Nupi Pali Neitu Mipa

Nupi Pali Neitu Mipa

Vei khat lai ah mipa pakhat in nupi pali a rak nei. Cui’ a nupipawl lakah a palinak a si mi, a nautabik cu a duhdawtbik ti a si.A ngaihsak ringring, ceimawiawknak ding thuamhnaw le thilri tinkim khal a pe.

A nupi pathumnak a duhdawtdan cu a danglam deuh. A rualpipawl thawi’ an tonawk tinte’n a nupi pathumnak cu uanpi ding ih kawhsuah a duh. A nupi pathumnak a neih ngah ruangah a uang aw ti a si.

A nupi pahnihnak a duhdawtdan khal a danglam deuh lala. Harsatnak le buainak a ton tinte’n a nupi pahnihnak cu thu sia thu ṭha hrangah sutron a tlak. A nupi pahnihnak cun ruahnak ṭha a pe. Harsatnak le buainak cinfelnak lam ah bawmtu a si ringring. Curuangah a nupi pahnihnak khal ṭhen a siang ve lo.

A nupi pakhatnak (nupisur) cu a duhdawt lo.  Asinan a nupi pakhatnak cun a pasal cu a ngaihsak zet. Hmansehla a pasal cun vei hnihkhat ah tla cun anih cu a um le um lo hman a ngaihsak ṭheu lo.

Ni khat ahcun cu pa cu natnak ruangah  thihnak ihkhun par ih a ih can a ra thleng. Thih a ṭihtuk lawmam ruangah a nupi pali lak ahcun zo in amah an thlun ve ding tiah a sut hai.

A nautabik a si mi, a nupi palinak cun, “Ka lo thlun thei lo,” timi lawng a ṭong ta ih ziang dang hman rel bet nawn lo in a suahsan.

A nupi pathumnak cun, “Na thih cun pasal dang ka run nei ding ih, cucu si ko,” ti’n langhngan in a sim ih a suahsan ve.

A nupi pahnihnak cun, “Na thih hlan le thlan sung ih na luh hlan tiang cu ka lo kilkhawi thei ko. Asinan nangmah thawi’ thih tlang ding cu ka tlin lo ruangah ka riah a sia zet,” tiah a sim.

A nupi pakhatnak cun, “Keimah ka lo thlun ding, ziangtik hman ah ka lo ṭhen lo ding,” a ti.

Cutikah thi zik cuahco pa cun a nupi pakhatnak a rak ngaihsak lo cu a sir aw zet. Ziangahtile a nupi pakhatnak cu ṭhatei’ a rak cawm lo ruangah a ṭawl in, a tha khal a cau zet. Asinan cu ti cing khal in a thlun tumtu umsun a si thotho.

Zirhmi:

Nupi Palinak: Nupi nautabik timi cu nitin ih kan thiar rero mi kan taksa ruangpum hi a si. Kan thih ni ahcun ken bet theih lo in leilung ah kan tanta ding. Leivut ah a rung cang ding.

Nupi Pathumnak: Kan dam lai ih kan neih mi hlawnthil le neihsiah pawl an si. Kan thih tik ahcun midang kut sungah an thleng ding. Kanmai’ ta a si nawn lo.

Nupi Pahnihnak: Kan insang sungkua an si. Kan dam lai, kan um tlang lai ahcun kan hrangah ruahnak ṭhabik in pe, a ṭha theibik in in bawm. Asinan kanmah thlun ding ih thi thei an si lo. Hualvan ih remruahnak ruangah hringnun ih tong aw mi kan si.

Nupi Pakhatnak: Nupi pakhatnak cu kan tuahṭuannak le a hmual (hualvan) a si. Kan tuahṭuannak ṭha le tuahṭuannak ṭha lo pawl ih hmual cu kan nun lai ah siseh, kan thih hnu ah siseh, kan hnenah an um ringring. In thlun ringring. Kan kawh ah simaw, kan kawh lo ah simaw, kan duh ah simaw, duh lo ah simaw, in thlun thotho ih, in thlun peh vivo lai ding fawn. Curuangah kan dam lai ah kan nupi pakhatnak a si mi “kan tuahṭuannak” hi ngaihsak in thil ṭha tuah cio a ṭul a si.

Ref: Aung Kham (Yoyarlay)

Siang Lian Uk Kianghrol