Vawmpi Le Zawngte

Kumkhat cu țhal can a sau tuk lawmmam i nikhua a sa tuk, tiva fate le cirhti hrekkhat pawl an kang thluh. Ramsa hrekkhat pawl tidai hawlah mangbangin an vak rero thlang. Curuangah nikhat cu vawmpi in cirhti pakhatah tikhur țhaten a huatih sunah cun zawngte a kil ter țheu. Amah cu hnațuanah a feh hlo ringring.

Nikhat cu Ngalcang cu tidai in ding a hmu nawn lo i a tihal mangbang cun a vaktawi vivo. Zawngte i umnak cirhti a va thleng. Tikhur sungah tidai tam nawn a hmu i “khawpten ka in ngah thlang ding” a ti i in a tum. Asinan zawngte cun “ka pu vawmpi i huahmi tikhur a si, in hlah aw” tin a rak dawn. Asinan Ngalcang cun “Vawmpi le pi lo ka thei lo, mi tihal thizik laiah” a ti i a in ciamco. Tidai a zaten a cem thluh.

Tawkfang khua a sim cun Vawmpi a hnațuannakin thabang le rilrawng tihal thawn a ra thleng. A tikhurah tidai a um nawn lo. “Zawngte khuiah ha ka tidai” tiah a sut. Zawngte cun “Ngalcangin a ra in thluh. Ka pu Vawmpi in zohmanh in ter hlah aw i ti tin ka sim rero nan Vawmpi le pi lo ka thei lo a ti i a in” tin a rak sim. Vawmpi cu a thin a ling i “zamrangin va ko aw” tiah Zawngte cu a fial. Zawngte khal cun Ngancang cu a va sim. Ngalcang a thlen veten “Ziangah ka tidai na rak in thluh” a ti i a rak zawn ciammam. Heh tiah an sual aw. An keu aw. Zawngte cu khatlamah a kat, tlunah a kai thul, hnui a țum thul. A pu Vawmpi le Ngalhriang sual aw cu a zoh i thinphang ti phah, zohnuam ti phah in a khir zok rero. An sual awknak a reituk thlang i an tha a bang. Zohman an neh aw thei nawn lo. Netabik ahcun an pahnihin an bang tuk lawmmam i an thi veve ta. Vawmpi le Ngalhriang an thih cun zawngte cun an ngalruh veve kha a lak. An ngalruh cu Phirivau ah hmangin nitin a phaw i hla a sak țheu.

“Zawi’ ruhte ring sawn maw,
Ka Pu Vawm i ka Pu Hriang i;
Ruhte ring sawn maw?”

A ti i a tikhur kiangah cun nitin hla sakin a pu Vawm i tikhur cu a mahin a run co ta.

Cutiih a hlasak awn kha Leisarual pawlin an thei i mawi le țha an tituk lawmmam ruangah zawngte hnenah cun an feh i an va dil. Asinan Zawngte in a siang lo. A phunphun in lei ding khalin an dil nan ka pu Vawm le ka Pu Hriang i ro ka lakmi asi i ziangtilam hmanin ka siang lo a ti. Nikhat cu Leisarual pawl cu Zawngte hnenah an ra leng sal. Zawngte i duhbikmi rawl a phunphun an rak keng. Zawngte cu rawl an do i puar zetin an pek. Rawl a puar tuk thlang i zianghmanh a theih thei nawn loin a it that hluahhlo men. Cutiih a ihthat sungah fangtlawr buhin a mit kha a khatlam a khatlam pit koin an erh sak. A phirivau te cu an lak sak i an tlanhloh pi.

