Duhtlinlonak Vawlei

7 min read

Duhtlinlonak Vawlei
By: Samuel Zabiak Hmung(Sam Biak)

Laimi tamdeuh cu ralzaam sinak in miphun dang ram le khua hna ah a phanmi kan si. A thei ballo le a hngal bal lo zong ramthumnak phanh hnu in a theihngalmi ah kan cang. Cuahcun, Biak Aa le Apar timi zong USA ram ah an pahnih tein an phan ve. Biak A hi a u le he A Par a phanhhlan deuhvak ah a phanmi asi. Biak A kumkhat USA a um hnuah Apar zong cu Biak Aa umnak khua ah kumtlinglo(Minor) in a rak phan ve. A thei bal le a hngal balmi an si lo. Asinain khuakhat teah an phanh tikah an pahnih an hung i hngal cang. Apar hi midawh ngai le duhnung ngaimi ngaknu no te asi. Cutikah a phanhnak khua tlangval paoh, acang in a no tiang nih Apar kong cu an ceih dih cio. Cuahcun Biak A zong a tel ve. Asinain a lungduh tak cu a chimngam rih lo. Cuticun caan cu a hun liam thluamah.

Apar a khua hi Falam a si. Biak A a khua hi Halkha asi. Lairam  ah a thei bal le a hngal bal lo an si lengah Apar cu USA a phanhka te long asi caah Biak Aa nih cun a lungduh zongin a chawn ngam rih lo. Cuhlei ah Biak Aa hi Lairam a um lio ah Falam holh a thei balmi a si lo tikah Falam holh in bia ruah lai ding cu a rak zenh ziar. A hngalhmi pakhat te cu "ka lungawi" timi long si. Mah lo holhthuk deuhpaoh cu a hngalhmi a um lo. Asinain, Apar cu Halkha holh a thiam ngai caah tlawmpal cu ahun i rel deuh. Cuticun Apar a phanhnak in a zarhkhatnak zarhteni cu an hung phan. Hlacawnnak ah Biak Aa le Apar cu an i tong. Biak Aa hi ningzah pang deuh kan ti cu mitam deuh umnak ah cun Apar cu a chawnngam tuk lo. "Na dam maw? Zeitik nan phanh? Kan khua cu a nuam ko lo maw?"
ti pawl long tlawmpal a hei hal i, mi an tam deuh caah Biak Aa nih cun a kal tak than. Biak Aa nih hawi pakhat a ngeih. Cu a hawipa cu nungak lei ah a khulrang ngaimi asi. Ningzah zong a hngal lomi asi. Cupa nih cun zeikar lakah dik A Par le a Unu email pawl a rak hal manh ziar hna. A Par a unu zong hi miza ngai asi ve. Biak Aa zong cu a hawipa nih A Par a unu email cu a pek ve. Mah zaan cu luklak teah hlacawn cu a hun dih. Caan a dih manh zong hngalh asi lo. Cuticun hlacawnnak cu a dih i A Par le a unu cu Minor an nu nih arak don hna i inn ah an ti. Biak Aa nih A Par le a unu cu mangtha a hei cah hna i inn ah a tin ve. Cu zaan cu Biak Aa cu khuafak piin a ruat cang. A mitthlam ah A Par longte a cuang cang. A mit a chinh i a hmuhmi paoh hi A Par muithlam long te an si. A ih zongah
a ih siarem ti lo. A vaivuam cang. Cuticun ruahawk theih loah a hawipa nih A Par a unu email a pekmi kha a lungah "duak" tiah a hung chuak. Vanthat ati i Biak Aa cu lukmalak a computer a on i A Par a unu email cu a hung add cawlh. A Par a u zong email a rak thut he a ton bak asi i a rak cohlan(confirm) colh ve.

