Na Bawm Thei Ding Ahcun A Lak In Kirter Hlah

2 min read

Phunsang tlawng kiangah rawldawr fate tak pakhat a um. Cuih rawldawr ah tlawngta pakhat a ra ih aw dim ten, “Rawl hmeh tel lo in, rawl puai khat in leiter thei pei maw? Tangka ka daih aw lo ruangah,” tin a dil.

Rawldawr neitupa cun tlawngtapa ih cah vekin hmeh tel lo in rawl puai khat cu cabuai parah a vun ret. A kir zik zawngah tlawngtapa in, “Aw…rawl hmeh tel lo, buh lawng puai khat parcel in tuahsak thei pei maw?” tin mithmai nau zet in a dil lala ih dawr neitupa in, “Ngah tuk e, ka nau. Cucu ziang ruangah buh lawng parcel tuah ding na duh. Ziangmi hrang dingah saw?” tin a sut ih tlawngtapa in, “Aw…zanriah ka ei dingah,” tin a ti.

Cutikah dawr neitupa in tlawngtapa cu a zoh tikah a zangfah tuk ih, “Aw…khawpi ah tlawng na hung kai nan, na nu le pa in tangka an lo kuat thei lo si maw. Na nu le pa hi an harsa zet ding a bang,” tin a thinlung ten a ruat.

A ngaingai ahcun hih rawldawr neitu nupa khal hi neinung le milian an si lo, tui ni ṭuanman ngahmi tui ni hrang an ei in hrang si ve ko. An rawldawr hman hi an san copmi dawr a si. Rawldawr tuah an si nan, an harsa zet ve. Asinan an thinlung sungah mi bom duhnak an rak nei.

Tlawngtapa cun hmeh tel lo, buh lawng a cah nan rawldawr neitu nupa in hmeh khal an pe. Tlawngtapa cu a lungawi tuk ih pumpuar zet in a ei. Cutin tlawngtapa cu tlawngkai a ṭheh, buai a ngah tiang cuih rawldawr ah rawl a ei ringring. Rawl man a pek thei lo caan tla a tam. Asinan nupate in ṭha ṭen an rak zoh. Tlawngtapa cu tlawng a ṭheh tikah kum 10 lenglo a rei hnu khalah hih rawldawr ah veikhat hman a feh/thleng dah nawn lo.

Nikhat cu rawldawr hmun neitupa in a hmunram a zuar thu le hmun dang ah ṭhawn ih an zuar ṭul ding thu nupate hnenah a sim tikah nupate pahnih cu an khawruah a har; an beidong ih thinhar zet in an um. Cutiih an um lai fang ah an inn hmaiah mawṭaw pakhat a hung cawl ih mawṭaw sung ihsin mipakhat cu an hnenah a ra. Cupa in nupate hnenah, “Kei hi company pakhat ih manager pakhat ka si. Ka boss hi nan suanmi rawl hi thaw a ti tuk ih, a duh ngaingai. Curuangah kan company kiangah rawldawr tuah dingin zangfah in dilter,” tin a sim.

An nupa in an mangbang tuk. Hivek kan rawldawr siate ah ziang vek milian si rawl ra ei dah ding an ti rero. Rawl zuarnak an hmanmi pakan pawl asile a siate lawnglawng an si tikah company tum tak kiangih rawldawr tuah ding cu a cang thei lo tin an el.

Cutikah manager in, “Cumi hrangah nan ruahhar duh hlah uh. Ka boss in nan ṭulmi ziang kim a lo tuahsak ṭheh ding. Nannih cu rawl/hmeh lawng nan suang ding,” a ti. Cutin annih khal company kiangih rawldawr tuah ding cun an lungkim.

An nupa in cuih milianpa cu ziang ruangah hitluk in kan parah a ṭhat tuk ti hi an thei lo. A netnak ahcun an parah hitluk ih milian miṭha hi zo dang a si lo; cuih milianpa cu tui hlanah an hnenih rawl ra ei ringringtu tlawngtapa a si ti an theisal.

An tonawk tikah milianpa in, “Ka pi le ka pu, nanmah in in bawm lo sehla kei vek men hi hivek dinhmun ka thleng thei hrimhrim lo ding. Ka parih nan ṭhatnak hi ka hngilh thei dah lo ding. Atu vekih nan hrangah tuahsal theinak caan ṭha ka ngah hi ka lungawi tuk. Nan ṭulsammi ziang kim hmaisong lo ten in sim uh maw,” tin a ti.

Zirh Duhmi
(1) Midang parih thil ṭha kan tuahmi hi a lak a si dah lo. A tikcu caan a kim tikah kan hrangah par ṭha par in, a rahsuak leh ṭheu.

(2) A lo bawm theitu lawng bawm lo in, a lo bawmsal thei lotu ding pawl khal bawmtu si hi a sunglawi bikmi bomnak a si.

(3) Na parih thil ṭha tuah dahtu kha ziang tik hmanah hngilh hlah.

(4) Thil ṭha kan tuahmi pawl hi rel tam ciamco a ṭul lo. Cuih kan tuahmi thil ṭha sungah a nungmi zawnruahnak a um ringring.

Credit to original/Lawkanite Thuta Sapay
Lairawn Meifar
(41/2019)

Leave a Reply

Your email address will not be published.