Duh Mang cu bawi tlangval a si i, a nu le a farle hna nih cun, “Aho fanu ko dah kan țhitpiak lai?” tiah hin khua an ruat. Ramuk bawi fanu kip cu saduh an that. Duh Mang cu ngaknu len awk a hngal lo i ni khat cu a umhar tuk ah inn pawng i vapel dingah ai chok. Va a pelnak ah va a pel vemi a hawikom tlangval pa he an i tong. Duh Mang nih, “Ka kawi, nang ahodah na len tawn?” tiah a hal. A hawipa nih cun, “Ka dua kannih ngaknu cu a mui a chia tuk: a sam chiat si, a tungtai rem lo hleiah a umtu ziaza a chia tuk fawn,” tiah a ti. Duh Mang nih cun, “A mui hmanh chia seh law len awk ka hngal lo i tuizan cu kan zul ve ko la, rak ka sawm pah te,” tiah a ti.
Cu zan cu Duh Mang cu a hawipa he cun Darte cu an va leng ve. Ngaknu inn an phak ah cun Darte nih cun, “Ai cu ngai cu, lungthli ruah loin Mangmang na rak kan leng ve mu” tiah aw nem ziaimai te cun a hun chawn. Duh Mang nih cun Darte aw a hun theih cun a hmaifang a hun bih i a hawipa chimning cu si hin loin ai dawh le a sam țhat le a tungtai rem le a hmurka țhat ning cu chim awk a țha lo. Dar ti thlet cio te a lo ko.
Duh Mang hla;- Dar Din, luput le sam thlarem; a nu hawi nih an iang lai lo; tlang i zur tidil an chim bang.
A cu zan thawk cun zawngte tikhor hmuh zia in Duh Mang cu Dar Din te inn lawngah a leng cang. Chun zongah cuka lawngah cun a leng. Zan khat cu Dar Din tlangval pawl nih Duh Mang cu paih an zuam. Duh Mang nih cun a tei dih hna caah Dar Din cu a lung a si tuk hringhran.
Dar Din hla;- Paihbuan, ser hlah u val ran nih; val nih vun thluk lo khuang hliang ța; kam lo chuncha bang dir lengluang.
Dar Din le Duh Mang cu an hun i duh ai cang. Dar Din cu michia fa asi caah Duh Mang nu le farle nih an duh lo. Duh Mang cu Dar Din leng kho hlah seh, tiah a farle nih innka an hrenh khanh. Cu zan ah cun Dar Din inn ah cun pattiațumlo pathum an chuak. Dar Din cu Duh Mang a rat lo caah a lung a țha lo i tlangval hna hmanh cu țhațhi khin bia a ruah hna lo.
Dar Din;- Tuzan zan hi zei zan thla maw; pen dingdeng nih kan tlawng ti lo; puar pempum lawng pathum ril hna.
Tlangval;- Puar pempum cu kan kal ai lai; pen dingdeng nih in tlawng te seh; kim cingceng te rung zau ai u, tiah an ti tak hna i tlangval pathum cu an lawi.
Duh Mang cu amah phun tluk a simi ngaknu Sai Ki a nu le a farle nih an țhitpiak. Duh Mang nih cun Sai Ki cu a duh lo tuk i a huat tuk ah hin a zun a puam tuk a ti tawn. Dar Din țheu cu a leng tawn. Dar Din nih cun nupi a ngei cang ti a hngalh i țhațhi hmanh khin a chawn ti lo.
Dar Din;- Zei ce, zakkeh le puan thuan maw; kha hlan bang ti cu ti tung lo; țhat fawn leng dang rim kai ai cang e.
