LIAN DANG TUANBIA

Lian Dang Tuanbia

A hlanah Hairawn khua ah Za Khit a rak um an ti. A nupi ah Tin Sung a rak thit. Tin Sung cu mi rianțuan duh ngaingai a rak si. A eipah zong hin rian cu a țuanpah lengmang. Za Khit nih cun, “Tin Sung nakin a țuan deuhmi cu an um theo lai. Ka mak lai i hi nakin a țuan deuhmi nu ka kawl lai,” tiah a ti. Cucaah Tin Sung cu a mak. Nupi kawl ah cun a vak i a ih phaphei in lahmun a peh len komi Dar Tang a va hmuh. A ih phaphei hmanh in lahmum a pehmi cu rian a țuan tuk theo lai tiah a ruah i Dar Tang cu a thit. Asinain rianțuan a huam lo, mithathu cikcekmi, ih lawng a rianmi nu a rak si. Tin Sung he an țuan ciami rawl vialte kha an ei dih cang i, ei awk an ngeih ti lo caah Za Khit cu rawl fir ah Kawl ah a kal.

Kawl nih cun, “Za Khit nih kan facang vialte a kan fir dih, zeitindah kan tuah lai?” tiah an i ceih lengmang. Mah hnu cun, Za Khit a tlun kal tawnnak lam ah khor thuk pi in an cawh i, i hngal lote in an tuah. Za Khit cu zan ah facang fir ah cun a ra i khor an cawhmi chungah cun a tla. Kawl nih cun Za Khit cu khor chungah cun an tlaih i thong an thlak. Za Khit cu thong chungah cun kum kua a tlak ah a nupi Dar Tang cu ka va hi a tlung ti lem lai lo, tiah a ruah i Hairawn khuabawi Chawn Ceu a rak vat.

Mah lio caan ah cun Kawl siangpahrang nih puai nganpi a rak tuah. Mah puai ah cun, “Laimi pa Za Khit kha va au tuah u,” tiah Kawl siangpahrang nih cun a ti hna. Za Khit cu thong ah cun an va auh i puai ah cun an chuahpi ve. Kawl siangpahrang nih cu, “Za Khit, nan hla i thawh tuah,” tiah a ti. Za Khit nih cun bawikil aw in hla cu aa thawh i,

Bawikil
“Kawnglawng le, fazai buh hmanh cu ei ning law
Hlawh chin rawl, ka nu Kipkai chuan ngai ai ing cu ka ngam hin lo cu”

tiah a ti. Kawl siangpahrang cu Za Khit a zoh ah cun a ngaih a chia ngaingai i, “Za Khit, i thawh rih,” tiah a ti țhan. Za Khit nih cun hitihin aa thawh țhan.

Bawikil
“Kawlrawn in, thlatangpa va cuan lai ing kaw,
Ka nu le, Tinsung an țap maw rundai ah ti lawng hei nawl ai ing.”

tiah a ti. Kawl siangpahrang nih a zaang a fak tuk i,”Thlah zokzok u” tiah a ti hna i an thlah colh.

Za Khit cu thong chungin an thlah cangkate cun a khua lei ah a tlung. Zan khua mui ah a va phan. A nupi va dang a rak ngeih kha a theih rih lo caah an inn kha a va fuh i Liandang aw in hla aa thawh.

Liandang
“Tluang khuachin in tlung ai ing kaw, Dartang ruun ka hung,
Nang lo in e ih zan cheu hmanh Tinung me hlah ing.” tiah hla in a vun thangh.

Dar Tang nih cun,

Liandang
“Tluang na tlawn cu na rau tuk ca kaan hngak kho ri lo,
Bungci bang hawi mi ian lote Chawnceu za ka zawn.” tiah a leh.

Za Khit nih cun aa thawh than i,

Liandang
“Tam lai ruah ah khuachin tluang ah, hri le hreng ka tla,
Na zak lo maw tlinkhandang ah, val za zawng nu aw.” tiah a vun ti.

Liandang
“Ka zahnak zei um ri lo e, sumzik hniar va hawi,
Nganriatsa bang nang vang ah e, kum kua leng fawh ing.” tiah a vun leh than ve.

