Lothlopai’ Thuanthu
Vei khat lai ah lothlopa pakhat a rak um. Cui lothlopai’ vainim hmun ih vainimpawl cu thlairah thlaihnah ṭhatlam zuamawknak an tuah tinte’n a pakhatnak a ngah ringring. Curuangah cui’ lothlopa tonsuhnak tuah ding in thuthang palai pakhat cu lothlopai’ inn ah a va feh.
A inn a va thlen tikah lothlopa in a vainim ci pawl cu a venghnen lothlopawl a zem rero lai a va hmu. Tonsuhnak a tuah tikah thuthang palai cun, “Tu vek ih na vainim ci pawl na zem rero ahcun hmai kum Thlairah Thlaihnah Puai ah laksawng an ngah thluh lo ding maw?” tiah a sut.
Lothlopa cun, “Kan vainim hmunpawl hi an peh aw thluh hai. Thli a hran tikah vainim vuipawl ihsin baa fatakte pawl cu thli lakah an zam ih vainim kung pakhat le pakhat ci an zaih aw. Curuangah ka cin mi vainim ṭha hmansehla ka lo kiang ih vainimpawl an ṭhat lo ahcun ka vainim khal a ṭha thei lo ding. Curuangah vainim ci ṭha veve ci zaihawkter ka duh ruangah siseh, ka venghnenpawl bom ka duh ruangah siseh, hivek ih ka zemnak a si,” tiah a sim.
Minung khal ah venghnen le rualpi, tlanlennak hmun le ram tivek hi a thupi zet mi an si ve. Kan tlanlennak hmun le ram, kan venghnen le rualpi ih zir in kan hmailam umtudan ding tampi a thleng aw thei.
Sirhsan: Mg Sai – Lothlopai’ Thuanthu
Siang Lian Uk Kianghrol
