Pa Lo

Hlan laiah khua pakhat a rak um. An khuabawipa in fanu fala mawite duhaw zet a nei. Ni tin tein zanthing a phur ṭheu. Nikhat cu Van Patarpa in a thing phurhnak cirhti kiang lungto parah sunhlu rah pumthum a ret. Cui sunhlu rah ahcun a mipa sinak ti (a bua) a hnih. Falanu in a hmuh ih, “Van ṭhat”, a ti ih tidai thawn a in ih manhla a ti ngaingai. Fala nu cu nau a pai. A nu le a pa in zo ih fa so na pai ti in an sut rero nain, “Tlangval ka nei lo. Mipa thawn kan pawlaw lo,” a ti ringring. A nu le a pa cu an khawruah a har ngaingai. Zankhat cu a pa in mang lamdang zet a man. A mang ahcun Van Patarpa in, “Nan fanu ih naupai hi mangbang rero hlah uh. Thing a phurh ṭheunak cirhti kiangah ka mipati rawimi sunhlu ka retmi a ei ruangah nau a pai. Keimai fa a si. Fapa a hring dingih a hmin ah ‘PA LO’ nan sak pei,” a ti. A caan a kim tikah falanu cun fapa a hring ngaingai ih van Patarpa ih sim bangtukin a hmin ah PA LO an sak.

Pa Lo cu a ṭhang vivo ih tualleng nauhak a si thlang. A pi le pu cun Pa Lo hi leimi pa nei lo ngaingai a si pei maw, a pa kan hawlter ding an ti. A khawpi le innhnen khua pawl hnenah, “Pa Lo in a pa a hawl ding. Tlangval le pacang hmuahhmuah nan suak pei,” ti in an cah ṭheh. Kum kim mipa tampi an suakkhawm. Lai daan tein Pa Lo cu a vorh lamah Zuhai, a keh lamah Sasem an kenter ih, “Napa na hawl pei ih Khawzing in a lo sim ding, Zuhai na pek pei ih a kiangih tomi kha sasem na pek pei,” an ti. Pa Lo in a pa a hawl na in a tong lo. Cui si’n a pi le a pu khal in van Patarpa ih fa ngaingai a si ti in an zum ih an nemhnget.

Pa Lo cu a ṭhang vivo ih kawi (kaileng) kah thei a si thlang. A rualpi cu kawi an nei na in a nih a nei ve lo. A nui’ hnenah,“ka nu, ka rualpi kawi an nei nain kei ka nei lo. I pe ve aw,” ti in a dil. A nu in, “Disap thla hnuai-ah vantau in, ‘Ka pa e… kawi i run thlak aw law,’ ti in va au aw,” a ti. A va au ngaingai ih a pa in kawi ṭha ngaingai a run thlak. Cucun rualpi lakah a lek ve ih thiambik a cang. Rualpi kawi tla a kahkuaisak ṭheh. Pa Lo cu an mitkem tuk ih, “Pa Lo ti ni reh lo, na pai’ khua ah tlung aw,” an ti. Na pai’ khua ah tlung aw an ti cu a thin a nuam lo tuk ih a nu a sim. A nu in “Pate, a poi lo. Ngai men aw. Thin sau tein tuar aw. Nehtu si a ṭha sawn,” a ti. Cu vek thotho in Pa Lo cu saihli a hmang thei thlang. A pa a dil ih a pa in a peek. Vate a sai thei tuk ih a rualpi in, “Pa Lo ti ni reh lo, na pai’ khua ah tlung aw,” an ti lala. Sa dawi thei a si ih a pai’ hnenah meithal a dil lala. A pa in meithal a pek. Sa a kaap thei tuk. A khawpi pawl in an iksik ngaingai. Sacang nam laiah meithal a puak. Zo si maw a kaap an ti tin tein ‘Pa Lo in a kaap,’ an ti. Pa Lo a si le a salu rak long uh, an ti ih a salu an lon ṭheu ruangah tlangzam sa lawng a phur ṭheu. A riah a sia ngaingai. A rei tikah a nu in, “Pa Lo, hi zat ram na tawi ih sa pakhat tal in an lo suah lo maw?” ti in a suut. Pa Lo cu a ning a haang tukih a ṭap. “Ka nu, ka kaap ringring na in ka salu in lon ruangah a si,” a ti. A nu in, “Tu cu an lo lon zik le na saruang parah to in na meithal mawn kau awla, ‘a ngamngam in i long uh. I longtu cu ka lo kaap ding, ti awla an lo long ngam lo ding,” ti in a cah ta. Cui hnu cu a nui tiam vekin a tuah ih an long ngam nawn lo. Sa tampi a kap ih a pui inn cu salu in a kulh panlo maw.