Mah hnu cun Za Khit cu a thin a hung i a hlan i a mak ciami a nupi hlun Tin Sung sinah a va kal. A nupi hlun cu,

Liandang
“Tluang khuachin in tlung ai ing kaw, Tinsung run ka hung,
Nang lo in cun ih zan cheu hmanh, Tinung me hlah ing.” tiah a vun hnangh.

Tin Sung nih cun aa vun thawh ve i,

Liandang
“Ka lu cung i ka sawmai nih, vaurawng par lo ai,
Za tiancia khi a kom thanmi ho val kan hngal lo.” tiah a vun leh ve.

Tin Sung cu ihnak cun a tho i a hni chung le a hniren thar aa fenh i pawkhlet ah a hmai aa phiah i innka cu a hunh i mah zan cun nu le va ah an cang than.

Za Khit nih hin a hawile sinah hitihin a chim tawn. “Kei cu fapa hring ning law, a min ah Lian Dang ka sak hnga,” tiah a ti tawn.

Caansau nawn Tin Sung he cun an um i a nupi cu pumlawng lo in a um. A ni thla cu a hung tlin tikah fapate cu an hun ngeih taktak. A min ah cun Lian Dang tiah an sak. Lian Dang cu a kepi a bul cia in a chuak. A chuahkate ah inntang ah a rak tla i zu pakhat a rak tlaih. A nu le a pa nih mah zu a tlaihnak cu Lian Dang a thawn lainak le mi teitu a si lainak kha khuazing nih a hmuhsak an ti. Lian Dang cu a thang ve i lentecelh hi a duh ngaingai. A mar a zang i tlik zong a mu ngaingai. A thi khat hawi lakah hin a thawng bik cem a si. Lian Dang a hmet lio ah hin a pa cu Tiphul ral nih an rak thah. Lian Dang cu a hung thang lengmang ve i tlangval thawng ngaingai a si. “Ka pa a thattu Tiphul ral hi ka thah dih ve hna lai,” tiah aa ruah chih caah Tiphul lo a kalmi paohpaoh cu lo lam in a bawh hna i a thah lengmang hna. Lian Dang cu a thawng ngaingai i a min a thang. A nu nih nupi a thitpiak i a min ah Khuang Tawl a si. A nupi cu pumlawnglo in a um. Lian Dang nih cun,”Thaizing khual kan tlawng lai,” tiah a ti. A nupi nih, “Atu lio khualtlawn cu ningțih na ti lo maw?” tiah a leh.

“Zeidah na țih,” tiah a hal. A nupi nih cun, “Tiphul ral le huho zawng ka țih,” tiah a leh. Lian Dang nih cun, “Tiphul ral le huho zawng tehna va țih cu,” tiah zeirello nawn khin a ti. Mah an biaruahmi cu Tiphul ral nih an theih hna i, “Khual cu tlawng citcet hna seh, kan thah hna lai,” tiah an ti i lam in an rak bawh hna.

Lian Dang le a nupi cu khualtlawn ah cun an i thawh i an kal. A nupi cu hmai ah a kalter. Tiphul ral nih a nupi cu fei in a thin hmaka in an khawh i a thi. Lian Dang cu a mar a zan tuk caah fei cun an khawt manh lo i inn lei ah a tli.

Lian Dang cu a nupi zuun ngaih in a um zungzal ko. Nikhat cu a nupi cu rau in a lang. “Lian Dang ka auhpiak u,” tiah a ti. Lian Dang cu an va auh i a va kal. A nupi nih cun,

Liandang
“A kha nih maw Tiphul ral le, huho zawng na ti,
Numi dah ti’n hni kua laang e, Liandang veng seh ti’n.” tiah hla in a hun ti.

Lian Dang nih cun hla a vun leh ve i,

Liandang
“Lam chak chuak i phaw chon le maw, fei leh cia hrat nih,
Liandang ka mar a zan caah va bang zuang hruak ing.” tiah a vun leh ve.

A nupi nih cun a hun leh than hoi i,

Liandang
“Keimah ko vang ah maw hram run rel hin ti lai ci,
Na ka ngaih ah thawl tial in e zuunrau ti ka hun.” tiah a hun ti than.

Lian Dang nih cun a vun leh than ve i,

Liandang
“Keimah bang in aa zul liomi , nuva tang ka then,
Phu vung khir lang siang rawn ah e, Ciatang ngamnak ah.
Ngul ah fu law va laileng aw, Ciatang ngamnak ah,
Phu vung khir lang siang rawn ah e, Dartang ka zul law.”

tiah a ti i a nupi cu a chuak ti lo.

