GENIVI TUANBIA (VIII)

ZUMHAWKTLAK NU GENIVI Tuanbia Part VIII

Genivi cu a tha a ba tuk. An kal taaknak hna pawngte ahcun thingpi a um i a nau te cu a taangah aa beh chih i an it. Khua a sik tuk i khualet lei ah hin a hun i thang. A fate cu a thi sual maw tiin a hun tongh. Mitkuh thaw ngai in aa hngilh hliahmah ko. An pawngte in chimbuu hi a rak awn. A pin deuh in cenghngia an rak awn lulhmalh fawn. Genivi cu thong chungah khan um har le thawpit in um hmanhsehlaw, atu cu thawngpang a thei i a um a har lo; a sina cun a har ning phun dang a si than. “Maw, ka Pathian, ka thin a phang ko mu. Nang cu ka pawng te ah na um i ka kaltak hin hlah, Bawipa. Ka pumsa cu a derthawm ko, țih phannak nih a ka tei sual lai” tiah thla a cam than.

“Atu naite zong ah khan a ka thattu hna ding kut khan na ka luatter cang. Atu zong saram țihnung hna lak hin rak ka luat ter than ko. Na ka umpi zungzal ahcun vawlei ah hin zei dah ka țih hnga” tiah thla a cam. Hngilhngam ti loin thingpi hram ahcun khuadei tiangte a thu. Khua a hung dei i khua a hun conh tikah an umnak hmun cu zeitluk țihnung dah a si kha a hun hngalh chinchin. Khua cu siktuk cang kaw naute cu a therhtuk ah a tah hmanh a țap kho ti lo. Genivi cu ei awk ah thinghram le thingtlai kawl pahin lungkua thingkua a va kawl. Thinghreu zum tete aa put i bahra ruang a khawl i a cawh. A lusen a hun chuah in a kut in a mawi i a ei.

Cu hmun um ko cu a si khawh lo caah tuupi chungah cun a vaak lengmang. Ni a hung sang deuh i a khuasih zong cu a hung țha deuh. Khatlei kam a hei zoh i lungpang raangpi khi a hei hmuh. A hei fuh i kua țha ngaite a um. A vung lut i a kua kam khatlei ah tikik fimte a luang kiahmah. Cu lungpang ahcun mairuang a rak um. Genivi cu a khuk aa bil i mairuang hram ahcun hi tihin thla a cam. “Van i a ummi ka Pa, rawltam in kan nufa kan tah thawng hi na rak theih ko lai. Nunnak a ngeimi vialte an nunnak tawk in ei awk na pek dih hna. Kannih nufa zong hi kan philh hin hlah. Khualum tein kan umnak ding ah lungkua zong na kan pek cang i rialti dai zong na kan pek fawn: na kan dawtnak hi a lianngan ko. Kan thihding hi rak kan siang hin hlah a ti dih hnu in ti te cu a din. Cu hnu tlawmpal ah khin chaklei in hnahro lamh thawng an theih. A hun zoh i a kamte ahcun sazukpi a hung chuak. Cu caan lio ahcun ram vaihnak ahhin uico an hman tawn hna i, saram an dawiter tawn hna. Asi nain hi sazukpi cu dawi balmi a si lo. Țih a hmang lo i lungkua chungah cun a hung lut. A rakriah tawnnak kha a si.

Genivi tu nih cun a hmuh balmi a si lo caah a țih deuh. Sazuk nih țih lo tein a hun fuh caah Genivi zong cu a ral a hung țha i a hei tongh. Zeitin hmanh in a um lo caah a mawi hiarmar i a hnubik ahcun a hnuk a hei tongh piak. Sazuk nih cun a vang a kar piak i țha tein a chit ko. Nizan naite ah a faate kha Cenghngia nih a rak sehpiak mi a si. A hnuk um cu a ngan ngai i a hun tongh tikah hnuk tam dawh ngai a si a hngalh i a naute cu aa lak i Sazuk hnuk cu a dinter. Nau te nih cun lunglawm ngai in khim lak tein a din. A paw a hung khim cun naute cu mitkuh thaw in aa hngilh hliahmah. Nau a hngilh kar ahcun lungkua pawng kam ah a va vai i thinghreuro tete a va khawmh i lungkua chungah cun a hun i chiah. Lam hla deuh ah a va kal i thingthei tlai tete a va hmuh i a lawh hna. Lungkua cu thinghreu cun a phih i innka ruam khin a onh. Zan a hung si i Sazuk zong cu khatlei te ah khin amahte in a bok. Annih nufa hna zong cu chawlro cungah an it ve. A thaizing an hun tho i Sazuk caah cun ram hringno tete a va phoi i a rak pek. Amah din awk ah zeitindah Sazuk hnuk cu ka sur lai ti kha a lungin khua a khang.

Mai cu a lawh hnu ah a cheu i hrai ah a ser i cu chung ahcun sazuk hnuk cu a sur. A sur dih cun Pathian sinah thla a cam ‘Maw ka Pathian na cung ahhin ka lawm hringhran. Kaa lawmhnak mitthli hi na sinah raithawinak si ko seh. Na khuakhannak dah ti lo cun hi bantuk thilhi a um khawh zong ka zum kho hnga lo. Na sinah lawmhnak bia zong ka chim cawk lo. Bawipa, ka lawm hringhran a ti i Sazuk hnuk cu a din. Nifate in an umnak lungkua cu a remh, a milh tlorh. A innka pawngah thingro in vailamtahnak a ser i a bunh. A caancaan ahcun, amah le amah hi, zaangfak ka si ko mu, a ti tawn. Cu bantuk a thinglung i a chuah paoh ah vailam tung te cu a hun zoh i, ‘Maw Pathian, na fapa hmanh kha hi vawlei cung ah hin kha tluk khan va um kaw kei thamtham cu na khuakhannak ah hin ka phun hrang hin lai lo, Bawipa, sihmanhsehlaw in khawhnak thinlung le thazang rak ka pe ko” tiin thla a cam tawn. Cu tin thla a cam khawh paoh ah cun mitkuh thaw tein a it tawn.

Rev :: John Siam Lian