GENIVI TUANBIA ( I )

ZUMHAWKTLAK NU GENIVI TUANBIA

Hlanlio ahhin a mui ngaingaimi Germany ram cu thawngthabia nih den cuahmah hram a rak thawk, pakhat le pakhat ngeihmi thil i chuh le i lakpiak hna cu an thinh pah lengmang cang. Mah kutke tein țuan le kawl hram an thawk pah lengmang. Hi can lioah hin Brarante an timi ramah zumhawktlak le pa ralțha ngai Duke of Brarante timi a rak um. Cu ram uktu bawi cu a rak si. A min a rak thang ngaingai i a min thannak cu a țhat ruang ah a si. Siangpahrang le bawi ngan pipi hna zong nih an rak upat i, an țihzah ngaimi a si. A mah mițha a si bantuk in a nupi zong mițha a si ve. Fanu te pakhat an ngei i a min ah Genivieve (Genivi tiin relding) an rak ti.

A hngakchiat lio te in Genivi cu mi phun dangte a rak si. A nu le a pa țhatnak cu an fanu te zong nih cun a lawh ve hna. Hlanlio ahcun bawi zong nih la an rak kher ve tawn. A nu la kher le cawlcangh hi Genivi nih cun țha tein a zoh i a rauh hlan ah a nu bang cun la tongtham zong cu a hun thiam ve.

A nu le pa cu Khrihfa zumhawktlak taktakmi an si. An fanu te zong pumh le khomh lei ah hin a zuam ngaingaimi a si.

A nun can le a hawilen a țhat caah an khuami zong nih an i zohthla ngaimi a rak si. Pathian Biakinn hi a upat ngaingai i pumh le Pathian hlasak a nuambik in a ruah. Dawh le nun can țhat cun a hung thang lengmang i a tu cu ngaknu a hung si ve cang. A nu le a pa ca zong ah an ram chungpi hmanh ah an i chawrbik ah a hung cang.

Hi lioah hin Count bawi Sigfrad timi tlangval nunțha ngai le a chuak thiam ngaimi a um ve. (Count timi hi Duke nak hme deuh ukbawi a si ve) Count Sigfrad cu pa ralțha ngai a si i voikhat hawi cu ral tuknak ah Duke of Brarante cu a nunnak in a khamh Duke nih a dawt ngaingai i a in um ding le a fa khan i zoh dingin a sawm. Hmunkhat i an um hnu cu a fanu Genivi he an i duh ngaingai i a țhitumh ter hna.

Sau nawn an um ti hnu khin Count Sigfrad nih cun a nupi Genivi an ram lei ah thlunpi a timh. An kal lai ahcun ngaihchia lo le mitthli tla lo hi an um hrimhrim lo. Genivi nih cun a vapa cu a duh i a daw ngaingai ko nain, a khua le a ram, a nu le a pa an inn lo kaltak kha cu a siang hrimhrim lo.

Kal ding cun an i tim i a pa nih cun a fanu Genivi cu a hngawng in aa kuh i a mitthli he “Ka fanu na nu le kei cu kan tar cang i hi ti na kan kaltak ahcun hi vawlei ahhin cun kan i tong ti lai ti ka zum lo. A fekmi Pathian nih cun na umnak kipah in hruai sehlaw, hnangamnak le daihnak in pe ko seh. Atu ningtein khua nan sak ahcun na nu le na pa zong nih kan in ruat lai lo. Zankhat mitchinh zong va tong sual usihlaw, lungdai hnangam tein kan thi ko lai” tiah a pa nihcun thlahnak bia a chim. A nu zong nih a fanu sinah thlahnak bia a chim ve. “Ka fanu, nang cu na hmet tein Pathian thluachuahnak a hmumi na si cu zapi theih a si. Ka phan bikmi cu Pathian thluachuah na hmuhmi hi philh riangmang in nuncan țha lo hna in na um sual lai, ti hi a si. Pathian thluachuahnak tel locun minung hi zeihmanh kan si kho taktak lo. Ram hla pi ah va um hmanhlaw, hi vawlei cung ah mui i hmu ti hmanh hlah usihlaw vanram tal i kan i hmuhnak hnga Pathian cu va philh hrimhrim hlah, ka dawtbik ka fa” tiah a ti.

Count Sigfrad sin zongah “Nang hi ka tupa ka zumh ngaimi le ka dawt ngai mi na si i kan ram chung i kan ro sung bikmi le kan dawt bikmi cu na kut chung ah kan chiah cang; Zangfahnak tein na pi le na pu thinlung fahnak hi maw hun tuah cicet lai cih” a ti. An nupa cun an pa hmai ahcun an khuk an i bil i Duke te nupa nihcun thluachuahnak an pek hna. An khua chung i Pathian rianțuan nganbik Bishop zong nih an nupa cun thlachuahnak a pek ve hna. “Nan cungah Pathian thluachuahnak cu a zungzal in um ko seh” a ti.

Pehkhawh kan rak i zuam lai…

Ref:: Rev. John Siam Lian