Ngan Bo le Thlim Can

15 min read

Ngan Bo nu le pa cu nitinin lungrual zet te’n lo an feh tlang ṭheu. Asinan nikhat cu Ngan Bo pa cun a lungkuai nawnte nutlawi pakhat a hmu i Ngan Bo nu kha a iai deuh i an ṭhenawknak dingah khua a ruat. An lo fehnak ziinah liilawn pakhat a um i a hnuai cu tilipi a si. Ngan Bo nu cu mi thlariin nei, ṭihhrut deuh sikhaw liilawn kha ṭhiiṭha-in amah te’n a zawh ngam dah lo. Nikhat cu an pa-in “Lomi tlunah zokhal liilawn zawh ngamlo cu kan tul thla aw ding” tiah a ti.

Ngan Bo nui’ hrang ahcun lomi tlun ding cu ṭih a nung ko. Tuizaan cu tili sungah ka tla thlang ding tii faingte’n a thei. Lomi cu an hung tlung i liilawn hram an thlen cun a liilawn zawh hreh tukah a ding lawk. An pa cun, “Feh aw he law” tiah a tii. An nu cun, “Ka ṭhi hna a cat i ka peh lai” a ti. Tawkfang a hi zawh. Asinan a tha a ṭhia. A zawh ngam nawn lo. An pa cun, “Feh thlang aw hen haw” a ti lala. An nu cun, “Ka ṭhisep a cat i ka peh lai” a ti. Tawkfang ah an pa cun, “Feh thlang aw hen law” a ti lala. Ngan Bo nu khal cun, “Ka ṭhisep a cat i ka peh lai” a ti thotho. An pa khal cun a thinheng a tuar nawn lo i, “Cuzat ṭhi cat le ṭhi peh cu” a ti i tili sungah a tuul thlak. Tili sung ahcun ngathaisawn ah a cang.

Ngan Bo pa cu thindiriam le lungsung saduhthatin a hung tlung. A nutlawi ngai mi ziangtin ha a co thei ding. Ziangtin ha innsang thar a din sal thei ding? A phunphun khua a ruat i an inn a thlennak hman a thei man lo. An kotkhen in a fanute Ngan Bo cun, “Ka pa, ka nu teh?” a ti i a rak hmuak. Ngan Bo pa cun a fanute a zohah cun a thin a har ko. A thi ti ding cu a ruat baan lo. “Bote i hrangah a tii i pangpar a ṭot lai” a ti san. A nu thlen tii a neih lo cun, “Ka pa ka nu teh” a ti sal lala. A pa khal cun, “Bote i hrangah a tii i cu mi kha mi a la lai” a tii i thu dangdang a sim vivo. Asinan tawkfang a rei hnu ahcun Ngan Bo khal cun ka nu a thi zo tii a thei fiang thlang.

Ngan Bo pa cun Nganbo cu, “Thlim Can nu tei’ meisa va cawng aw” tiah a fial. Ngan Bo cun ninghang lungsia te thawn an kotka tei’ meisa cawn a va dil. Thlim Can nu-in, “Na pa thawi kan umawk loah cun” a rak ti. Ngan Bo cu a kir saal i a pai’ hnenah, “Ka pa, Thlim Can nu-in na pa thawi kan umawk loah cun i rak ti i ka cawng ngah lo” a va ti. A pa cun, “Umawk khalah umawk lo khalah va cawng thotho aw” tiah a ti. Ngan Bo cu a feh sal i, “Ka pa’n umawk khalah umawk lo khalah va cawng thotho aw i ti, nan meisa cu in cawn mai aw” a va ti sal. Thlim Can nu cu a lungawi tuk kha a pehin a pet suak i a thilri neihsun bung le bel hmuahhmuah thawn an pok suak i Ngan Bo tei’ innah an va lut thluh.