Biak Aa nih cun, "hi" a vun pek. A Par a unu zong nih cun "hi" a vun pekthan ve. Biak Aa nih cun "na dam maw, na ka hngal maw? Biak Aa ka si" tiah a hun ti. A Par a u nih cun, "aw kan hngalh ko, midang pi ah pei kan rel cu na mail ka hngal bal lo le" a hun ti. Biak Aa nih cun "aw siko lai ka hawipa nih a ka pek i kan rak add. Na ka cohlan i ka lawm mu" ati. "aw kei zong ka lawm tuk ve mu na ka add i" tiah A Par a unu nih cun ati ve. Biak Aa nih "na nau tah a dam ko lo maw? Ka ngai tuk tiah rak ka chimhpiak te" tiah a hun ti. "Aw a dam lio si ko kan rak chimhpiak lai" a hun ti. Cuticun mah zaan cu Biak Aa le A Par a unu cu saunawn te an i chat hnuah zaankhua a hnut deuh cang caah an pahnih in mangtha an i cah i, an chuak veve. Caan cu tlaihawk a that lo bang nikhat hnu nikhat in ni le thla cu an hun liam thluahmah.

Nikhat cu ruahlopi' ah A Par nih Biak A mail cu a rak add. Biak Aa nih a email a hun on cu A Par mail min cu a vun hmuh. Umtuzia thiam loin luklak A Par mail cu a hun cohlan(confirm) cawlh. Vanthat ah A Par a thut lio he a tong ai. Biak Aa nih cun lukmalak ah "hi" a hun pek cawlh. A Par zong nih "hi" a hun pek cawlh ve. Cuticun an biahram cu an hun domh thluahmah. Biak Aa nih a thinlung chung um-ek in A Par a duhdawtnakbia chimh dingah hin ready peng asi ko nain, a tuan tuk rih hnga maw tihi a lunchungin a ruahmi asi. Asinain, a lungthli tein a rak duh tuknak kha a thuhkhawh ti lo caah chim lawlaw ko cang ning zei sikhawm zongah ati le a biahram cu a hun mer. "Dl na ngei cang maw" tiah Biak Aa nih cun a hun ti. A Par nih cun "ka ngeih rih lo nangtah?" tiah a hun hal ve. Biak Aa zong nih cun "ka ngei ve rih lo" a hun ti. "Asinain, a tulio te hi ka thinlungah a um tuk i lasi bang a dawhmi, zohcim lo nungak, vanmi bang ka zohthlami ngaknu no dawh te a um ee," tiah Biak Aa nih cun a hun ti. A Par nih cun "hodah asi mah minu cu na ka chimkho hnga maw hngalh ka duh ngai" tiah a hun ti. Biak Aa a lungthin cu tor hram a hun i thawk. Tlaihawk a that ti lo caah, "cu nute cu atu lio i ka chawnh thluahmahmi nangmah hi na si ee" a hun ti. "Na caah cun kan duhnak kong kan chimh hi a tuan tuk rih ko lai nan, kei caah cun a hnu tuk sual lai ti ka phang tuk i chimh loin kan um kho ti lo, ka thinlungah meinam sawh bangin a ka sawh i kan um kho hrim ti lo caah, ka thinlung chungum duhdawtnak vialte cu nang sinah kan hun pek hi asi. Zeitindah na ka ruah, na ka letkho hnga maw?" tiah  Biak Aa nih cun a hun ti. Biak Aa nih A Par cu nangmah na si a hun ti tikah A Par cu saunawn te chimawk hngal loin ahun um hnuah, "kan zum lo na ka hlen ko lai. Kei cu ka phanhnak zong asau rih lo, thlahnih leng long asi rih. Cucaah na ka duh taktak lai kan zum lo" a hun ti. Asinain a lungthli te cun kan duh ve ko tiah amah le mah a ti. Nu sihrat cu voikhat pi i aphi pekcawlh kha a nautat ve ca tu-ah kan zum lo a titer hi asi. A thli tein cun a lung cu arak tor tuk ve. Biak Aa nih cun, "kan hleng lo nangmah long hi kan duhmi le ka voikhat tonnak in kan duhmi na si. Na phanhka te khan atu tiang ka lungchungah na cam peng, ka mitthlam ah na cuang zungzal. Zarhkhat kan i ton lo hmanhah a celh te ka celh hrim lo, kan ngai peng. Ka lungthin nih nangmah long hi an duhmi
le an herhmi na si" a hun ti. A Par cu ngakchia deuh kan ti cu, a ningzak i si lai cu, "a tuzaan cu ka mitku deuh cang i voidang tu ah kan i chat than te lai" a hun ti. Biak Aa nih cun, na ka zum lo maw?" a hun ti than nan, A Par nih cun a chuak tak ai cang. Cu zaan cu suimilam 3:34 am a hun si cang. Asinain, zeikar lakah caan a liam manh zong Biak Aa caah cun hngalh manh asi lo. Cu zaan cu zei ti tha thlavang tangah A Par zuunngaih in zaankhua a dei.

