Lian Dang le Ngen Tang cu hlan laiah Hairawn khua-ih a rak um tlang mi tlangval le fala an si. An pahnih in an rak ngai aw zetih thingphurh lothlawh le hnadang ṭuan khalah an sawm aw ringring in, an ṭuan tlang ringring ṭheu. Pakhat le pakhat hmu aw loin an um thiam lo. An um a har, an lung a lengih an hnaṭuan khal a nuam lo. Cuihrangah an nu le an pa veve khalin kharhmalnak um lo te’n an duhduhin an pawl aw ih an umtlang ringring ṭheu.
Veikhat cu an khua ah sethat conglam ding an umih an khawpi dang pawl cu conlaam nak hmunah zu an zawhih nuam zetin an um. Annih pahnih khal a dang tei’ nunnuam an duh ve ruangah Lian Dang in a falanu Ngen Tang cu, “Zingpitah di kan va phur ta duak pei” tiah a sawm. Cutikah fala le tlangval rak ngai aw cia mi an si ko nain, Ngen Tang in a ee mai lemlo. “A..tuisuun milam um caan ngelcel i ziangtin so! Tiphul ral tla an tam tuk lawmmamih ṭih a nung lo ding maw?” tiah a sut. Cutikah Lian Dang in, “A khai Tiphul ral thamtham maw na ṭih e, a sukah hu…ka ti pei i ka duh le a so ah ha …ka ti mai ding” tiah a ti. Culaifang ngelcel ah Ngen Tang tei’ innah mikhual pakhat a rak umih cu pa cun an thu rel mi cu a rak theih thluh. A cui mikhual pa cu Tiphul i sungkhat a nei mi mikhual khawdang mi a rak si. Cutikah, “Sihte puantawm sai hngakin” kan bangin thu cu a thangsin a thangsin vivo i a netnakah Tiphul ral pawl hnen tiang a thang khok lan ta. Tiphul ral pawlih an theih tik ahcun, “A nui chu Lian Dang” an tiih lamzin in an rak bawh thup.
Lian Dang i forh hratin Ngen Tang khal cu, “Suahkhel ruangah e” a tii i a tlangval pai’ duh zawng cu a thlun ta. An pahnihin thunuam an rel i an ṭong nuam laifangah zinsak hramhrul lakin ral pawlin an run nam i an rung dawi. Lian Dang cu mipa deuh vun ti fam cu a pet man i a tlan suak thei. A falanu Ngen Tang cu nunau deuh nanana tiah tlan man loin ral pawl cun an kaih ngah. Ral pawl cun that siang loin an zangfah. Asinan a tlangvalpa a thin na ceu seh tiah Ngen Tang cu a kut a ke le a hngawng an ngeelih thi ngah loin an tan ta. Ral pawl cu an khua a thlen hnuah Lian Dang hnenah hla fingkhat nautatnak hla an hei kuat.
“Hu si na maw Tiphul lei huho zawng a dawn
Hei kuat uh law hni thawi thum Lian Dang veng seh ti’n”
A sullam cu- Tiphul ral thamtham tiih a porh aw dah pa, huho le zawng tlannak hmuahhmuah tiang khal ka dawn thluh thei a ti aw pa kha zo so a si?. Lian Dang timi pa a si ahcun anih cu pacang ṭha a si nawn lo, nunau a si zo, thawi thum hni a veen awkah hei kuat sawn uh” ti a si.
Himi hla a theih tikah Lian Dang cu a thin a heng ngaingai. Curuangah pacang ṭha ka si vee ko sokhaw ti nakah hla hi ti’n a kuat ve.
“Lamsak ralih kam lo lunghu fiah nan um lo
Lian Dang ka ral ṭhat vangah va bang zuan zanging”
A sullam cu- “Rin lo pi i lamsak ihsin rak bawh mi ral cu zo khalin a thei cia nan um ce lo ding. Lian Dang mi vanṭha le mi huuham nei ka si hrangah vate bangin ka zuang man pang sual lam a si e” ti a si.
Cui hnuah Lian Dang cu a falanu’i ruak va hawl dingin an sulhnu kha a va tawt sal. Ralring zetin a thupte’n a va fehih hramhrul lak ihsin a ruak umnak cu a va bih dekdo. Cule Ngen Tang in a rak hmu hmaisa ih hitin hla in a rak bia.
