NGUNNU LE A NAU TUANBIA

Ngunnu le A Nau Tuanbia

A hlan lio ah Ngunnu le a nau an rak um. Voikhat cu Ngunnu nih, “Ka nau, lo kan kal lai” a ti i a nau he cun lo an kal. Chun ni linh silingpi ah khin, “Ka nau a lin tuk, zil kan kawl lai” a ti i zil cu an kawl. A nau nu nih zil Sairang a hmuh i a u tu nih cun zil a kermite lawng a hmuh. A u nu nih a zil cu a ei i a dih colh.

A nau nu zil sairangte cu a zoh i a mit a thi tuk. “Ka nau, na zil ka cheu ve” tiah a hal. A nau nih cun a siang lo. “Ka nau, na zil na ka cheuh lo ahcun chuntlung maseng ah ka pil lai” a ti. A nau nu nih cun, “Na duh le i sengter ko” a ti i a u nu nih cun “Chunthlung aw, ka seng, ka seng, ka nau nu nih zil a ka cheu duh lo e, ka seng, ka seng” a ti i a kerek tiang a sengh. “Ka nau, ka cheu cang, ka kerek tiang a pil cang hih” tiah a nau nu cu a ti. A nau nih cun a siang hlei lo. A u nih cun, “Chungtlung aw, ka seng, ka seng, ka naunu nih zil sairang a ka cheu duh lo e ka seng, ka seng” a ti țhan. Chungtlung nih cun a khuk tiang a hun sengh. “Ka nau, ra ka cheu ko, ka khuk tiang a pil cang hih” a ti țhan. Asinan a nau nu nih cun a cheu siang hlei lo.

“Chungtlung aw, ka seng, ka seng. ka nau nu nih zil sairang a ka cheu duh lo ee ka seng, ka seng” a ti țhan. Chungtlung nih cun a tai tiang a phum cang. “Ka nau, rak ka cheu cang” a ti i tlawmpalte khi a hei cheuh. “Ka nau ka cheu rih” a ti țhan. A nau nih cun a cheu siang ti lo. A u nu nih cun “Chungtlung aw, ka seng, ka seng, ka nau nu nih zil sairang a ka cheu duh lo ee, ka seng , ka seng” a ti țhan. Chungtlung nih cun a thin tiang a sengh țhan. “Ka nau, na zilte cu ka cheu ko mu” a ti. A nau nih cun a cheu siang hlei lo.

A u nu ih cun, “Chungtlung aw, ka seng, ka seng” a ti țhan i a hngawng tiang a dolh cang. “Ka nau, ka cheu ko” a ti nain a siang hlei lo. Chungtlung cu a auh țhan i a khebe tiang a dolh. “Ka nau, rak ka cheu cang” a ti i a nau nih cun a pelte a hei cheuh țhan. A unu cu a za hlei lo, a vun hal țhan. A naunu nih cun a siang ti lo. “Chungtlung aw, ka seng, ka seng, ka nau nih zil sairang a ka cheu duh lo ee, ka seng, ka seng” a ti i a pumpuluk in chungtlung nih a sengh dih i vawlei chungah a pil. A nau nu cu aa ngaichin tuk i a lunglen in a țap zungzal.

Voikhat cu a țah lio ah a cung in vaca an ra zuang. A nau nute nih cun,“Ka cung i vaca zuang ka u Ngunnu nan hmu lo maw?” a hei ti hna. Vaca run nih cun, “A hmuh cu kan hmu nain thlang ah Caw-ek, Naa-ek a thai lio ee” an ti. A dang run khat an ra țhan i, “Ka cung i vaca zuang, ka u Ngunnu nan hmu lo maw?” a hun ti țhan hna. “A hmuh cu kan hmu nain thlang ah Caw-ek, Naa-ek a thai lio ee” an run ti. Tlawmpal ah vaca run dang an ra țhan. “Ka cung i vaca zuang, ka u Ngunnu nan hmu lo maw?” tiah a auh țhan hna. Cu vial ahcun “Ei! ka nau awte a lo ko ee” a ti i tangah an run ning in an țum.

Ngunnu nih cun a hawile pawl kha, “Nan thla phawi cio ulaw ka nau hi thla kan bunh lai” a ti hna. An thla an phawi cio i Ngunu a nau cu an bunhter i an zuan pi. A u nu nih cun, “Khah, ka nau, kan thla kan pharh lai i kan umnak lei ah kan zuang lai, kan zuan pah i tivapi na hmuh ahcun ei, cu tivate cu na ti lai. Tivate na hmuh ahcun, ei cu tivapi cu na ti lai” tiah bia a cah. A u chimningte in tivapi a hmuh caan ah a thin a phan i, “Ei! a cu tiva te cu” a vun ti. Tivate a hmuh caan ah, “Ei! a cu tiva pi cu” a ti.

Sau nawn an zuan ah khin a U chimhmi kha a philh i tiva pi cung i an zuan lio ah a thin a phang tuk i, “Ei! Cu tiva pi cu” a ti sual i tiva chungah cun a tla i ngapi nih a rak dolh.

Laknak :: Laiholh Tuanbia App