GENIVI TUANBIA (IV)

ZUMHAWKTLAK NU GENIVI Tuanbia Part (IV)

Genivi an thlaknak thongcu a min hmanh ah hawihlei sualmi thong tiah min sak a si. Genivi an chiahnak khaan cu khan zakhat renglo chungah a muihnak bik khan a si. Ceu hmete lawng a hung lut kho i a chung ahcun bawri fate lawng an chiahpiak. A vampang hna cu a buar dih i lunghmul le maimomh bu in a khat. Minung umnak si loin mithi khua khi sisehlaw a dawh. Cu khan ahcun khuasik le mitthli he khuacuan rel hram a thok. Nikhat hnu nikhat Genivi cu a titsa no hlirhliar te a um tawnmi a mit hmai hna cu aa dang chin lengmang. Nikhat chang pakhat le ti hraikhat an pek. Nikhat cu a lung retheih le a vansan bu in vanlei zohin thla a cam, hitihin a ti. “Dawtnak in a khatmi ka Pathian, thinginn chung muilak in na fanu nih ka rakin auh. Nangmah lo cun bawmtu dang ahohmanh ka ngei ti lo Bawipa, ka mitthli tlaknak le ka lung retheihnak vialte zong na ka hmuh dih ko ka hna a ngamko Bawipa Sihmanhsehlaw Bawipa minung thazaang cu zeihmanh a si lo ka derthawm ngaingai ko cang i ka hnangamnak nihhin a ka zo tawn lo. A ka dawtu ka nu le ka pa nih khan hi tluk vanchiatnak ka ton hi an theithiam tung lai lo. Ka vapa zong ramlak ah a um tung Dawtu ka hawi dang zongnih an ka chawn kho ti fawn lo. Bawipa, nangtu nihcun thong chung innkaa zong hi na ka hunpiak khawh ko. Ka caah hin thil țhalo zeihmanh na tuah lai lo. Na fanu hi rak ka philh hin hlah. Na dawtnak in rak ka hnem ko, ka Bawipa.

Siangpahrang bawinu ka rak sinak le atu hi tluk vanchiat ka tonnak ka ruah tikah, khuate i zeihmanh thei lo ngaknu i rak chuah hmanh ka duh deuh. Vawlei mi ca i na sermi thing le rampar, ni le thla le arfi dawhnak phungtling he na ser mi, mi nih nomhnak he an hmanmi kum le caan cu kei caah cun țahnak ni le caan ah aa cang. Maw Pathian ka thinlung chungah hin rak ka cawnpiak than tuah. Nangmah khuakhannak ahhin vui hramnak ka ngeihnak hnga lo rak ka bawm ko”.

A thlacam dih ahcun a thinlung ah hin hitihin a hung lang. Genivi minung mithmuh ahcun a sual taktak na si ko. Sihmanhsehlaw, Pathian mit hmuh ahcun sualnak ngei lo na si cu ni ceu nakin a ceu deuh” tiin.

Ref:: Rev. John Siam Lian