Ni khat cu Duh Mang le Sai Ki bawinak ding caah țang an su. Dar Din zong cu a hung chuak ve. Duh Mang farle nih an huat tuk hawi sin umter loin amah lawng tuarpar ah thir sum le thir sukkhal in fang cu an sukter. Duh Mang cu innchung in a hung chuak i Dar Din cu a ngiat len i a hmu lo. A hnupi ah inntual parlei ah a va i chok i Dar Din cu a hei hmuh. Dar Din sukmi fang cu a thlet dih i vawlei he a cawh hnuah an pahnih an i kup i Dar Din tei inn ah an kal.
Duh Mang te lo le Dar Din te lo cu ai naih te i ni khat cu lo ah an kal ți. Zanlei tlun zat nawn ah khin Dar Din cu a hei viuh a theih cun inn tlun cu a duh tuk cang i a lo thlawh tha a nuam set ti lo. A nu nih, “Tlun a za rih lo” tiah Dar Din cu a sik.
Dar Din;- Ka nu phun hlah law zei hngal lo; kan pin tlang in mi kui thei ing, sing lo an duah len lio ti hna e.
Duh Mang a rak tlung chung i tlaitlan in a ngah i tlaitlan cung cun a rak it ko. Dar Din le a nu cu a hung tlung ve. Dar Din nih cun a nu cu zah nawn kaw țhangh ngam loin a kalphah in Duh Mang ke cu a hei chuihpiak.
Duh Mang;- Dar Din, a hleng in val deuh hmang; khan rak dir law tlaitlan dawh ah; zeizong khin kan i hal hawl lai e.
Voikhat cu Duh Mang cu Kawl ah ramhran ah a kal i ni sau nawn a rau.
Dar Din;- Duh Mang Kawl ah ramhrangthla maw; a vun tam cang maw rawl loin; ka zuun thil le dairial kua lang e.
Duh Mang far;- Nang zuun thil le dairial seksuk; ța khan kan dawt tluang ce dang in; kan ban thlumhmanhei tei ti lo.
Dar Din cu tlangval rual nih an len.
Dar Din;- Sangsang, kai hlah u val ran nih; thlalang kheng dawh ngun mang zaunnak; bawi ai rim nan hlo lai lo maw.
Duh Mang cu a hung tlung i a far le rual nih an rak don. Dar Din zong cu a va kal ve i a far le nih, “Nang chumpur nu hi, kan ța don awkah na tlak lo,” tiah an dawnh nain an hnu lei tein a va kal ve. Duh Mang cu a far le rual nih cun pakhat hnu pakhat “Țața keimah zuu ding hmasa” tiah an ti len nain a duh lo. Dar Din sin a phak ahcun Darte a rak putmi zuu cu a din i inn ah an tlung ți. Mah lio hrawng ah cun Dar Din cu mikip nih an rak ham.
Duh Mang;- Dar Din, ham hlah u val rual nih; a man khan tuak nan sem lai lo ngeih lo mar caan lim sia nau hna.
Duh Mang nih cun ka kal ve ko lai a ti len nain a nu le a nifar pawl an hna a tla thiamthiam lo.
Dar Din;- Duh Mang a nu nih kheng tla maw; khen sual um seh law khua thawngin; fapa sem kan cawi ți hoi lai e.
Duh Mang;- Dar Din ham hlah u val run nih; an co rua ding lo mar bangin; kei khom tom hruk in ham ve lang e.
Duh Mang;- Dar Din, ham cio hna val ran nih; an kingtial nam an bah cio lem; kei khom tom hruk in ham ve lang e.
A nu le farle an hna a tla na lo cun amah nawl in Dar Din cu a va ham. Dar Din cu a nu nih arsa kheng he Duh Mang sinah a hunter. Duh Mang nu nih “Nang rimnamnu nih hin maw ka fa Duh Mang cu na vat lai” a rak ti.
Duh Mang nu;- Duh Mang than dai lo Dar Din țhi; a val hawi hmai del lai dek maw; ngeih lo chaw țha pumpa ve kha e.
Duh Mang far;- Duh Mang pakhat nih Dar Din țhi; chiahhrin lengnu zulh ko thlak ah; rang le rual țhi pan in e.