Mah hnu cun Lian Dang nih nutar patar sinah hin Khuang Tawl min aa sakmi hi khuazei tal ah an um hnga maw? tiah a hal hna.

Ni khat cu tarnute pakhat nih, “Khuang Tawl cu na ral khua ah a um. Na kal ahcun an in thah lai. Kal duh hlah,” tiah a chimh. Asinain Lian Dang nih cun a duh lo i Khuang Tawl umnak khua kal cu aa tim. Zan ah a kal i lampi i a tonmi hna paohpaoh a rak thah hna. A hnu bik ah Khuang Tawl umnak cu a va phan. Khuang Tawl inn ah cun a um i Khuang Tawl cu maw pakhat a ngei. Lian Dang nih cun, “Khuang Tawl cu, thaizing lo nan kal tikah na mawnu hi larang rak i thlur seh law hmai rak sakter te,” tiah a ti. Lian Dang cu zingkate in a tho i an khua thlang lungpi hram in a rak bawh hna.

Khuang Tawl le a mawnu cu zingkate in lo kal ah cun an i thawh. Lian Dang nih zan i a chimhmi bia kha a nupi nih cun a philh dih. Cucaah Khuang Tawl cu larang aa thlur i hmai a sa i a mawnu nih cun a hnulei in a zulh. Lian Dang nih a rak bawhnak hna hmun cu an va phan. A rak zuanhnawh hna i hmaisa nu cu a vainamin tan thum ah a sam. A mawnu tu cu a hnulei ah aa let i an khua lei ah a tli. Lian Dang nih a sam minu cu a vun zoh i, “Ai ze kan hmawt ko lo mei!” tiah a ti i a vun pom. Khuang Tawl ruak cu thate in a fimtak i, an khua lei ah a lung a kuai bute in a tlung. Kum thum chung a nupi zuun a ngai.

Kum thum a tlin hnu in a vainam cu aa lak than i a lo i a kalmi a bawh hna. Ngaknu nute pakhat cu thil ritpi a phawrh i a hung kai kha a hmuh i Lian Dang nih cun,

Liandang
“Aho nu maw siakin va bang, hui law hai a ti,
Phu vung khirh lang paihbual ah e, Kei in chaang rih lang.”

tiah a ti i lung nganpi in a vun cheh.

Ngaknu nute a thi i Lian Dang cu inn lei ah a tlung. Ni khat ah Lian Dang nih cun a vainam cu a lak i a tat lio ah hin hla aa thawh.

Bawikil,
“Ka kingtial, nam hi maw Pangken an hlum lai
Khuangtawl ka, samnak rimhrim cang ai lang bual ah ka hler ngam hnga maw?”
tiah a sak pah lengmang.

Mah hnu cun Lian Dang nih cun “Khuang Tawl min a sakmi nupi ka kawl rih lai,” tiah a ti. A mi kip a hal lengmang hna nain, “Khuang Tawl min aa sakmi cu kan hngal hrimhrim hna lo,” tiah an rak ti. Asinain nutarnu pakhat nih, “Khuang Tawl cu khi khuaah khin a um. Asinain va kal hlah. An in thah lai,” tiah a ti. Lian Dang cu duh lote in mah khua ah cun a va kal i a kalpah ah mi a hmuhmi hna paoh cu a thahpah lengmang hna. Zan ah Khuang Tawl inn ah a lut. Khuami nih an dum kha a theih tikah a chuak i a khua lei ah a kir.

Mah hnu cun Khuang Tawl khuami hna nih cun, “Nan tumbut ah vutcam nan thlet cio dih lai,” tiah khua an au.

Khuang Tawl cu a thle duh lo. A thlite in a khuami nih tumbut ah cun an thletpiak. Zan ah Lian Dang cu a ra i Khuang Tawl sinah a it.

Zan thlapa vang ah Khuang Tawl tumbut cu an zoh i Lian Dang keneh a luh kha an hmuh. A inn cu thap thum in an kulh. Pathawng deuh vialte hmai tlang ah, pader deuh vialte a changtu tlang ah, a der bik hnu bik tlang ah ti in inn cu an kulh. A mit cu le a hnapduk he, pachia bik pa cu hnulei bik ah khin, “Nang va um ko,” tiah an ti. Cu pate cu hnulei bik ah cun hau hram te ah a fei ban cante cu aa put io a dir ve ko.