Thlim Can nu cu Ngan Bo pa thawn an um khat. An saduhthat le an lungruah thup thil pawl an ngah thluh thlang. Mothar le mopaa thar tii cu lung a nuamin an duh aw ko. Asinan Ngan Bo te kha nu loin ar bang a vaai ko. A pai’ nupi dang a neih san ruangah tuihlanih a pa vek khan a zoh ngamin a naihniam ngam nawn lo. Nu-ei a tuar i zaangfahzaa te’n a suk le a so ah a nui’ kawk le vuak ṭih in a tawivak rero. Felte’n a tuah khal le kawk asi thotho, ṭhatei’ a tuah khal le kawk thotho. Nu-ei tuar kan ti cu. A pa in le a nui’ thu kha pompi thlang khaw Ngan Bo cu hnemtu ding a nei nawn lo.

Nitinin Ngan Bo cu a naunu Thlim Can an um ter i a nu le a pa cun lo an feh san ṭheu. A nu cun Ngan Bo cu rawl uih le ṭhing hma a pek i a fanu Thlim Can vialin rawl thawthaw a ei. Asinan Ngan Bo a ṭumṭawl cuang lo. A taksa a mawi, a ruang le raai a ṭha. Duhnungzaa in a um sinsin.

Thlim Can nu cun Ngan Bo cu rawlsia sia khopkham lo zetin a pe nan a ṭumṭawl cuang lo i a ni ni-in a taksa a ṭhat deuhdeuh le a mawi sinsin kha a hmuh tikah a khawruah a har. Thlim Can a suh tikah, “Nitin a nui’ hnenah khan tilipi ah an feh i rawl thawthaw a rak pe ṭheu” ti’n a sim. Ngan Bo nu cun nitinin ngaleng sa le fangcang buh a rak pe ṭheu. Nikhat cu Ngan Bo tei’ unau cu tilipi ah  cun an va feh sal. Ngan Bo nu cun a pek kel rawl cu a rak pe hai. Thlim Can cun a sa co mi kha a ei thluh cingcing. Ngan Bo nu cun, “Bote na nau seu aw” a tii i a seu ṭheu. Tu le tu pek cawl lo le seuh cawk loin a ei thluh cingcing. A nu cun a fial lala. Ngan Bo cun, “Ka nu, ziangah ha Thlim Can hi cu tii i pek dingin i fial, a hi nu hi a si lo maw nitin i thawi i i veeltu cu” a ti. Cumi a theih tikah, Ngan Bo nu cu a thin a heng i Thlim Can cu a thawi ciammam ve. Thlim Can i ṭap le rak cu a nu in a rak theih i a suh tikah, “Ngan Bo nu-in i thawi” ti’n a va sim.

Thlim Can nu cun Ngan Bo nu cu a ham a ṭha lo ding. Kan thah lo ahcun a tii i thah theinak khua a ruat. Pol hnenah a leng i, “Tuizaan kan pa, na hnenah ka ra ter ding. Ngan Bo nu nan thah lo ahcun nan nui’ pumna a daai lo ding ti’n rak sim aw” tin a tiamthup. A zaanlam cu, “Ka pum a na tuk e, pol hnenah zamrangin va sut aw” tin an pa cu a fial i a lawng a tal rero. An pa khal cun ziang thei loin a va sut ve. Pol khal cun an tiam awk ta bangin, “Ngan Bo nu nan thah lo ahcun” a rak ti. Cutin Ngan Bo nu that dingin an relcat. Ngan Bo cu, “Kanu an that thlang ding” a tii i ninghang lungsia in a ṭap a rak. A nui’ hnenah a va feh i, “Ka nu, lo thah an tum. Curuangah ti taw kat ka lo tii le ti lu ah kat aw. Ti lu kat ka lo ti le ti taw ah kat aw” tin a va sim. A thaisun cu Ngan Bo nu that dingin an pok i, a sa phurhnak dingah bawmthlek thawn an va pan. Ngan Bo cun, ”Ka nu ti lu kat a tii i, tii taw ah a kat. “Ka nu ti taw kat a tii i, ti lu ah a kat. Cutin an that thei lo. Thlim Can nu cu a thin a heng i, ”Ngan Bo zutzo kha amah that lawlaw uh” a ti. Ngan Bo khal a thin a phang i, “Ka nu keimah thah in tum”, na zang hriamte hun lang ter aw” a tii i cutin an kah i Ngan Bo nu cu a thi.