“I ṭih ci maw zinghnam lei zaan i rawl hawl bang
Za i baan law na siangah ribat thliarthli lang”
A sullam cu- “zinghnam pawl rawl hawl dingih zaanih an vah lai an ning a ṭih zet vekin i ṭih maw si? Na kut zaa te i run hlaan awla, na siang ṭang paarah i paw aw” ti a si.
Cui hla a theih cun Lian Dang khalin hla in hiti`n a vun sawn ve—
“Man ṭih hlang e zinghnam lei zaan i rawl hawl bang
Zaa lo hlan lang ka siangah ribat thliarthli law”
A sullam cu, ”Zaanih zinghnam rawl hawl ningṭih vekin ka lo ṭih a si lo sokhaw. Atu na kut zaṭial i hun hlan awla ka siang ṭang paarah ka lo paw ding” ti a si.
Hi hla a vun leh zawngah a kutin a vun dirhih a zang paarah a pawkih a tlun pi. Lian Dang ih Ngen Tang a pawkih a tlunpi mi kha an theih sal tikah ral pawlin nautatnak hla pakhat hiti’n an kuat lala.
“Hi sina maw khai so lei a hung kai thei lo
Tan rit ci maw na thil Lian Dang kan sawk lang”
A sullam cu – “Kha tawk hmunso a thlen fang i a kai thei lo pa kha zo so a si. Lian Dang na thil phurh mi a rit tuk asile kan lo sawng ve ding sokhaw”
Ral pawl cun a tlun salnak ding lampi kha far kung pawl an hau kalhih a feh har seh tiah an rak phih sak. Cui hmun a thlen tikah Lian Dang cu a feh kel vek si nawn loin mina paw phah thaw cun harsa deuhin a um ruangah cu mi kha an rak phuah mi a si. Lian Dang khal cu an hla phuah mi a theih tikah cun pacan a cuhih hla a hei leh ve hai.
“Hu sina maw khai so lei farpi sawl hren,
Tan rit hlang e hih tluunah Ngun pangpar suang lang”
A sullam cu- “Khai hmunso thlennak fangih farpi sawl a rak hrentu kha zoso nan si?. Ka thil phurh mi cu a rit hrimhrim lo sokhaw, hih tlun hmanah Ngun pangpar khal ka duh le ka phur bet thei lai a si”
Ziangkhal sisehla Lian Dang cu a falanu a tlan sanih ral kutih a taan ter ruangah pacangṭha sinak cu a cem ṭheh ko. A thang a tlawm, a hmin a sia. Mi in an nautat rero ko. A mal bik a falanui’ phu tal a lak a ṭul tiah an ti. (Phula timi cu a aiawh ah pakhat khat va tuah suak ve ding tinak a si. Thuṭhimnakah raal va thah ve tivek).
Lian Dang cu cutiih miih reelsiatnak pawl a theih sal tikah cun a thin a tuar aw thei lo. Cuhrangah a falanui’ phu la thei dingin a ruat. Zaankhat cu zaanlai pi-ah a va feh hratih ral tei khua ah a va thleng. An khua a thlen ngahin inn pakhat ah a lutih nuu le paa rak nei aw pekte, a duh aw zet lai mi ihkhun tlunih rak pom aw hiahhiah pahnih a va tong ngelcel. Cule, “Aw himi hi keimah le ka falanu thawi a bangaw mi an si, sungrual le patar nutar vek thah ka duh lo, himi ngelcel hi ka hiarhal bikmi a si” a tiih naamte’n an nupa in a sun that.
A sunthat ve te’n a lungawi tuk le a thin diriam tukah zamrang te’n a tlungih an khawpi pawl hnen ahcun ka falanui’ phu ka la thei zo, tiah lungawi thu a sim rero. Asinan an khawpi pawlin Lian Dang i ṭong cu an zum thei ngaingai lo. “A mi thah mi cu khui ah so a sam? Khui ah so a hna? Pakhat khat tal kan hmuh ual lo. A thuphan maw a thungai ti zoso a rel thei ding?” an tiih nautatnakah an hmang sinsin. Cuisi cun Lian Dang cu a thin a na sinsin ih, “Aw… cukel e” a tiih a va feh salih a dang va thah sal a tum lala. Cule cufang ahcun Ngen Tang cun a hun thei i hiti’n hla a hun leh ta,
“Kei ih vangah thuang rawnin hraan rungrel hlah law,
Rial tikik le thawl tialin zuun rai thla i cam”
A sullam cu- “Keimai hrang ral thah phulak ding cu run rel sal nawn hlah aw. Tithawlin tidaai daai zetin thi i run siah awla zunrau thla i run cam sak men aw, a tawkfang e” ti a si.
