Zinghnam “Apuh” ih Thuanthu

2 min read

Zinghnam ‘Apuh’ ih Thuanthu

Himi thuanthu hi nauhak thuanthu dang pawl vek thotho cu a si. A thianghlim in duhnunnak thawn a khat. Cahmai tin in duh an nung. Cun, thuanthu cu zinghnam te pakhat ih thuhla in a thok. Zinghnam te ih hmin cu “Apuh” a si.

Apuh cu zinghnam te pakhat a si. Asinan a zam thei mi balloon pakhat a nei. Cui balloon hlum lengli te cu Apuh in a fehnak kip ah a keng. A ṭang ah a pom feufi ringring.

Zan khat cu a balloon te a hlo. Cumi zan cu zan khawthimpi lakah Apuh cu amahte lawng in a um a har zet. Balloon te a um nawn lo ruangah a riah a se zet. A mitthli tiang a tla.

“Apuh, ṭap hlah aw. Na balloon te cu kan va hawl tlang pei. Pakhat a hloh asilen pahra kan hawl sal ding.”

Mi pakhat in cutin a ṭong awn kha Apuh in a thei. Aw umnak lam a zoh tikah balloon sen te pahnih a hmu. Balloon sen te pahnih umnak a va pan tikah balloon si lo in, sumbuh pakhat ih mit an rak si. Sumbuh cu thingkung parah a rak fu.

Sumbuh cun Apuh a hruai ih balloon an hawl. A hlatnak hmun pakhat ah thil sen hlum tumpi pakhat an hmu. Cumi cu balloon a si pei maw?

Asinan a kiang nai an va thlen tikah an hawl mi balloon sen a rak si lo lala. Pangpar sen pawl umnak hmun a rak si. Pangpar lak ahcun laileng pahnih hi duhdawt aw zet in an rak um tlang ih, thaisun teh khuilam ah kan zuang ding timi an sutron aw rero.

Lailengpawl cu Apuh kiang ah an ra ih an ra hnem.

“Apuh, ṭap hlah aw. Na balloon sen te cu kan va hawl tlang pei. Pakhat a hloh asilen pahra kan hawl sal ding.”

Balloon hawl in an feh lala. Lamzin ih hmun pakhat ah strawberry umnak hmunpi pakhat an hmu. Strawberry rah sen pawl lakih zanriah ei rero kharkhem pathum khal an hmu. Kharkhem te pathum in Apuh cu an hnem.

“Balloon sen pakhat a hloh len a dang pahra kan hawl ding.”

Cuihnu ah a sen thluh mi rahpawl thawi’ khat apple kung pakhat an hmu lala. Apple kung parah pangang te pali an rak um. Pangang te pawl cun, “Balloon sen pakhat a hloh asilen a dang pahra kan hawl ding,” tiah Apuh an sim.

Cutin, an feh vivo hai.

Um hrih…. Kan vun siar ta pei.

Sumbuh pakhat, laileng pahnih, kharkhem te pathum, pangang pali an si. An zate kom in pahra an kim.

Apuh cun a balloon sen te a sung nan rualpi pahra a ngah sal.

Kan nunnak khal ah balloon sen te kan nei cio. Balloon sen te cun ziangkim a kawhhmuh.

Nauhak te pakhat in a ngainat mi lehnak cu amai’ balloon sen te a si. Pitling pakhat in a ngainat mi hnaṭuan cu amai’ balloon sen te a si. A mawi mi duhdawtnak khal balloon sen te a si. Na lenh-nak hlawnthil khal na hrangah balloon sen te a si. Zung hnaṭuan pakhat ih rank khal amai’ balloon sen te a si. Mino pakhat ih hnaṭuan thiamnak, tlinnak, nonalnak khal balloon sen te a si. Hramthok Tlawng na kai lai ih mathematics khal na balloon sen te a si. Lailak Tlawng na kai lai ih Physics khal na balloon sen te a si. Anderson a nauhak lai ih a thlum zet mi hla awn cu amai’ balloon sen te a si. Asinan cui’ balloon sen te cu kan hnen ihsin ziangtikah a hlo ding ti kan thei cio lo.

Balloon sen te a hloh tikah kan riah a se ding, kan beidong ding, kan tlu ding, kan thin a har ding. Cumi ah reipi thinhar a ṭul maw? Reipi beidong, tlu, riahsiat a ṭul maw?

Thingkung par ih fu sumbuh ih mit sen pawl in cumipawl fiang zet ih a hmuh thei ahcun kannih khal in fiang zet in kan hmu thei ve. Nauhakpawl in an hmuh fiang theinak ding ah kan kaihhruai a ṭul.

Balloon sen te a hloh tikah a dang balloon sen te pawl kan hawl thei. Sumbuh ih ṭong vekin, “Pakhat a hloh asile pahra kan hawl sal ding.” Laileng, kharkhem te, pangang te pawl khal in an sim ve: “Pakhat a hloh asilen a dang pahra kan hawl ding.”

Himi hi zum a theih mi suangtuah khawruahnak a si. A dik mi khawruahnak a si.

Anderson cu a dang a kuai ih, a aw a siat ruangah hlasakthiam ah a cangsuak lo. Asinan thuanthu ngantu canganthiam pakhat dinhmun in leitlun ah a hmin a thang thotho.

Hram: Mei Zi Han – Readers, No. 3, February, 2012 – translated by Nine Nine Sanay (from Nine Nine Sanay’s Facebook Wall)

Siang Lian Uk Kianghrol

4 Replies to “Zinghnam “Apuh” ih Thuanthu”

  1. I’m amazed, I must say. Rarely do I encounter
    a blog that’s equally educative and amusing, and
    let me tell you, you’ve hit the nail on the head. The issue is an issue that too few folks are speaking intelligently about.
    I’m very happy I stumbled across this in my search for something regarding this.

Leave a Reply