A sa cu an sahṭhet ṭheh hnu-ah bawm pahnih khatin an san i Ngan Bo le Thlim Can an phurh ter. Thlim Can i phurhmi vialin a thi a suak ciammam i a takpumin a thi a khat thluh. A nu cun, “Bote nanau thlengaw” a tii i Ngan Bo thawn an bawm phurh an thlengawk ter. Ngan Bo i a phurh cun a thi a kang. Ngan Bo i bawm Thlim Can i a phurh cun a thi a dok lala. Cuti’n thi le hnai pi thawn inn an va thleng. Ngan Bo cun, “Nannih cu nan duhnakah leng thluh au. Keimahin sa cu ka suang ding” a tii i a sungte pawl cu a leen ter thluh hai.

Ngan Bo cu a nu’n a thihsan zo ruangah ninghangin a ṭap phahphah i a nui sa cu a suang. A rawl suan cu a be phahphah i

“Ka nu aw, ka nu aw, na khuitawk tiang hmin cang maw?”
ti’n a sut. A nu khal cun,
“Ka fa aw, ka fa aw, ka khuk i hnuailam hmin cang e”

a hun ti. Cutin, “Ka taitan i hnuai lam, ka siang i hnuai lam, ka hngawng i hnuai lam ti’n an sim aw phahphah i an um khat. Netabik ahcun a nu cun, “Ka fa aw, tucun ka lu tiangin a hmin thluh thlang ding. I be nawn aw hlah. Ka lo be thei nawn lo ding. Ka sa an run ei le nang cu i run ei aw hlah. Ka ruh vial run khawl aw la puanvarin leilungah ṭhate’n i run phum aw. Nithum hnu-ah rak zoh leh aw” a ti i cutin an ṭian aw ta.

Ngan Bo cun a rawl a hmin cun an sungte pawl cu a ko hai i rawl ei a tuah sak. A sungte pawl cun, “Ngathaisawn sa ti’n hluk le hlekah a hang thawn an ei i thaw ti fahranin an cepcep rero nan Ngan Bo cun a ei ve lo. “A ruh vial kei i pe au, a sa cu ka ei lo ding” a tii i a ruh cu ṭhate’n a fingkhawi. Phuanvarin a ṭha thei bikin a tuam hnu-ah seentlung ah a va phuum. Nithum a kimin va phorh khaw ṭhi rual a phunphunah a rak cang. Thlim Can nu cun Ngan Bo i ṭhi a hmuh tikah midang ta a ruk si hmang a ti i, “Ngan Bo in e ṭhi rualpi a ruk e, nan ṭhi rak zoh cio uh law” a tii i khawpi pawl cu a sim hai nan, “Zohman ṭhi hlo kan um lo e” an rak ti san meen. Thlim Can nu cun a fanu i hrangah a duh ve i, “Bote na nau pe ve aw” a ti i a pek. Thlim Can i a hun awrh le seentlungah a cang sal i, “Hivek ka duh lo” a ti i a hlon. Ngan Bo i a lak len thi ngai ah a cang sal lala. Cutin seentlung i a can sal ṭheu ruangah an pe aw thei lo.

Thlim Can nu cun Ngan Bo le Thlim Can kha a phunphunah a zuamawk ter zok rero. A fanu Thlim Can kha ziangkimah Ngan Co hleih ter a duh zet. Ngan Bo i mawinak le ṭhatnak hmuahhmuah kha a iksik, a nahsuah ruangah Ngan Bo cu zingzaan vuak le thawi le camsiat a tuar ringring. Cuti’n Ngan Bo cu nu-ei tuarin ningzak le hmaizumin a um. A nui’ zoh ah Thlim Can cu ṭha le mawi in lang hman sehla midang zohah Ngan Bo cu a mawi deuhdeuh thotho.

