UNAU PAHNIH ( Tuanphung )

2 min read

UNAU PAHNIH

A hlan lioah unau pahnih an rak um an ti. Voi khat cu a u nih, “ ka nau lo kan kal lai,” a ti, a nau nih cun a u nu cu a zulh. Chun ni linh salingpi ah “ka nau a lin tuk zil kan kawl lai” a ti I zil cu an kawl. A nau nu nih cun zil saisen kho a hmuh I a u tu nih cun zil bing kirhte khi a hei hmuh. “Ka nau zil ka cheu rih” tiah a hal lengmang I a nau nu nih cun a siang ti lo. “Ka nau, na zil na ka cheu lo ahcun chungtlung kaa senghter lai,” a ti. A naunu nih cun “na duh le I senghter ko,” a hei ti. A unu nih cun ”chuntlung aw mi seng, miseng, ka naunu nih zil a ka cheu duh lo,” a hei ti I a kerek tiang a pil. “ Ka nau, ka cheu cang, ka keret tiang a pil cang hih,” a ti. A nau nu nih cun “chungtlung aw mi seng, mi seng, ka naunu nih a zil saisen a ka cheu duh lo,” a ti. Chuntlung nih cun a khup tiang a hei sengh. “ ka nau, rak ka cheu ko, ka khup tiang a pil cang hih,” a hei ti. A naunu nih cun a cheu hlei lo. “Chuntlung aw mi seng, mi seng, ka nau nu nih zil saisen a ka cheu duh lo,” a ti than. Chuntlung nih cun a tai tiang a phum cang, “ Ka nau, hung ka cheu cang,” a hei ti rih I tlawmpal te khi a hei cheuh. “ Ka nau, ka cheu rih,” a ti than, A nau nih cun a cheu siang ti lo. A unu nih cun “Chuntlung aw mi seng, mi seng, ka nau nu nih zil saisena ka cheu duh lo,” a hei ti tthan, Chuntlung nih cun a thin tiang ahei dolh, “ Ka nau, na zil ka cheu,” a ti rih. A naunih cun a cheu siang lo. A unu nih cun “ Chuntlung aw mi seng, mi seng,” a ti than I a hngawng tiang a dolh cang. “ ka nau, ka cheu ko” a ti than rih nain a siang hlei lo. Chuntlung cu a auh tthan I a khabe tiang a dolh cang. “ Ka nau , rak ka cheu cang” a ti. A nau nih cun a hei cheuh tthan. A unu I za hlei hlah, a von hal tthan. A naunu nih cun zil saisen a ka cheu duh lo” a ti I a cal tiang a pil cang, a naunu cu aa chirtuk I a sam in a dawh len cu a ngah ti lo. Chungtlung pi nih cun a dolh dih. A naunu cu a lunglen in a ttap zungzal. Voikhat cu a ttat lioah a cung in vaca an rak zuang. A nau nute nih cun “ ka cung I vaca zuang… zuang, ka u Ngun Nu nan hmu lo maw” a hei ti. Vaca nih cun “ a hmuh cu kan hmuh nain thlang ah thlang ah naa ek caw ek a thai lio ee” an ti. A dang run khat an rat than I ka cung I vaca zuang…zuang, ka u Ngun Nu nan hmu lo maw” a hei tit than. “ A hmuh cu kan hmuh nain thlang ah, thlang ah naa ek caw ek a thai lio” an hei ti. A unu nih cun, “ Ei cu…ka nau awte a lo ko e” a hei ti. A nau nih cun cu ti tthiamtthiam in cun a hei ti I a unu nih cun a va kal hnawh I a unu nih cun “khah ka nau, ka thla in kan phoih lai I kan umnak lei ah kan zuang lai, kan zuan pah I ti vapi na hmuh ah cun ei cu tiva te cu na ti lai. Tiva te na hmuh ahcun ei cu tiva pi cu na ti lai” tiah a ti. A u chimh ningte in cun tiva pi a hmuh caan ah a thin a phang I, ei a cu tiva te cu a von ti. Tiva te a hmuh caan ah, ei a cu tiva pi cu a hei ti. Sau nawn an zuan lio ah a thin a phang tuk I ei tiva pi a ti sual I tiva chungin cun an von chuah I a unu a hawi le pawl kha an thla pakhat cio in a hal hna I cuticun an bunh I nuam ngai ti an leng, an ti.

Leave a Reply