A thaizing cu khua a hun dei. Biak Aa cu zingka 11:48 hrawngah a hawi le inn ah England pumpululh chuih zoh dingin a thawh. A hawi le inn a phanh zongah a umthiam ti lo A Par kong longte a ruat i computer thut longte a duh cang caah a hawipa computer cu a hun hlan i pumpulh chuih zong zoh ti loin, computer cu a hun thu. A Par zong Biak Aa nih zaan i a chimmi bia hna cu a lungchungah an cam tuk in tuantein a rak tho i computer cu a rak thu ve. Cuni cu Biak Aa nih "hi" pek hau ti loin Biak Aa a thut le cang ka te A Par tu nih "hi" a rak pek cawlh. Biak Aa zong nih "hi" a pek ve. A Par nih cun "na tho tha maw" a hun ti. Biak Aa nih "ka mang ah kan hmuh i ka tho tha tuk ko. Nangtah na tho tha maw?" a hun ti ve. Cuticun, khuacaan hna cu an hnu liam thluahmah.

Nikhat cu duhtlinlonak vawlei ruangah Biak Aa cu kadang khua ah thial ding a hun si. A Par sin in aphi hmanh a ngah hlan i kadang ah i thial ding cu aruat kho hrim lo. Asinain, thial loawk nig a that lo caah vawilei cu duhtlinlonakram pei asi cu tiah amah le mah thazaang a hun i pe than i, zeisikhawm ah i thial ko ning, then caan a um bang tonthannak caantu a um than te ko lai tiah thial dingin bia a hun i khiat. Cuticun Biak Aa a thial hneknak kong cu A Par nih a hun theih tikah, a lungthli cun a ngaih a rak chia tuk, a celh te arak celh hrim
lo. Asinain, vawlei phung pei asi cu a ti i, a ngaihchiatnak cu langhter a sum. Nithla hna cu tlaihkhawh loin an hun liam chin lengmang. Biak Aa a thial ding ni le caan hna zong a nai chin lengmang. A Par mithmai cu zeitikhmanh ah lawmhnak mithmai a leng kho ti lo lungkuai mithmai long a leng ko cang. Asinain, Biak Aa sinah cun a mithmaichia vialte cu panh tein a umter lengmang. Cuticun, Biak Aa zong nih hmundang le kaadang kalding a si tikah A Par a lungfahter ding kha a ruahkhawh ve lo caah, A Par a duhdawtnak vialte cu, i sum in hawikom bantuk tein a umter cang. Asinan, a lungkuai cu a celh te a celh ve hrim lo. Duhtuk ko nain, duh lo phun i, i umter cu, a fak tuk hringhran kha an fiang chin lengmang. Cuticun, Biak Aa le A Par cu, duhtlinlonak vawlei ruangah hmundang le kadang ah an pahnih tein an tian ai. I duhdawt lo ruangah sihin loin, duhtlinlonak vawlei pi ruangah, lungthli tein a duhdawmi Biak Aa le A Par cu an tian ai ee. "Tuar ahar ko nang le kei kan tian hi" tiah Biak Aa cu a mitthli rialtidai he lungkuai butein a rak i lungsak. A Par zong Biak Aa um ti lo hnu cun, a mitthli he hmai phiah buin, nitin zaantin te, lung lileng in a hram ve tawn. A Par cu a Biak Aa a um ti lo hnu cun a lunglen celh lo tukah biazai pakhat te Biak Aa caah a tialpiak i tuarkhawhlomi mitthli he a lungsak ve.

"Nang cu a kaltu maw na si?
Kei cu a tangtu men,
Nang zuunngaih in,
Mitthli he ka hmai ka phiah caan ah,
Nang long ka mitchung ah,
A tang pengmi cu nang long"

Duhtlinlonak kan vawlei  hi, a dawmi zong siseh, a dawlomi zong siseh thennakram asi. Duhtlinlonak  kan  vawlei ahhin zeitlukin duhtlin i tim len hmanh uhsihlaw, kan duh cu a tling kho  hrim lai lo. Duhtlinlonak kan vawlei cu thennak le ngaihchiattertu men asi.  Vawlei hi cu duh a thling kho hrim lo.

Leave a Reply