Zawng Panga Thuanthu

Zirhliahnak pakhat ah minungpawl in zawng panga kha hmun khat ah an kharhkhum. Cu thluh in kharhbawm tlunlam ah banhla bawr khat an thlai. Kharhbawm ahcun auto hmeh-rep (khaluk) pakhat khal an ret. Zawngpawl in banhla an va lak tum tinte’n tidai ih theh tuar ding in an tuah.

A hmaisabik ah zawng pakhat in banhla a va lak tum tikah tidai ih theh a tuar. Zawng dang hmuahhmuah khal an ciar phah thluh. Zawng dang pawl khal in an ti ve sinh. Asinan tidai ih theh an hlawh rero men. Curuangah zawngpawl cun banhla lak lo cun tidai in mi a theh lo ruangah banhla cu va la lo ding in an zate’n an lungkim tlang.

Lehhnu ah zirhliahtupawl in zawng pakhat an phorhsuak ih zawng dang pakhat thawn an thleng. (Zawng Sen ti bang sehla). Kharhbawm sung ih thun mi Zawng Sen cun banhla cu a hmuh vete’n va lak a tum. Asinan pakhatkhat in banhla lak an tum tinte’n tidai theh an tuar ti theitu zawng dang pawl ih vuak le velh a tuar. Zawng Sen cun vei tampi va lak a tum. Asinan lak a tum tinte’n vuak le velh a tuar ringring ruangah a netnak ahcun a beidong san. Curuangah zawng panga cu tidai theh an tuar nawn lo.

Zirhliahtupawl in zawng pakhat cu a thar pakhat thawn an thleng lala. (Zawng Buang ti bang sehla). Zawng Buang khal cun Zawng Sen vek thotho in, kharhbawm sung a thlen vete’n banhla cu va lak a tum. Asinan anih khal zawng dang pawl ih vuak le velh sawn a tuar. Zawng Sen khal vuak le velh a rak tuar ruangah, Zawng Buang an velh tikah a rak tel ve. Cutin Zawng Buang khal cun banhla lak cu a beidong san ve.

Cutin zirhliahtupawl cun zawng pakhat hnu pakhat phorh in a thar thawn an thleng vivo. A netnak ahcun zawng panga cu an zate’n a thar (a hmaisabik panga si lo) hlir ah an cang. Asinan zohman in banhla cu an va la ngam lo. Ziangruangah banhla lak a ṭha lo ti khal an thei cuang lo. An theih mi cu, a la tumtu cun velh a hlawh ding timi lawng a si.

Cutin, “Hlan Cindan” timi a ra suak.

Hlanlai ihsi um mi cin le dan hi talhton ih ruat lo cun sullam a nei lo thei.

Kannih teh banhla va lak tum asilen tidai theh ka tuar ding timi theitu zawng maw kan si?

Banhla ka lak tum asilen velh ka tuar ding timi theitu zawng sawn?

Himi thuanthu hi khawruahnaklam thil umtudan tahnak kalhmang khal ah an hmang ṭheu. Zuk ah zoh theih an si.