THAN CER LE MAN BO TUANBIA

6 min read

Than Cer le Man Bo Tuanbia

Nu va an um i fanu pakhat an ngei. A min ah Than Cer a si. Lo ah an kal tawn. Lo in an hung tlun ah a pa nih Than Cer cu meiluah a fial. Than Cer cu an innpa nuhmeinu inn ah a va kal. “Ka pi, mei kan luak” tiah a hei ti. “Na pa he kan i umta lo ahcun” tiah a hei ti. Than Cer cu a pa sinah a vat li i “Na pa he kan i um lo ah cun a ti” tiah a pa cu a chimh. “Kan i um ko lai a ti tiah vung ti ko” tiah a ti. A va kal than i “Kan i um lai a ti” tiah a va chimh hnuah mei cu a hun luahter. Zanriah ei khawh in nuhmeinu le a fanu Man Bo cu an thilri he an hung i pok. Than Cer pa nih cun zei ti tuah awk a hngal ve lo i a nupi ah aa tuah ve ko.

Nikhat cu Than Cer nu le pa cu tiva ah an kal. Nga an tlaihmi paoh cu “Than Cer caah” tiah a ti lengmang. A vapa nih cun a ing kho cawk ti lo i “Nga tleihmi poh Than Cer ca ti lengmang” tiah namtong in tuk a zalh. Cu hnu ah cun a nupi cu ti chungah lo ko a pil i lim ah ai cang.

Than Cer cu a nuei nih a huat tuk i rian hrang lawngte a t’uanter hleiah tuksop cangngai lawngte a eiter. Man Bo tu cu a dawttuk i riant’uan loin rawl thawthaw lawngte a pek. Cu tikah cun Than Cer cu a rawl t’am le a retheih a celh lo i tiva ah a kal tawn  “Ka nu, ka nu” tiah a t’ap tawn. A t’ah thawng a hun theih cun a nu cu a hung chuak i rawl thawthaw a pek tawn. Man Bo nu nih cun Than Cer hi khuazei rawl dah a ei hnga, hi tluk thau liaarluar in a um. Na fanu rawl a petu na thah lo ah cun ka kal lai tiah a vapa cu a ti.

Ni khat cu Than Cer kalnak cu a pa nih a thlite in a zulh. Tiva kam i a nu nih rawl a pekmi cu a hmuh. A thaizing ah a pa nih Than Cer cu tiva ah a kalpi. “Than Cer na auh tawn in hei au” tiah a ti. “Ka pa zeihmanh ka au bal lo” tiah a hun ti. “Au ko na uah lo ahcun kan thah lai” tiah a namtong in a dir awnh. Zei ti awk a hngal lo I “Ka nu, ka nu ka pa nih” a hun ti ah, “T’ha tein au thah maw na duh” tiah a nam har in tuk a hun timh. “Ka nu, ka nu rung chuak” tiah ngeihchiate in a nu cu a hun auh. Limpi cu tikam ah a hung chuah vial ah khin nam in tan thum ah a chuah.

Inn ah a sa cu a phurh dihi Than Cer an chumhter. “Ka nu na zei dah hmincang” tiah Than Cer nih a hal. “Ka fa, ka ke hmin cang” tiah a hun ti. “Ka nu na zei dah hmin cang” tiah a hun ti than. “Ka fa, ka paw hmin cang” tiah a nu nih cun ahun ti. “Ka nu na zei hmin cang” tiah a hun ti than. “Ka fa, ka lu hmin cang. Khah ka sa hun ei lai ci, ka ruh vialte hi hun khawm dih law tiva kamah hun phum te. Ni thumnak ni ah changvut dil sarih he hun veng te” tiah a chimhtak.

“Sa a hmin cang” tiah a chimh hna i rawl an ei. Than Cer cu a ruh lawng te an phawt. Than Cer nih cun a ruh lak i a tit tlawm tete a ummi cu a khoih i inntang awng ah a thlak dih. Arkhongpa nih “Titididi, Than Cer nih a satit hlumpi a ka thlak i a thaw hngin” tiah a ti. A pa nih, “Than Cer zeicadah satit hlum cu kawmtang ah an thalk” tiah thinkamang in a hun ti. “Ai ka thla nemmam lo arkhong cu a lih a si ko cu” tiah a hun ti. Rawl an khim dih cun a ruh vialte cu a khamh dih i tiva kamah a phum. Ni thumnak ni ah changvut dil sarih he a va ven tikah t’hihlawm, saka. Ngun lawngka, t’hirual,ngun kuthrolh ah ai cang dih.

Than Cer nih cun a t’hihlawm cu ai venh tawn. Man Bo nih a hlan tikah a sianh lo. Man Bo nu nih Than Cer cu “Na nau hlan ve” tiah a kingh a vuak. Cu tikah Man Bo nih cun ai hlan ve tawn. Asinain Man Bo i ai venh ah cun leitlak ah ai cang dih i ai dawh lo. Than Cer i ai venh tu ah cun ai dawh t’han t’hiamt’hiam.

An khua pawng khua ramuk bawi fapa A Lal nih Than Cer cu thit dingin a hal. Asinain a nuei le a pa nih Man Bo cu Than Cer thuam in thuamh i A Lal sinah kalter dingin an timh. “Kei cu va ka ngei lai, a dun nih t’him kiak sio kiak hung ka t’hen u” tiah a au i khua akah Man Bo cu ai chok uar. Than Cer cu Man Bo thlahtu ah an kalter. An khua an phak laiah Than Cer nih Man Bo cu “Nangmah maw an t’hitmi na si” tiah a ti i a thilhlawn hlanmi cu a lak dih, a kingh a vuak i Man Bo cu an khua leiah a t’ah buin a kir. Man Bo nu le pa cu an thinhun ti awk a t’ha lo. Than Cer cu kan thah lo ah maw kan duh hnga tiah a cer in an i cer.

