Lungto Khawltu Vate

Vate pakhat a rak um. Cui vate ih danglamnak cu lungto fate pawl a khawlkhawm ṭheu mi a si. Ni tinte’n zinglam ah a bu suahsan vete’n rawl hawl hmaisa lo in lungto fate pawl a hawl hmaisa ṭheu. Lungto fate pawl cu a dam sung ih a tonteh mi thil sia le ṭha pawl cingkeng mangsuak sal tertu ding ah a khawl mi an si.

Cui’ a khawlkhawm mi lungto pawl cu pakhat tetei’ siar phah in a nun liam cia ih thilthlengpawl a ruat sal ṭheu. Curuangah amahte’n hni thul, ṭap thul in a um. Cutin ni tintei’ lungto a khawl tikah a rei cun a bu ah lungto an khat thlang. Ni khat sung ih a siar suah ding mi lungto zat khal an tam vivo ih, can a awh rei vivo. Cui’ vate lungruh cun a rilrawn khal poisa lo in lungto cu a siar thotho. Curuangah ni khat cu rilrawng ṭamsawl tuar lo in a thi. A mansuah sal ṭheu mi tontehnakpawl khal ah hnihnak hnak in ṭahnak an tamsawn ruangah, a dam lai khal ah riahse zet in a rak nungtu a si.

Zirhmi:

Minung nunnak khal ah cuvek thotho a si. A liam zo, a cem zo mi tontehnak siava ihsin zirsuah ding cu a si. Asinan sirawknak, nomnak, riahsiatnak tivek thinlung tontuarnak cu ken (thiar) vivo ṭha an si lo. Mi tin in kan nunnak ah thil dik lo kan tuah ngah dah thluh. Thil dik khal kan tuah ngah. Nomnak khal kan tong. Riahsiatnak khal kan hmaton. Cuvekpawl vun ruat ih sirawknak cun thin a thengter. Nomnak vun ruat ih ngah sal duhnak cu duhamnak lungput suaktertu a si. Riahsiatnak vun ruat sal khal riahsiatnak a thuah aw tamter. Dam sung hi a tawi zet. Curuangah a liam zo mi vun tuar simaw, duhamnak thawi’ hmailam can thlir rero hnak in, tui can ah a ṭha theibik ih nun hi thil ṭhabik a si.

Sirhsan: Aung Kham (Yoyarlay) – Lungto Khawltu Vate

zuk:neitu ta
Siang Lian Uk Kianghrol