Veikhat cu Thlim Can nu’n a fa le pahnih lo a neih ter i a dangdangin ri a ṭhen hnuah mah le lo cio a thlawh ter. Nitinin an unau cun lo an feh i fang le vaainim rawlci phunphun ciingin lo cu an tuah, an thlo ṭheu. Ngan Bo cu milaw, taima a si i Thlim Can vialte in nitin malte lawng a ṭuan. Ni a sat le a cawl i ruah malte a suur le a cawl. Lo cu thlawhsuak tii le a nei lo. An ri rori in an lo rawl ṭhatzia cu a tan aw. Nikhat cu Thlim Can nu cu, “Ka fa le pawl lo ka va haal ding” a tii i lo a va feh. Ngan Bo i lo rawl vial lawng dum detdet, hring demdemin a va hmu. Thlim Can i lo cu sen fialfial le lohar hrampi rul liailiai in a va hmu. Asinan Thlim Can i lo rawl cu a nui’ mitah cun a ṭha sawn thotho.

Nikhat cu Kawl mi mang a sal rual pawl thawn Ngan Bo tei’ unau cu an hung leng i an thlen zik cun, “Maw Thlim Can, na lo ziin khuitawk ha” an vun ti. Thlim Can cun, “Pat dum le pat rang ka khih kha run zong au law” a ti hai. An vun zong i a thlam an vung thleng hai. Thlim Can cu tlangval lengtu ka nei a tii i thlamsungah fala pawl i an mawi tum ṭheu thei tawk suahin a rak cei aw i a rak hmuak. Kawlmi mang pawl cun, “Thlim Can na vaainim in va eh aw” an ti. Thlim Can khal cun aungaw phahin, “Kei i vaainim cu a sau khal an sau, an paw khal a ṭha” a ti i zaphak can lo tete a va la suak i a rawh sak hai. “Na fanghma in lawh aw” an ti i fanghma piingkirh, hma pi thawn a khat tupti pawl a va lo i a zelh sak hai. Cuthluh hnu-ah kan hrik in zoh sak aw an ti lala. Thlim Can cun, “cu lawmmam i hrik tam cu e” a tii i a cip i a deh sak zok rero. Tawkfangah Ngan Bo i hnen leen kan duh hrih aw an ti i an tlaan san.

Ngan Bo i lo ri an thlenin, “Maw Ngan Bo, na lo ziin khuitawk kha?” an va ti. Ngan Bo khalin, “Pat dum le pat rang ka khih kha run zong au” a rak ti ve. An vun zong i a thlam an vung thleng nan zohman ve tu le hmuaktu an nei lo. “Maw Ngan Bo ra cawl hrih aw hen” an hi ti. Ngan Bo cun, “Ee” a ti hai. A ra cuang lo. Tawkfang ah, “Maw Ngan Bo, ra cawl hrih aw hen” an ti lala. “Ee law” a ti i, a va cawl cuang lo. An ko sal thotho i Ngan Bo khal cu a va cawl ve. Kawlmi mang cun Ngan Bo a hmuh cun a mit a la nasa. A zohah ṭha le mawi a ti, a mit hman thep hna thiam loin a zoh. “Na vainim in va eh aw” a ti. Ngan Bo cun, “Kei i vaainim cu an se tuk lawmmam, paw belte lawnglawng an si” a ti i dong cancan a va la i a rawh sak hai. “Na fanghma in va lawh aw” an ti lala. “Kei i fanghma cu si le hma thawn, kawihkawlem vek lawnglawng an si” a ti i a zen ṭhaṭha a no tete a va lawh sak i a zelh hnu ah a pek hai. “Hrik in zoh aw” an ti thotho. An hrik cu a zoh sak hai i, “Nan lu ah hrik a um lo, theihmu lawnglawng a um” a tii hai.