“Than Cer kha e a pa a thi e hung tlung seh law” tiah an hlen i bia an cah. Tisa khap kua in an sat.Than Cer cu a pa ruak humh ah a hung tlung. Kawmtang ah a nuei nih thil char a fial. Kawmtang a luh lioah titlok in an toih i a thi. A hnuk um an hleh I huaka thingkung cungah an thlai. Man Bo cu Than Cer thuam in an thuam i A Lal sinah an kalter. A Lal le a sal le nih cun Than Cer a si lo ti an hngalh ko nain zei ti awk hngalh lo ah an umter ve ko. A Lal nih, “Than Cer thiam va tak” tiah a ti. Thiamtah cu a thiamlo nain ai awh ve i “puh suk puh suk” tiah a ti i thiamtleng cu a hei khawn tlurtler.

Than Cer hnuk-um cu langakpa nih a lak I a bu ah a zuanpi. A camh i Than Cer cu a nung t’han. Langak pa nih a fa a umter. Langakpa cu rawl hawl ah a kal tawn. Than Cer cu langakpa fa ai puak I hla thawn nau a awi tawn.

‘A hlanah cun, a hlanah cun A Lal nupi k arak si; Atu ah cun ka pu langakpa fa ka um lio’ tiah hla a sa tawn.

Ni khat cu A Lal sal le pawl ramlak an vah lioah a hlasakmi cu pakhatpa te nih a hun theih. “Aih, ngai tuah hmanh u, cu a hlasakmi cu” tiah a hlawile cu a ti hna.

‘A hlanah cun, a hlanah cun A Lal nupi ka rak si; Atu ah cun ka pu langakpa fa ka um lio’ tiah a hlasak cu an hun theih t’han. Rianrang in an bawipa cu an chimh. A salle cu, “rianrang in vung la u” tiah a ti hna i an va kal hnawh. Langakpa umnak thingkung cungah cun an hei zoh i “Ka pu langakpa, kan pi kan hung la” tiah an hei ti. Langakpa nih cun “Hnapkhar keuku khat, meihawl tlangrel khat nan hun put ahcun na lak ko lai” tiah a hun ti hna.

A salle rual cu inn ah an kir I khuapi hnap kher an khoih i keuku khat le meihol tlangrel khat cu an phurh. Langakpa cu an pek i Than Cer cu inn ah an tlunpi.

A Lal le a salle rual nih, “Nihin cu Than Cer le Man Bo an i tu lai” tiah an ti i buh thawthaw le sa thawthaw an eiter hna. Arti an dinh hna. Man Bo cu thilchia hru an hrukter. Thing nam an puter. Than Cer cu thilthuam t’hat’ha an thuamh. A chah khawh chungin puanbu an aih chih. Nam har zirziar an putter. “Man Bo ka tu ka tu, chawlkung” tiah Than Cer nih a hun ti. Man Bo nih cun a hun tuk len nain thing nam nih cun a tei naisai lo I a zei a poi lo. “Than Cer ka tu, ka tu tlam suai” tiah Man Bo nih a hun ti. Than Cer nih cunt lam suaimai in a hun tuk. Man Bo cu A Lal salle nih a sa an can i umpu chungah an thutter. A thut pah dengah khin a salle nih a nule sinah an phurh.

“Man Bo vapa nih sathu an kuat hna” tiah inn chungah an t’umh i A Lal salle cu an khua ah an kir than. A Lal nih a inn hlei pelh dingin a tuah i uitum a tangah a hren.

Man Bo nu le pa cu umpu kau an I ngeihngai. Man Bo nu nih umpu cu a hun kau I sathu cu a hun suah I rawl he an I meh. A hun suah t’han I kutdong a hun hmuh. “Man Bo kutpi ko dah a lawh” tiah a nu nih a hun ti. “Ei ko, zei Man Bo kut va si hlah” tiah a vapa nih savo tuhpah in a hun ti. A hun suah t’han I a kedong a hun chuah. “Man Bo kepi ko dah a lawh” tiah a hun ti t’han. “Hnasen tla loin, hna na chet, ei ko zei Man Bo kepi dah a si lai” tiah a vapa nih cun a hun rak len. A hnubik ah a lupi cu a hun chuah I Man Bo lupi cu a si ko. “Ka fanu Man Bo pei a si ko hi; Man Bo an thah ko hi teh” tiah an thin hun in an I hram sek I an t’ap an ai. A nuva in A Lal te khua leiah cun hnawhchih namcahm in an kal. A Lal salle nih khua pawng in an rak pawh I Man Bo pa cu li le cantiang in ril ko an kah. Man Bo nu cu A Lal inn leiah a tli uahmah I hlei a hun kai. Hlei nih cun a pelhpi I a tla. Cu ah cun uitum nih a rak seh I ai tiau sek len. A ruak zong phum loin hau lengah an hlonh. Than Cer le a vapa cu nuam tein an um ii bawite an bawi, khuang an cawi.

Ref:: Chin Tuanbia App

3 Replies to “THAN CER LE MAN BO TUANBIA”

Leave a Reply to Anonymous Cancel reply