Duh Mang le Dar Din an i um hnuah cun a hawi le nih Duh Mang cu ram hran an rak sawm. Dar Din kaltak sian lo ah a hawi le cu “Kai manh lo” tiah a ti hna. A hawi le nih cun ngol loin an sawm tuk caah a kal ve. Duh Mang nih cun a nu le a farle cu a zumh hna lo caah a salpa sinah “Ka um lo karah Dar Din hi țha tein na rak zohkhenh lai” tiah a chimh tak. Dar Din cu a nu le a farle rual nih cun far hlam an fial. Duh Mang a salpa nih cun “Kan zulh ve lai” tiah ai tim. “Zul hlah” tiah an thloh. Asinain Duh Mang salpa nih cun tithawl hme tein ti a ken i Duh Mang nu le far hngalh lo karah a thli tein a zulh. Ram lakah cun Dar Din cu far a hawl lengmang. A ti a hal i a salpa i ti a phurhmi cu a din dih. A ti cu a hal țhan. Ti um lonak tlangcaar a si caah a salpa cu ti hawl ah a vak. Salpa nih cun “Ti ka va hawl lai i ka rau lai lo; khiang ti hi maw rak ding hrimhrim lai ci” tiah a chimh tak. A salpa ti a hawl karah cun a tihal a celh ti lo i khiang ti cu a din sual. A pum cheu bang cu vui ah a rak i cang. A salpa a rak kir tikah Dar Din cu a cheubang vui ah a rak i can cu ahun hmuh tikah zeitin tuah awk a hngal lo. A vansan le a ngaihchiat in mitthli lawng a tla lengmang.
Salpa;- Khi maw, kan mei tlanfar hlamnak; nang keneh hun khirh ti loin; sai aw ka țap lai ni chunhlan e.
A salpa cu inn ah a vung tlung. Inn a phak hlanah Duh Mang cu a rak tlung ve. Duh Mang nih “Ka nu, Darte ta” tiah a hal. “Ka fa, zuhui hi ei rih law kan in chimh te lai” tiah a ti. Mah lioah cun a salpa cu inn ah a hung phan i a sining vialte cu a Bawipa Duh Mang cu a chimh dih.
Duh Mang;- Ka nu, rawl ka rawnh kal ai lang; vang zirziarte maw liam tal lai; vung dawn lai e zo tung rawn in.
Duh Mang;- Ka nu, rawl ka rawnh kim ciuceu; vang zirziarte hmun liam tuan kun; dir hmun zawl in ka dir te lai e.
Duh Mang cu Dar Din far hlamnak ah cun a vung kal i, a vung phak tikah cun Dar Din cu vui ah ai cang dih cang. Duh Mang a hun hmuh cun vuipi cu a mitthli a tla.
Duh Mang;- Sai aw, ni zerh in bual sual um seh law khua thawngin khua nih thiang seh ti hna lai lo maw.
Vuipi nih cun “Duh Mang aw vung kir ko cang law” tiah a ti lengmang.
Duh Mang;- Duhte, duh bik cem vun țian cu; sia bang kan danhram har lo maw; tlangtlai vaca bang zuang ți sih.
Duh Mang cu inn ah kir duh hin loin vui sinah cun a um i vuipi nih cun “Vung kir cang ko law zei bang ti awk kan si ti lo cu ta” tiah a ti len nain Duh Mang nih cun a duh lo. Duh Mang cu vuipi keng cungah a cuang i vuipi nih cun fing le tlang kip cu lungleng ngaihchia mitthli he a hrawnpi lengmang. Duh Mang cu va phunkip awnh le tikhing thehreng awnh lawng lungleng ngaihchia in a theih lengmang. Cuticun saipi cu a lungleng ngaihchia in rawl ei lo le ti ding loin Duh Mang cu a ngai i a thi ve.
Ref:: Chin Tuanbia App
One Reply to “DUH MANG LE DAR DIN TUANBIA”