Tisartam le Zawng Thuanthu

Siang Lian Uk Kianghrol

Hlan lai ah tisartam pacang pakhat ih nupi cu bese zet in a na. “Zanriah hrangah zawng ih thin le lung ka ei ngah lai hlan lo cu ka damsuah thei ka zum lo,” tiah tisartam pinu cun a ti.

Cutikah tisartam pacang hrangah ummen a theih nawn lo. A nupi ih hiarhal mi cu hawlsuah thei a tum. Tiva pakhat kiang a va thlen tikah tiva kap thingkung parih lek rero zawng te pakhat a va hmu.

Cutikah tisartam cun ngian a suah ih, “Zawngte, tiva ih hilam cu umnak ṭha lo sokhaw a si. Tiva khatlam ahcun thingthei le banhla pawl tampi an um sawn. Ka zaang parah ra kai awla khilam ah ka lo thlah ding,” tiah a ti.

Cutikah zawngte cu tisartam ih zaang parah a vung to. Tisartam cun tiva ih khatlam ah a hei leuh. Asinan tiva laili a thlen tikah a cawl hrim. “Ka nupi in zanriah ah zawng thin le lung ei ta rori a hiarhal ruangah tidai sungah ka lo phim that a ṭul,” ti’n zawngte cu a sim.

Cutikah zawngte cun, “Tidai ah in phim that hram hlah. Khatlam thleng ding in i hruai sawn hram aw. I hruai thleng ahcun zawng thin le lung kop khat lawng si lo in, kop hnih rori in ka lo hawl sak ding,” tiah zangfah a dil.

Cumi cu tisartam in a lung a kim ve ruangah zawngte cu khatlam ral ah himdamte’n a hei hruai. Tisartam cun tiva ihsin a rak hngak ih zawngte cu thil hawl in a vak. Nazi hrek rei hrawngah zawngte cu a kut ah thil fatakte pahnih ralring zet ih keng in a ra thleng sal.

“Khah! himi hi zawng thin le lung kop hnih a si hi. Himi a ei ahcun na nupi cu a dam ding ka zum,” tiah tisartam u sim phah in a ken mi cu a pe. Tisartam pacang khal cun cumi cu tisartam pinu hnenah a pe. Tisartam pinu cun a ei thluh cih. A ei thluh cun a nat khal a dam.

Asinan tisartam pinu ih ei mi cu zawng thin le lung taktak a si lo. Ak-um rah ro pahnih men an si. Asinan a taktak ah ruat in thin diriam zet ih a ei ruangah a hiarhalnak a reh ih, a nat khal a dam phah. A ruahnak in a nat a damter.

Minungpawl lak khal ah tisartam pinu vek tampi kan um.

Sirhsan: The Crocodile and the Monkey – The Greatest Stories of the World that Will Be Told Forever.