Ramsa Tlawnginn

Vei khat lai ahhin ramsa pawl in ‘leitlun thar’ ih buainak um mi pawl hmaton thei ding in thil ropi pakhatkhat tuah ding ah thutluknak an tuah. Cutin, tlawnginn pakhat an din. Tlan, kaisoh, tileuh, le zuan tivek cangvaihnak pawl a tel mi zirlaibu pakhat an tuah. An zirlaibu herhawi olsam ding in ramsa hmuahhmuah in subject zate’n an zir thluh.

Rampai cu tileuh ahcun a thiam cungcuang zet. A zirhtu hnak in a thiam sawn. Asinan zuan ahcun exam a ong fangfang ih, tlan ahcun a nasa lo zet fawn. A tlan cak thei lo tuk ruangah tlawng ṭum hnu khal ah a zir peh bet a ṭul ih, tlan cinh thei ding in tileuh khal a cawlhsan lawk a ṭul phah. Tlan a cinh ciamco ruangah a netnak ahcun a kezung pehzom aw pawl bese zet in an tlek ih, tileuh khal ah mi zaran tluk lawng ah a cang. Asinan mi zaran cu tlawnginn ah cohlan an si ruangah, midang cun an thinphanpi lo. Amah rampai lawng a thin a har men.

Sabek cu tlan ahcun an class ah a thiambik a si. Asinan tileuh lam ah a tlaksam tuk ruangah a ning a zak thei zet. Thiahlei khal kaisoh lam ahcun a thiam cungcuang zet. Asinan zuan an zir ṭum ah an zirhtu in thingkung zim ihsin si lo in, leilung ihsi zuang thok ding ih a fial tikah tingaihnak a thei nawn lo. Zuang ding ih a zuam nasat tuk luarkai ruangah a ke a tuahmawh aw ih kaisoh ah C le tlan ah D lawng a ngah phah riangri. Muvanlai cu tlawngta buaithlak zet a si ih, nasate’n nunsim a tong. Kaisoh an zir ṭum ah midang hmuahhmuah thingkung zim a thlen khelh thluh. Asinan cutawk thleng thei ding in, amai’ duhdan kalhmang hman siang ding in a ṭang eu-eu.

Kum a cem tikah mi cungcuang ngarul cu hmat tambik ngah in tlawng ṭheh puai ih thusimtu ah hril a si. Ziangahtile tileuh a thiam zet ih hlei ah, a tlan thei fawn, malte a zuang thei ih a kaiso thei fawn. Curuangah zemrual hmat ah a sangbik.

Sakta Amerika ih zinghnam tum ci pawl (prairie dogs) pawl cu tlawng an kai duh lo. Tlawnginn ukhruaitu in zirlaibu ih khur laih le kua vir an telh lo ruangah siahkhon zung hotu an va to. Annih cun an fa le pawl zirhtu ding ah vawrvok an ruai ih, neta ahcun groundhog pawl le zupi ci khat pawl thawn bulpak tlawng hlawhtling zet nei thei ding in tlawnginn an din thok.

Himi thuanthufim hin zirh duh a nei maw?

Hram: Chicken Soup for the Soul ih George H. Reavis ngan mi “Animal School” Chin mi thawn mil deuh ding ih lehher mi a si.

Siang Lian Uk Kianghrol