Zawngte cu a hung țhangharh i thawmvang dang ziang hman a thei nawn lo. Ka phirivau ka hawl ding a ti i a mit a pit fawn i zianghmanh a hmu thei nawnlo. Awlawksawng vansangin a um. Leisarual pawlin an bum ngah riai. A phirivau an lak sak ti a thei. Asinan ti ngaihnak dang zianghmanh a thei lo. A mit cu a nuai rero nan a car deuhdeuh men i a pit sinsin. Cutiih a um laiah a hmuansakin vanimin “Um.m.m” tiah a vung ai rero. Zawngte cu “keimah hman ka vansan laiah ka hmuansak i ai rero cu zoha na si?” a hun ti. Vanim khal cun nangmah rung lo bawm dingah ka rung i na duh lo awkah ka tlanhlo sawn pei cu a ti zuan hloh a tum. Zawngte khal cun amah bawm ding ti a theih cun a lungawi in Vanim kha ka mit a pit thluh, tlan hramhram aw hlah, i rung bawm aw tin zângfah a dil sal.

Vanim cu Zawngte i ihnak ahcun a vung lutih a mit pit iar-iar in a vung hmu. Zawngte cun ka rual Vanim Leisa rual pawlin hitin in tuah ta. Ka phirivau khal an lakih an tlanhlo pi. Ka mit len in erh pit fawn. I bawm aw a ti. Vanim khal cun ka lo bawm ding a ti i a mit an erhnak fangtlawr buh hnang cu a cuk sak.:-

“Cuk pe peuh,
Cuk pe peuh,
Nim cuamcuam hman ka cuh-ah,
Thlai relrel hman ka cuh-ah,
Cuk pe peuh”

a ti i a mit khatlam cu a hun hmu thei.

Hmasa vek cun a cuk sal lala i a khatlam khal a hung vang sal lala. A mit khua a hmuh thei cun a phirivau cu a hawl rero nan khuihmanhah a hmu nawn lo. Leisarual pawlin an lak hloih annih khalin nitinin an tum rero țheu. Hla an sak i nuam ngaingaiin an um men. Zawngte cun lak sal theinak ding a ruat ban lo.

A phirivau tum thawng cu nitinin a thei i a ngai ringring țheu. Vanim hnenah a fehih bawmnak a va dil. Vanim khal cun ka lo bawm ding a ti i Leisarual pawl hnenah cun an va feh. Leisarual pawl cu an phirivautum sak dingin an vung dil nan, na tlan hloh pi pang ding an ti i an rak siang lo. Asinan nan tualrawn ah in kil uh la ka tum ding a ti. Tualrawn ahcun a va tum. Vanim cun phirivau cu:-

“Zawi’ ruhte ring sawn maw?
Ka Pu Vawm i ka Pu Hriang i,
Ruhte ring sawn maw?
Tu tu veuveu”

a ti i tualrawn ahcun lam phahin a tum.

Leisarual pawl khal cun ngainuam an ti i an zoh cuahco men. Vanim cun tlanpi a thinlung nan an kil ringring ruangah a tlanpi thei lo.
Netabik ahcun zautlang parin in tum ter uh. Tualrawn cu a thang hla thei lo aw. Midang khalin rak thei hngai seh a ti hngai. Asinan Leisarual pawlin an siang lo. Na zuan hloh pi pang ding an ti. Vanim khal cun zuan hlohpi ding nan phan asi le ka mei-in in kai uhla ka zuang thei lo ding a ti hngai. Cutin Vanim mei cu an kai i a phirivau te cu a tum phah i zautlang parah cun a her i a lam phah rero. Cutiih a tum phah cun a tha hmuahhmuah a suah thluh i zuan khatah a hung zuang. Leisarual pawl cun Vanim mei i an kaih hnget tuk ruangah a zuan zawngah a mei hramin a phawng i Vanim mei cu tutiang a rung bul lan ta.

Zawngte cun phirivau te cu ziangtikah a ra thleng sal ding ti hngakin a rual Vanim kha a rak hngak ringring. Vanim cun a rual Zawngte i phirivau te cu a vun zuanpi i a vun pek. Zawngte khal cui si cun a lung a awi nasa. Zianghman ngai nawn loin nitinin:-

“Zawi’ ruhte ring sawn maw?
Ka Pu Vawm i ka Pu Hriang i,
Ruhte ring sawn maw?
Tu tu veuveu”
a ti i hlasakin a nuam țheu.

Reference :: Thuanthu Roling Cabu
Salai Pa Sang