Nikhat cu Pa Lo in a nui hnenah, “Kanu, ka pai hnenih tlun ka duh thlang,” tiah a dil. A nu in a hniksak. An tual khat in Nimte fanghum a bur. “Hinah velthum bah lo tein na tlan suak thei le na tlung pei,” tiah a ti. Cak ngaingai in bah lo tein velthum a tlan thei. Cu cun a nu in a rinsan ih a pai’ hnen fehdan ding a sim thlang. A nu in, “Kawi mu pakhat in la awla Tikuang thli ah tuh aw. Cule hi tiin thlacam aw. “Ka pai’ hnen ka thleng ding a si len e….. zankhat ah van baan aw law”, ti in a ti. A tuah ngaingai ih zankhat ah van a baan. Cutikah a pa in ka fapa a ra tlung ding ti a rak thei. Cu laifang cu a pai’ khuami pawl Eril ral in a thah laifang a si. A pa in a khawpi pawl hnenah, “Pa Lo a ra ding. Zohman in Eril ral thu nan sim lo pei,” ti in a tiam ṭheh. Pa Lo cu a pai’ hnen a va thleng ngaingai. A pa a lung a awi tuk. Pa Lo cu an khua a haal. Thlan tam tuk a hmu. A mang a bang ngaingai. A sut vivo, zohman in an sim ngam lo. Nuhmei nu, a pai’ tiamngah lo nu in a sim. Cui’ siin Pa Lo cu Eril tei’ khua ah a feh. Eril pa in, “Pa Lo in Eril a that pang ding,” ti phan ruangah inn sungah Eril cu suak lo dingin a kharhkhum. Sun ṭhing ah Pa Lo cu Eril tei’ inn ah a feh. Eril a relh ti a thei. An inn leng zialpi a phelh duup ih kaan par in a bawh. Pa Lo in, “Maw Eril, …. ra suak aw nan tualrawn ah sia an khikaw ciamco… kan zoh pei,” a vun ti. Eril in, “Ka duh lo, ka pa in suak hlah, Pa Lo in a lo that ding, i ti,” a ti. Pa Lo in, “Nan tualrawn ah Naa an khikaw,” a ti. A ra suak cuang lo. Aveithumnak ah, “Nan tualrawn ah siangte a laam,” a ti ih a ra suak. Zialpi a pelh ih a tlak zawngah a kahthat. A hapi fang khat a thlong ih a tidai kennak rial tithawl sungah a than ih a tlung.

A thaisun ah Eril ih thlarau cu Murapi in Pa Lo tei’ khaw tlunah a ra zam. Pacang za tein an kaap mengmang na in an ngah thei lo. Pa Lo in vei khat hun kap khaw a ngah ih an tual ah lungtum pi in a tla. Pacang za tein an tuul mengmang na in an tuul thei lo. Pa Lo in a vun tuul ih an hmuan thlangah a riil ih Tili pi ah a cang. Cui’ tili laifangah arku ṭhiang hnih te a hung suak. An khawpi pawl cun an ṭih tuk ih a zoh hman an zoh ngam lo. A pa in, “Pa Lo… khi arku khi na la thei pei maw,” a ti. A va lak ngaingai tikah “Na ret thei pei maw?,” a ti lala ih a va ret lala. A pa a uaraw tuk ih a khawpi pawl hmuh ah vei thum tiang a lakter, a retter. Aveithumnak a ret zawngah hmatekhat ah ti a kaang ih Pa Lo a tlathat. Cutikah a pa cu zamrang tein an hmuan ih Mi Nunfuu a khiak ih futi in Pa Lo cu a phuut ih a nungsal. Cutikah a pa in a khawpi pawl thawn nisarih sung lungawi puai a tuah pan lo maw.