Rialno Thawn Thubuai Cinfelnak

1 min read

Rialno Thawn Thubuai Cinfelnak

Cazir pindan (class) pakhat ah zirhtu a ra lut. Tlawngtapawl hmai ah rialno (glass) pakhat sungah tidai a thun ih, rialno thlir phah in hitin a sim:

“Tlawngtapawl, himi rialno hi minute khat cekci ka thlir ding. A sung ih tidai ziang a cang ding?”

“Zianghman a cang lo ding, Zirhtu”

“Aw, si ko. Asile himi thotho hi minute 15 sung ka thlir ding. Tidai ziang a cang ding?”

“Zianghman a cang lo ding, Zirhtu”

“Na kut cu a kham tengteng ding, Zirhtu” tiah tlawngta pakhat a sim bet tikah an zate’n an hni vualvo.

“Cuti asile nazi 24 sung rori ka thlir ding. Ziang a cang ding?”

“A khamtuk ruangah zianghman tuah thei nawn lo na kut kha zato ih kan fehpi cu a ṭul rori ding, Zirhtu” tiah tlawngta cun a son tikah an zate’n an hni vualvo lala.

Cutikah zirhtu cun hitin a sim hai:

“Si. Rialno sung ih tidai cu ziangvek dinhmun khal ah a thleng aw cuang lo. A thlirtu kut sawn kha can a reidan ih zir in a kham vivo. Kut kham ding ih tuahtu khal zo dang hman an si lo. Kanmah lala kan si.”

“Hitivek a si ko.”

“Minung hin kan nunnak ah harsatnak, buainak kan nei cio. Cui’ harsatnak le buainak pawl kan ton tikah thlir (khai) ringring pang hlah. Na thlir rei deuhdeuh, na khai rei deuhdeuh, na thluak sungih na ret rei deuhdeuh asilen na hrangah a ṭha lo deuhdeuh.”

“Harsatnak le buainak pawl kha anmah le an can te ah ruat aw, cingfel aw. Can dang ahcun na nun kha na hmandan zaran in hman tum aw. Thinlung retheihnakpawl phurh le ken ringring an ṭul lo. Donharnak hlon hlo in nan nun ah a ṭhabik ih nan feh thei ka beisei.”

Sirhsan: Aung Kham (Yoyarlay) – “Rialno thawn Thubuai Cinfel Tikah”

Siang Lian Uk Kianghrol

5 Replies to “Rialno Thawn Thubuai Cinfelnak”

Leave a Reply