Harsatnak Ziangtin Kan Lanh Ding?

Vei khat ah thinlung rethei zet ih um mino pakhat cu mifim pakhat hnenah feh in a thinlung retheihnakpawl ziangtin a rehter thei ding tiah ruahnak a va dil. Cutikah mifim cun lakphak no pakhat sungah ci ṭham khat hrawng a thlak ih mino cu a inter.

“A thaw maw, ziang a bang?” tiah mifim cun a sut.

“Thaw lo tak si,” ti phah in mino cun a in mi cu a phut suak sal.

Mifim cu dimte’n a hni khukkho. Cuihnu ah mino cu ci ṭham khat ṭham ding in a fial ih a kiangnai ih um tidai fim riahriah tili tumpi umnak ah a hruai. Tili tumpi an thlen tikah mifimpa cun mino cu a ken mi ci ṭham khat kha tili sungah a thlahter. Cuihnu ah tili tumpi ih tidai cu a inter. Mino cun tampi a in khuatkho hnu ah, “Asile himi tidai teh a thaw maw?” tiah mifimpa cun a sut.

Mino cun, “A thaw lawlaw,” tiah a sawn.

“Ci al na tep ngah lai maw?” ti ih a sut bet tikah mino cun, “Tep ngah nawn lo,” tiah a sawn sal. Cutikah mifimpa cu mino ih kiang ah vung to in, a kut kai phah in hitin a sim:

“Nunnak ih kan ton mi retheih harsatnak, donhar beidonnak tivek hi mitu ih ci vek kha an si. Cui’ retheih harsatnak, donhar beidonnak pawl ih tam le mal cu an thleng aw dah lo. An pung sinsin cuang lo ih, an mal sinsin cuang fawn lo. An bangrep ringring. Asinan cui’ retheih harsatnak, donhar beidonnak kan donsonnak no ih tum le tet ih zir in boruak tampi a danglam thei. Curuangah tuihnu ahcun na nun ah retheih harsatnak, donhar beidonnak pawl na ton tikah na lanh theinak ding kalhmang cu a cang thei tawk in na lungput kha dikdawh ding ih tuah kha a si. Lakphak no pakhat va si aw hlah. Himi tili tumpi vek hi va si sawn aw.”

Siang Lian Uk Kianghrol