Asinan Lian Dang cu a thin a na tuk i Ngen Tang i hla leh mi cu a thlun thei lo. Zaanlamah puan dum a keng hratih a kutah namte hriam zet kengin ral khua ah a feh sal thotho. Ral khua a thlen tik ahcun amai rak sun that tami nupala tei’ ruak pahnih kha remkhatah an rak tunih sungkhatin an rak ṭah rero laitak a si. An kotka a thlenin a puan dum a lu a khuhih, “Ka u le ka mo e, ka u le ka mo e” a tiih lungkhung zet vekin a ṭapih a vung lut vivo. An rem tunnak hmun ahcun a vung lutih a mithi ruak pahnih tei lu kiang ahcun ṭap thluahthlo phahin a vung to. Liang Dang a rung thlen zawngah patar pakhatin, “Lian Dang i ke a va bang so” tiah a rak ti. Cule mi zapi dang pawlin, “Ka pu e…na patar mit a si ding, a khai Lian Dang ṭihhrutpa kha ral khua ah ziangso a ra tuah ngam ding” tiah an ti san menih zohmanin an poi sa lo.
Lian Dang cu mithiruak kiangih a ṭah rero laifang ahcun mithi hna pali a hleh tan sakih a vaidipah a san. Cuṭhehin a ṭah a cawlih inn leengah a va suak. Tual zim a thlenin, “Lian Dang sokhaw ka si, nan mithi hna ka lo hleh sak, nan duh le i dawi uh” tiah diriamin a auh ta hai ih, an khaw ziin zawhin a tlan hlo. Pacang pawl cun “E he…na rim nam, na hang kha…”an tiih an thinhengin an dawi vualvo nan an man thei nawn loih hnartlang an thlenin an kir sal thluh.
Lian Dang cu a mithi ruak pahnih hna a hleh mi phur in an khua a vung thleng. An khua a thlenah Ngen Tang cu a rak cat thla zoih a ka a be man nawn lo. Lian Dang cu a hni le a ṭap lakah hnih ding maw ṭah ding ha a sii hman thleidang thei nawn loin a thin a hnaihnok. A falanui’ phu a lak suak thei mi kha a thin a vun zun zualzo tukih a mithi hna hleh mi kha ahun suahih hitin hla a hun phuah,
“Lian Dang hi e, a hnawm tin i soi hnga hlau law ral ka ṭha sokhaw,
Tintling tluunih duh rizau nuu le paa thian ing”
“Tintling tlunih duh rizau nuu le paa thian ing Phu tlun ing e,
ṭhuangrawnin Ngen Tang ko kir uh” a ti.
A sullam cu- “Lian Dang hi mi ṭawnṭai a si tiah i soisel hlah uh! ka ral a ṭha ko sokhaw. Ihkhun paarih duh aw zetih a ittlang mi nuu le paa tla ka ṭhen thei a si. Ihkhun parih a zau tlang mi nuu le paa ka ṭhen thei a si, Phu ka tlun thei zo, Ngen Tang kha i va kawh sak sal uh law”
Himi hla a phuah thei hnu ahcun an khawpi pawl khalin “Pacangṭha pakhat a si. Mai fala phu khal a la thei ngai ual, tiah an thei ngahih an upat sal thlang. Cuisin Lian Dang cu a hlanlai vekin pacangṭha pakhat ti’n miin an hmu thei sal.
Himi hla thluk le himi hla hi Zahau ram pawpi le tlavang aih tikah an hmang. “Lian Dang Hla” an tii ih pawpi aih pawl an thih le himi hla phun pawlin an thlah.
Ref:: Thuanthu Roling Cabu
Salai Pa Sang
Zuk:: Original neitu ta
