Vapual
Lairawn Zilthli

Keiti In Falanu

3 min read

Falanu le tlangvalpa hi an duh aw ngaingai i nitinin hmunkhatah lofeh tlangin an tlak aw ringring țheu. Hmunkhatih hna an țuan tlang hi an nawm tukah nitlak hman hi an thei țheu lo. Ani ni-in an duh aw sinsin. Nisa hman sa an ti lo. Cutin nuam lutukin an feh tlang țheu.

Nikhat cu ni a sa nawn. Khua a hlumih ti a hal rero thlang. Falanu cun a tlangval pai hnen ahcun “Ka ti a hal” a ti. Tlangval pa khal cun mai fala thil duh cu hawl suak a tum ve. Curuangah a falanu i hnen ahcun “Hi tikhur i tidai hi rak in hlah aw, tivapi i ta khi ka vung khai ding” a tiih tithawl thawn a feh. Tlangvalpa cu a va rei deuh ruangah falanu-in a tihal a rak tuar thei nawn lo i an lo tikhur i “Keiti” a rak in. A in ngah veten minung thinlung nei nawn loin mikei ruahnak a nei ve. A mithmai khal cu a dang. A mit a sen. A taksa milai pian sihmansehla a ruahnak le a thinlung hmuahhmauhin mikei a si zo. Amah le amah khal a thei aw. Cutiih mikei ka cang zo ti a theih cun a um a nuam nawn lo. Khawruahhar ninghang le lungsia-in a rak um.

Tlangvalpa cu a tidai khai-in a hungthleng. “Tidai in aw hen” a ti i a hung pe. Asinan “Ka duh lo” a ti. “Keiti na in si fawh maw?” a ti. Falanu cun “Ka in lo” a ti. Asinan a mitmen le a umtu dan tlangvalpa-in a zoh tikah a hmuihmel kel a keng nawn lo ti cu fiangten a thei. Thlamah kan va cawl hrih ding a tiih tlangvalpa cun a cawlhpi. Falanu cu a tha a bang. A thin a nuam lo sinsin. A tlangval a duh fawn si. Mikei asi zo kha a thei. A mitthli a luang thluahthlo. Tlangvalpa cun a hnem rero nan a hnem thei cuang lo. An thlam zautlang cun an khua a hi cuan i,

“Kan run thang rung lang,
Thiamțial ka remnak,”
“Kan sumtual rung lang,
Valza ka pumnak,”

a ti i a țap zawng rero thlang.

Tlangvalpa cun tlun a sawm rero nan a duh nawn lo. Khua ih va tlun ding cu a thinlungin a ngamnawn lo. Cutin sunvu ten țah aw phahin an um khawm hnuah zanlam khua a simin tlangvalpa cun “Tlung uh si” a tiih an tlung. Lam hla nawn an fehih an khua an thlen zik thlang cun falanu cu “Paw” a ti mikeiah a cangih a zuang hlo. Tlangvalpa cu a lungleng le umhar te thawn amahte innah a vung tlung ta.

Falanu cun nitinin sakhi, asilole zukneng cawn a phunphunin an thlamah zingtin a rak ret țheu. A nu le a pa cun cutiih zingtin sa an ngah ringring ruangah an fanute mikei a can cu an ning a hang tuk lo. Asinan zingkhat cu milai cawn a rak ret. An khawpi pawlin falanu mikei ah a cangih milai a deh ti an theih cun kan that ding an ti. Curuangah a fala nu le pa cun tlangvalpa cu an thlah asi le a lu na tuam i na funnakah an ti i hnemrang puan an ken.

An khawsenin an suak i sakhan cu an nam ciammam. Falanu cu tlangval pai hmaiah a suak ngaingai. Tlangvalpa cun,
“Tuu lut si ci maw, khan suak si ci maw
Ka cangțial li sangah khai ta lang”

a rak ti. Falanu khal cun,
“Tuu lut si hlang e, khan suak si hlang e,
Na cangțial li sangah khai hlah law”

a tiih fala ah a cang sal i sunvu ten hmunkhatah an um khat. An ngaiawknak thu le hla cu an mithmai in an rel thlang. Zanlam khua a simin an suak khawm i “Zo talin nan hmu maw?” tin an sut khawm aw. Tlangvalpa cun “ka hmu nan ka kap thiam lo” a ti san. A thaisun cu hawl sal an tum thotho. Falanu i nu le pa cun tlangvalpa cu na hmuh le va kap mai aw an ti. Sakhan cu an hun nam sal. Falanu cu tlangval pai hmai thotho ah a suak. Tlangvalpa cun,

“Tu lut si ci maw, khan suak si ci maw,
Ka cangțial li sangah khai ta lang”

a ti lala. Falanu cun,

“Tu lut si hlang e, khan suak si hlang e,
Na cangțial li sangah khai hlah law”

a ti i sunvu ten an pawlaw lala. Kah ding le a falanu asi fawn. Asinan ziangtilam hmanin hmunkhatah an umkhawm thei nawn fawn lo ding. Milai thinlung an neih tawk ahcun an ngaiawknak le an duhawknak cu simcawk asi lo. Zanlam khua a simin mitthli le canghnap thawn an țhen aw sal.

An khawsenin an suakkhawm sal i “A hmu nan um maw?” tin an sut aw. Tlangvalpa cun “ka hmu nan ka kap thiam lo” a ti lala. A thaisun cu hawl an tum thotho. Ziangahtile milai a deh zo ruangah midang tla in deh pang ding ti an phang. Fala nui nu le pa khal cun tlangvalpa cu “Va kap thlang aw, mikei le milai kan umkhawm thei cuang lo ding” an ti. Tlangvalpa khal cu a pawk sal ve. Sakhan cu an vun nam i tlangval pai hmaiah a suak sal lala. Tlangvalpa cun,

“Tu lut si ci maw, khan suak ci ci maw,
Ka cangțial li sangah khai ta lang”
a ti sal.

Falanu khal cun i that thlang ding ti a thei i,
“Tu lut sing e, khan suak sing e,
Na cangțial li sangah khai ko law”

a ti i “Paw” tiah a tlangvalpa cu deh dingin a zawn ciamco. Tlangvalpa khal cu a rak ralrin ruangah a keu man hlanah a kahih falanu cu a thi. A hngawng a tan hnuah a puan ken mi cun a lu a fun i a pi le a pu a hun pek. Tlangvalpa cu a falanu a thih cun a umhar a lung a leng sinsin i a ruak zemnak hmunah nitin țah-hla sakin a feh ringring țheu. 

Ref :: Thuanthu Roling Cabu
Salai Pa Sang
Zuk :: Original neitu ta

Lairawn Zilthli
«
»

Pu Con Bik Tuanbia

Lian Hakha
Feb 20, 2023 2 min read

How to Write a Post on Vapual: A Step-by-Step…

Vapual
Feb 11, 2022 21 sec read

Cumkheng Thuanthu

Lairawn Zilthli
Feb 11, 2022 1 min read

92 Replies to “Keiti In Falanu”

Leave a Reply