Ngan Bo i cetcangzia kha an duh ruangah, “Na nu le na pai’ hnenah kan hung leng ding i Thlim Can nupi dingah kan hung be ding, asinan nangmah kan lo nei ding” tin an sim. Kawlmi mang te cu Thlimcan nu le pai hnenah nupi bia in an hung leng.Tlimcan nu cun a fanu Thlim Can i felzia le ṭhatzia a mawi zia cu tii in a rak porh a rak sim hai. An nitin ni a kimin Kawlmi mang pawl cu an hung thleng. Thlim Can nu cun a fanu Thlim Can pasal nei ding tiah a thuam ṭhaṭha in a ceimawi hnu-ah Ngan Bo kha, “Na nau pasal a neih ding ruangah hi thlah phah awla, na tlun lamah zaanthing rak phur phah aw” a ti i bawm thawn a thlah ter. Kawlmi mang pawl cun mo cu lungawi zetin an lawi.

Lam hlat nawn an thlenin Ngan Bo cun, “Kei ka kir thlang ding, ka kiir lamah ka ning a ṭih ding” a ti. “In rak thlah hrih aw la” an ti. Tlang dang an liam sal. Ngan Bo cun, “Ka kir thlang ding” a ti sal. “In rak thlah hrih aw la” an ti lala. Tlang dang an liam sal. Ngan Bo cun, “Ka kir thlang ding, lam a hla tuk zo. Ka ning a ṭih ding” a ti. Lam a hlat nawn thlang ruangah an tii i a thing phurh ding cu an hlam sak hnu-ah Thlim Can cu, “Nang ka lo ṭhi lo, na nui thingphurh ding a tii kha hi phur phah aw” an ti i Thlim Can cu an khir sal. Thlim Can cu ningzak le ninghang cemin, “Ka nu e” tiah a puan lukhuh i ṭap phahin a rak ciammam i inn a va thleng. A nu cun, “Na ning hman zak loin mai nau i pasal neih ruang i e” a tii i a rak vuak bet. Thlim Can cun, “Ka nu e, keimah hokhaw ka si” a ti i a puanlu khuh vun ong na khaw, “Ka fanute ziang can saw na can a ti i ninghangin a ṭahpi ciammam. “Ngan Bo rak ngai seh, a ham ṭhat le ṭhat lo” a ti.

Kawlmi mang tei sung pawl cu mothar hmuakin lungawi aipuangin puai an tuah i an nuam. Ngan Bo khal cu innsang tharah mawi le felte’n a leng thiam ve. Zing khat cu a ni nuu-in, “Ngan Bo vok rawl va pe aw” a ti. Vok rawl cu va pe zik khaw, “Ka ni, vok kuang sungah ṭhi-hna ka hmu” a ti. A ni cun, “Pek cih mai aw” a ti. Asinan Ngan Bo in a vung sar i a ret ṭhat. Sumdeen a fial lala. Sum sungah cun a ni nuu cun kep a rak ret thup. “Ka ni, kep a um” a ti. “Deen cih mai aw” a ti thotho. Pamhmai in a ti i a lak. A ni nuu in Ngan Bo i felzia le ṭhatzia a hmuh tikah a lung a kim nasa i a duhdawt zet. Cutin nuam zetin an umkhawm hai.

Nikhat cu Ngan Bo cu a nu le a pa in “Kan ngai tuk, hung tlawng seh” tin an cah. Kawlmi mang khal cun an that pang ding ti a phaan ruangah a sal rual pawl thawn a thlah i, “Na pi hi ziang khal an fial le nanmah in hung ṭuan thluh au. Zianghman hung ṭuan ter aw hlau” a ti ta hai. Thlim Can nu le pa cun an rak lawm i an rak hmuak. Thlim Can nu le pa cun Ngan Bo cu ziang khal an fial le, ”Keimah, keimah” an ti i Ngan Bo i ṭuan ai ah a sal rual pawl cun an ṭuan sak thluh ṭheu. Nikhat cu lo cul-ah vok rawl ding hnahcang put an fial. Sal rual pawl cun kanmah kan pu ding” an ti i hnahcang pu dingin an feh hlo thluh.