Khuang Tawl nih Lian Dang thah an zalh ti cu a hngalh caah a tho duak i a arpi rai lio a thah; buh ah kawnglawng thau a chuan i, “Lian Dang tho, rawl kan ei lai, na ral nih an in dum dih cang,” tiah a țhangh. Lian Dang cu a zeipoi lo in a hngilh thluahmah ko. Khuang Tawl cu Lian Dang a thawh duh lo cun a khuarauh a har i bawikil aw in a thangh than.

Bawikil,
“Tho ai law, muahang an borh bang fim ngaan in,
Nang tlei hi, kan lai zazuat ar khuang hnga maw van toi chum kai luaimai” tiah a ti.

Lian Dang nih cun bawikil aw in a hun leh.

Bawikil,
“Ka domh law, Hlawnnem aw ka lu tung ngaan in,
A lian nih, hran ling chawn ah ka tonh lai hna zei ka ti ti hnga maw?” tiah a ti.

Mah hnu cun Lian Dang cu a tho i rawl cu an eiti. Rawl an ei khawh cun a vainam cu aa lak i a tat lio ah a ral hna nih cun “Lian Dang chuak,” tiah an auh. “Lian Dang nih, “Ka vainam kaa tat lio,” tiah a ti hna. “Lian Dang chuak,” tiah an ti țhan. “Ka lupawng kaa pawnh lio,” tiah a ti hna. “Lian Dang chuak” an ti țhan. “Ka biar kaa kaih lio,” a ti hna. “Lian Dang chuak,” an ti țhan. “Ka puan ka sawihnawt lio,” tiah a ti hna. “Lian Dang chuak,” an vun ti țhan. “Naisai lo, keimah Lian Dang chuak lang iai,” tiah a ti i chaklei vampang a hun zunhnawh i vampang he minung he a sam dih hna. Thlanglei vampang a vun zuanhnawh i vampang he minung he a sam dih hna. Innka cun a chuak i innleng par ah a va pet. Tumbut ah a tum i an pathawng bik hna thap cu a sam dih hna. Hnulei i a dirmi hna thap zong cu a tlikpah cun a sam dih hirhiar hna. Hau hram i zei santlai lo pa feichek aa putmi pate cu a hmuh i, “A nang hoi hi thah awk hmanh ah kan rel lo,” tiah a ti i a taw a keuh tak i hau leng ah a chuak. Miderthawm pate nih cun, “Aw! Lian Dang hi a luat hoi ko lo mei,” tiah a aupah in a feichekte cun a hei khawh i a vanchiatnak ah Lian Dang thapet ah a thari cat ko a hei khen i Lian Dang cu a kal kho ti lo.

Mider thawm pate nih cun, an chuah hnawh i kan tlaih lai a vun ti fate hi a rak sam lengmang hna. A ruah awk an hngal ti lo i a hnu bik ah hri in an tem i an hren. “Zeitindah kan tuah lai?” tiah an i ceih lengmang. A hnu bik ah, “Inn khat rathor keu khat cio in nan chuahpi lai,” tiah an ti hna i an khuapi keu khat cio in an chuahpimi cu thawrdur kua a ti. Inn khat futhul khat cio in nan chuahpi rih lai,” an ti țhan hna i pakhat phor a chuak. “Inn khat thing phorh khat cio in chuahpi țhan rih u,” an ti hoi hna i thingai ai kua a chuak.

Mah hnu cun meiphu ngan piin an tuat i, futhul vialte cu an linh i Lian Dang cu an sawh. Mah hnu cun rathorhang cu an toih. Lian Dang cu hram lo aa lote in aa in ko i, mi vialte cu an khuaruah a har dih. A hnu bik ah Khuang Tawl cu an auh i, “Mah fathul hin na va Lian Dang cu na sawh lai i rathorhang hi na toih lai,” tiah an ti. Khuang Tawl nih cun a va Lian Dang cu a zoh tikah a ngaih a chia ko nain a khuami nih cun rumrote in an fial caah futhul cu aa lak i a sawh in sawh lo in a hnor in aa hnorter. Rathorhang cu a toih in toih lo in a thuh in a thuh. Mah hnu cun Lian Dang cu a thi.

Ref:: Lai Tuanbia App