang ah kan thawl lai” a va ti than. Genivi cu a thin a hung tuk i, “Golo na tuah sernak cu chim lo hman ning law thing le ram tal nih hin an chimte lai” a ti pah in a tho i ca le cafung aa lak i Sigfrad sin ahcun ca a kuat. An sinum lak i a zumh bikmi Drako timi a auh i ca cu a pek. Cu lio te ahcun mi depdepa Golo cu Siangpahrang innchung ahcun ngunnam he a vung lut. An ih nak khan i cakuat a pek lio te a si caah, a thawh riangmang i zumhawktlak ngai Drako cu a thin hmaka in ngun nam cun a sawh i a thi. Mi lihchim mi depde Golo cu a au i “Kan bawinu Genivi kan zumh cu kan rak palh hringhran Drako he an sual liote ka paoh hna i Drako cu ka thah. Kan Bawinunak in keimah ko hi nan hmai kan khap hna lo” tiah a ti.

Genivi cu a ar ko, mihrut bangin ngang koin aum i, ka khat hmanh bia a chim kho lo. Golo nihcun Count Sidfrad sin ahcun zokzok in ca a țial.

“Na nupi na zumh ngaimi Genivi cu khuaruahhar a si ko. Nan ihnak khan ah nansalpa Drako cu aluhpi i ansual lioteah ka va hmuh hna. A tlangvalpa cu ka thah. Cu ruangah na sual, na ka ti a si ahcun ngaihthiam kan hal. Ka ningzah cu nangmah tlukte kha a si. Kan bawinu cung belte ah ka kut ka hler hin lo. Na tlun hnu ah nangmah nih khuakhang te ko”

Zumhawk tlak.
Golo

tiah a hei țial.

A catialmi cu a hunrel than i anih bu khin hi ca a hmuh hin cun zeitluk mițha le mi lungsau a si hmanh ah a thinhun cu mei zik bang a hlio in aa hlio ko lai. A ngaithiam kho bal lai lo. Count a hung tlun tikah hin cun Genivi cu anun zong a nung lem ti lai lo. A sual le sual lo zong a chim manh lem hnga maw? tiah a mah le a mah aa ceih.

 

Ref:: Rev. John Siam Lian

One Reply to “GENIVI TUANBIA (III)”

  1. Very nice post. I just stumbled upon your blog and wanted to say that I’ve really enjoyed browsing your blog posts. In any case I’ll be subscribing to your feed and I hope you write again soon!

Leave a Reply

Your email address will not be published.