Ngan Bo cu a nu le a pa pawl thawn innah anmahte an rak um. Thlim Can nu cun caanṭha a tii i tap parah tisa belpi in a soh i a ret ter. A hrukpi kha zaute hnuai ah a tlak ter hrim. Ngan Bo cu a hrukpi tla vung sar a fial. A sal rual le zohman an um nawn lo. Hnahcang pu dingan an rak feh thluh zo. Ngan Bo cu zaute hnuaiah vung ṭum na khaw a kuun zawngah tisa belpi kha a vun toih i Ngan Bo cu a kaang ṭawt thluh i a thi ta. A sal rual pawl an ra tlun hlanah Ngan Bo i thuamhnaw kha an hlih i Thlim Can an hruk ter. Ngan Bo i ruak cu hnarpawnah pherin an zual i an rak hlon.

Sazaw in Ngan Bo i ruak kha a hmu i meihol le meisa thawn a va sem a va sem i Ngan Bo cu a hung nung sal. Sazaw cun a nau umtu dingah a hruai. Nitin Ngan Bo cu naute a um i,
“Khua i hlanah Kawlmi mang nupi ka si,
Atu ahcun pu sazaw i naute ka um”
a tii i hla a sak ṭheu.

Kawlmi mang i sal rual pawl cu an pinu thawn an vung tlung sal. Kawlmi mang cun Ngan Bo a si lo tii a rak thei. Asinan ziang aw ti ṭha Ngan Bo cu a thi zo. Thlim Can cu a nupi bangin a tuah ko. Zingkhat cu a ni nu cun, “Sihmui va phom aw” a ti. Sum sungah kep a va hmu. “Ka ni, sum sungah kep ka hmu” a ti. “Phom cih mai aw” a tii i, a phom ruai thluh. Vok rawl pek a fial leh. Ṭhi hna a rak um lala. “Ka ni vok kuang sungah ṭhi-hna ka hmu” a ti. “Pek cih mai aw” a ti i a pek cih. Kawlmi mang nu cun Thlim Can i nunzia a hmuh tikah a bei a dong ko. A mo hlun Ngan Bo kha ziang tlukin ha a ngai ding.

Nikhat cu Kawlmi mang cu a sal rual pawl thawn lo an feh. An thlawhri pawl cun,
“Khua i hlaanah Kawlmi mang nupi ka si,
Atu ahcun pu sazaw i naute ka um”
tii i hlasak aw thawm, sal rual pawl cun an thei. An pupa cu an sim. Kawlmi mang cun na pinu nan that zo, ziangtin ha cuvek thil a um thei nawn ding a ti i a ngaihsak lo. Amahte hman a umhar lungleng um ngaihnak theih lo laiah cuvek thu cu a hnasungah a lut thei lo. Asinan sal rual pawlin cui hla awte thawng cu an thei sal lala. An pupa cu an sim sal. Kawlmi mang khal cun hun ngai ve khaw,
“Khua hih hlanah Kawlmi mang nupi ka si,
Atu ahcun pu sazaw i naute ka um”
tii aw te cu Ngan Bo i aw te bangin Kawlmi mang i hna sungah cun thlumte’n a ra thang ve. Sal rual pawl cu an va tlan i va zoh na hai khaw an pi Ngan Bo kha a rak si. Hruai tlung an tum nan a duh lo. Ziangahtile sazaw i minung a si zo ruangah a si. Kawlmi mang khal cu a lungawi um ngaihnak hman a thiam lo. Mithi hnu kir leh sal cu. “Ka mang a si pang maw?” ti’n nuai aw rero in a um.

An hruai tlung theinak ding ahcun sazaw kha biak lem a ṭul ti a si. Zaanlam khua a siim cun sazaw cu a rung tlung. Kawlmi mang pawl a inn khatin an rak um ruangah a tin ngam nawn lo. A inn kap ahcun hmuansak hmuanthlang helin a tawi a vak zok rero.

