GENIVI TUANBIA (VI)

February 11, 2022 2 min read

ZUMHAWKTLAK NU GENIVI Tuanbia Part VI

Zanlei pi ah Genivi nih a ihnak pawng vanpang hin thawng a theih. “Bawinu, naa hngilh cang maw? tiah din tein aw a hun theih. Genivi nih “Ka hngilh rih lo, zeidah a si” tiah a hun ti. Aw nihcun “Bawinu ka țih tuk hringhran, a chim hmanh ka chim ngam lo. Golo cakuat kha Count nih a hmuh i a thin a hung tuk i Golo sinah, “Ka nupi cu a hngawng rak tan u, tiah ca a hun leh. An thattu an rak phan deng cang lai” tiah a aw ther lengmang in a hun ti. Count nih cun, “Naute a ngeih a si zongah nan thahchih lai, a ti zong ka va theih chih; zeitin in dah kan um ual lai” tiah a ti. “Ka bawinu ka cungah na țhatnak vialte kha ka philhlo na caah santlaihnak zeital ka ngei kho hnga maw? tiah a ti.

Genivi nih cun, “Na ngeiko ka nau Berti, vatli law sathau meiinn le catial nak va ka lakpiak” tiah a ti. Rianrang in Berti cu a va tli i a chimmi paoh cu a va lak.

Hitihin Genivi nih cun ca a țial.
“Ka dawt ko na le zumh awk tlak in ka um ko nain ka dawt khawh ti lo mi Count, thong chung lungpher ka danh i hi ca ka țial tak. Hi ca na hmuh ah hin cun kei cu thlan chungah ka um cang lai, a rau ti lai lo, Pathian biaceihnak hmai ah ka dir cang lai. Sual na phawtmi na nupi hi Pathian hmaika ah thiam ka co lai tiah thlan khawr ka luh lai tiang ah hin kaa chal ngam.

Sualnak ngei lo tein vawlei hi ka kal tak lai caah ka lawm ko. Ka dawtmi Count kei tu cu na zaang zong rak ka fak hrimhrim hlah, nangmah tu kha ka zaang na fak hringhran; zeitindah, zeiset lo ah deh khawh le hlen khawhmi minung na rak si i na nupi le na fapa cung ah hi bantuk in thahnak nawl na pekmi hi cu thei thiam law cu Genivi hi tluk tatai hin cun a ngaih na chiatter hnga lo. A hmanmi na theih can a um te hmanah rak i ngaichih hrimhrim hlah. Na ka dawt ko, na dawtnak thei bute in thi ko ning.

Ka dawtmi ka va, na sualnak zeihmanh a um lo. Pathian khuakhan pei dik a si ko rua; sihmanhsehlaw na thin a tawi tukmi kha Pathian sinah ngaihthiam rak halte. Mi dang cung zongah na thin hung tawi ti hlah, ti hi cahta kan duhmi a si. Ka pumsa cu a rethei ko hmanhsehlaw, ka thlarau thanuamte le lunglawm ngaiin ka Pathian sinah aa din cang lai. Cu hmun cu phanh ve ding in rak i zuam law, vanram ah na dawt mi na nupi Genivi nih ka rakin don te lai. Na fapa te zong hi na hmuh ve te lai. Cu ka ahcun i then ti lo in kan leng ti cang lai mu.

Ka nu le ka pa belte kha hun ka dawtpiak hna law; ka sining le ka thih ning le a nithla zong thate in rak theihter hna. Sual a ka phawtu Golo zong hi na hun ngaihthiam lai. A sual lawng a si lo, a hruh tuk caah a si. Ka lu a ka tantu zong sual na hun phaw hin hna lai lo. An rian a si nawl pekmi an zulh a si ko. Zumhawktlak na mithi Darako zong kha a nupi le a fale thate in na run zohkhenh hna lai. Cun, ngakchia nute ca a rak in petu hi bawmtu a hohmanh ka ngeih lo lioah a ka bawmtu a si i rak philh te hlah, a cungah lawmhnak bia hun chim te. A donghnak ah na khua le na ram vialte hi ka nun lio i mikip cung i zaangfahnak, zawnruahnak ka ngeih tawn bang khan an nu le an pa na si kha hun philh hlah. Misual sihmanh ninglaw Golo sual phawt ruang i ka thih lai caah hin ka Pathian nih cun thiam a ka co țheu lai. Ka thih lai zan ah hi ca hi ka țial tak. Damte in, ka dawt Count, Na caah thih ni tiang zumhawktlak na nupi,

Genivi

tiah a țial i Berti sinah cun a pek i, “Hi ca te hi nangmah hrimhrim nih a kut hrimhrim ah na pek lai” a ti. Berti cu țah pah in inn leiah a tin.

Ref:: Rev. John Siam Lian