Duhdawtnak Timi Cu

February 11, 2022 2 min read

Duhdawtnak Timi Cu

Siang Lian Uk Kianghrol

Ni khat ah Plato in a sayapa Socrates hnenah, “Duhdawtnak timi hi ziang a si?” tiah a sut. Socrates in Plato cu dunglam kir sal awi lo in, sangvut cinnak loram pakhat sungah a fehter ih, a fehnak ih sangvut vui ṭhabik, a tumbik pakhat khiak ding in a fial.

A sayapai’ fial mi a oltuk ah a ruat ih Plato cu mah le mah rinsanawknak nei zet in sangvut lo sungah a lut.

Ni hrek a kim tiang in sangvut lak ahcun a um nan, a netnak ahcun beidong in a kut lawng in a ra kir.

Socrates hnen a thleng ih, “A ṭhabik ti ih ka ruah mi sangvut vui cu ka hmu ko. Asinan pakhat lawng lak ding a si tikah a ṭhabik a si taktak pei maw timi ka ruat ih, cumi hnak ih ṭha deuh an um ko ding ti’n ka feh vivo, loram cem tiang ka thlen lawng ah ka kut ah zianghman a um hrih lo timi ka theisuak,” a ti tikah Socrates in, “Khami kha duhdawtnak a si,” tiah a sim.

Ni khat ah Plato in Socrates cu, “Țhitumnak timi hi ziang a si?” tiah a sut lala ti a si. Cutikah Socrates in Plato kha far kung hlir umnak hmun ah dung kir awi lo in vei khat a fehsuakter ih, a fehnak zawn ih um mi farkung lak ah Christmas hrangih hman ding farkung ṭhabik pakhat lak a fial.

Zirhnak pakhat rak ngah zo Plato cun tui ṭum ahcun thil dik lo ka tuah nawn lo ding ti’n rinsanawknak nei zet in farkung lak ahcun a feh. Ni hrek a rei tikah a hnah nim ṭha mumal lo, a kung khal a dingh ṭha pam ti theih fangfang farkung pakhat pu in bang le cau zet in a ra kir.

“Himi hi maw farkung ṭhabik cu?” ti ih Socrates in a sut tikah, “Pakhat lawng lak ding a si ruangah a ṭhabik khuimi a si ti’n ka hawl rero tikah a awmang ve ko tiih ka ruah mi farkung ka hmu. Cumi ka hmuh can ah ka caan le thazang an cemral vivo thlang ti khal ka thei. Curuangah a ṭhabik a si le si lo khal ngaihsak nawn lo in ka hau ih, ka ra tlung a si ko,” tiah Plato in a sim tikah Socrates in, “Khami kha ṭhitumnak a si,” tiah a sim.

Ni khat cu Plato in Socrates hnenah, “Thupte nupi timi ziang a si?” tiah a sut lala.Tui ṭum khal ah Socrates in Plato cu hramlak ah a vahter. Tui ṭum ahcun dung kir khal a theih. Duhdandan ih veivah kual khal a theih. A tuah ding mi cu a thlennak hmun ih “Pangpar mawibik pakhat” ṭawh ding a si.

Tui ṭum khal Plato cu rinsan aw zet in hramlak ahcun a feh. Nazi pahnih zik a rei hnu ah thin nuam lo mithmai thawn rong tinkim a nei mi pangpar vuai deuh pakhat keng in a ra kir.

“Himi hi pangpar mawibik maw?” tiah Socrates in a sut. Plato cun, “Nazi pahnih sung zikte ka hawl tikah a mawibik ti ih ka ruah mi himi pangpar hi ka run ṭawt. Asinan lamzin ah nuamtete’n a vuai vivo a si hi,” tiah a sawn. Socrates in, “Khami kha thupte nupi a si kha,” tiah a sim.

Ni khat cu Plato in Socrates kha, “Hringnun timi ziang a si?” tiah a sut lala. Socrates in Plato cu hramlak ah a fehter lala. Tui ṭum khal duhdandan ih feh a theih ih, a thlennak hmun ih pangpar mawibik pakhat ṭawh ding thotho a si.

Plato cun ti sual nawn lo ding in ralringte’n a feh. Ni thum, zan thum a rei tiang in Plato a ra tlun sal lo tikah Socrates in a va hawl. Hramlak hmun pakhat ah Plato cu bukte khawh in a rak um kha a va hmu.

“Pangpar mawibik cu na hmu zo maw?” ti ih a sut tikah Plato in pangpar pakhat khih phah in, “Himi hi a mawibik ti a theih pei maw?” tiah a sut.

“Asile ziangah na run ṭawt tlung lo?”

“Ka ṭawh ahcun a vuai ding. Ka ṭawh lo khal ah a vuai leh ding ti cu ka thei ko. Curuangah mawi zet ih a par lai hi ka zoh ding ih, amahtei’ a vuai hnu ah pangpar dang ka hawl leh ding. Himi hi ka hmuh dah mi pangpar lak ih a mawibik a pahnihnak a si.”

“Aw. Hringnun ih sullam na theithiam zo,” tiah Socrates in Plato cu a sim.

Sirhsan: Ngantu Theih Lo – “Socrates le Plato ih Simmi Duhdawtnak”