Sazaw a rung tlun ngam nawn lo kha an hmuh tikah, “In ṭih aw hlah, zianghman kan lo ti lo ding. Na nau umtu kan lo dil tum ruangah a si” an ti. Cutin a vung tlung i “Na nau umtu hi hruai kan duh, a man ziangzat ha na ngen ding?” ti’n an sut. Sawzaw khal cun, “Banhla bukhat le meihol bawmkhat i pe au la, nan hruai ding” a rak ti. Cutin a ngen vek cun lungawi zetin an pe i Ngan Bo cu an innah an tlun.

Kawlmi mang cu Kawl nam samseu in a tat i pakhat hrangah hnahcang, nam mawi te’n a tuah i dar phaw mawi zetin a ben sak. Kawl nam cu Ngan Bo a hman i Hnahcang nam cu Thlim Can a hman. Nan sat aw ding i a nehtu tu ka nupi nan si ding a ti hai. An hun sat aw cu Ngan Bo cun Thlim Can cu a sah that. Thlim Can a thih cun a sa kha ralcabelpi sungah an san i a thaw suak lo dingin ṭhate’n an ṭen hnuah a “put”.

Ni rei nawn hnu-ah cun Kawlmi mang cun, “Ka pi le ka pu kha rung tlawng hai seh law, kan ngai tuk thlang” ti’n an hun cah. Thlim Can nu le pa cun, “Kan fanu Thlim Can in in hun cah” an ti i lungawi hngakhlap zetin an vung tlawng. Kawlmi mang inn an vung thlen tikah Ngan Bo cu a puan lukhuhin a rak it. Thlim Can nu cun, “Cante, ra tho aw, na nu le na pa kan rung thleng” a va ti. Asinan a puanlu a khuh ṭha deuhdeuh i a it thotho. A nu cun, “Ra tho aw” a ti rero nan a tho duh cuang lo. Kawlmi mang cun, “Ka pi, kan lo cah laiah nan rung duh lohli lo i a ngol, a thin a heng a si kha. Lehhnu deuhah rung tlawng leh au la tu cu hitin hung tlung hrih au. Ralcabelpi i sathu kan thut mi hi hun phur aw la a tii i an belpi cu a phurh ter.

Thlim Can nu cun, “Ka fanu Cante in sathu belpi khatin in phurh ter, hmuansak te, hmuanthlang te pawl sathu ra tok cio u law” a ti i an innhnen pawl cu a sathu tok ding cun a sawmkhawm hai. Innhneen pawl khal cu lungawi zetin an ra suak cio i sathu cu an tok ruuri hai. An hmuansak pa cun vun tok na khaw, “Ai e, hi cu Thlim Can i kut a bang” a tii. An hmuanthlang pa’n a tok ve in, “Ai e hi cu Thlim Can i kee te a bang” a ti lala. Thlim Can nu khal cun, “Ziang ha nan reel rero. Thlim Can in i phurh ter hun si ah” a ti san hai. An kotka pa’n a hun tok ve i, ”Ai e hi cu Thlim Can i luruh te a bang” a ti lala. Thlim Can nu khal cu a lung a nuam nawn lo i va zoh na khaw a fanu Thlim Can i luruh ah a rak cang. “Maw ka fanu e, ziang can si maw na can e” a tii i a ṭap a rak nan, mithi hnu a fanu Thlim Can in zianghman a sawn thei nawn si lo. An sankhat nun cu mithli thawn an cem ta.

Kawlmi mang tei sung, Ngan Bo cu Thlim Can a thih hnu cun nuam le lungawi thin hnangam ten, ziang dang ngai nawn loin an sungkua cu nuam zetin an rung nung lan ta.

Ref :: Thuanthu Roling Cabu
Salai Pa Sang
Zuk:: Original neitu ta

One Reply to “Ngan Bo le Thlim Can”

Leave a Reply

Your email address will not be published.