Leitlun ih Thil Mawibik

1 min read

Leitlun ih Thil Mawibik

Vei khat ah zuksuaithiam pakhat a rak um. Cui zuksuaithiam cun leitlun ih suaizuk mawibik pakhat suaisuah a duh. Curuangah thing thawi’ a tlangkhan tuah mi zuk suainak ding pakhat keng in, ram pakhat hnu pakhat ah a feh vivo. A tumtah mi cu leitlun ih thil mawibik hawlsuah ding a si.

Ni khat cu lamzin ah ralkap huaisen pakhat a tong. Zuksuaithiam cun ralkap cu a sut.

“Leitlun ih thil mawibik ziang a si?”

“Remdaihnak”

Ralkap cun a son thluh cun a fehsan. Zuksuaithiampa cu beidong in a lu a thing. Ziangahtile ‘remdaihnak’ timi cu a suai thiam mi a si lo.

Lehhnu ah fala no mawi zet pakhat a va tong. Cutikah zuksuaithiam cun a sut lala.

“Leitlun ih thil mawibik ziang a si?”

“Duhdawtnak”

Fala cun ṭhukṭhunnak zianghman tel lo in a sawn. Zuksuaithiam cu a bei a dong bet. Ziangahtile cui’ ‘duhdawtnak’ timi cu a suai thiam mi a si lo.

Cutin a feh vivo ih, lamzin pakhat ah sakhaw (biaknak) hnaṭuantu pakhat thawn an tong aw. Cutikah zuksuaithiam cun a sut lala.

“Leitlun ih thil mawibik ziang a si?”

“Rinumnak”

Sakhaw hnaṭuantu cun awkam zaidam zet ih a son hnu ah, a feh san. Zuksuaithiam cun a lu a thing thotho. Cui’ ‘rinumnak’ timi cu a suai thiam lo. A bei a dong.

Cutin a netnak ahcun thil mawibik cu hawlhmuh thei a zumawk nawn lo ruangah inn ih tlung ding in a ruat cat. Inn ah a tlung ih an inn sangka a thlen tikah a fapate cu aipuang zet le beiseinak sang zet thawi’ amah hmuak ding a ra tlan kha a hmu. A fapa cun ṭap phah in, “Papa, Papa,” ti’n a au ih a ra pom. A fapa ih dung ah a nupi a ra ih, a nupi cun a cal ah dimte’n a ra hnam. Inn ih a ra tlun sal sunlawihnak laksawng ah si.

Cuvete’n zuksuaithiam cun leitlun ih thil mawibik ziang a si timi a vun theithiam. A fapa in a pai’ parih a rinumnak kha a hmu. A duhdawt mi a nupi ih hnamnak ihsin dam sung daih duhdawtnak a hmu. Cui’ duhdawtnakpawl ahcun lungawi aipuannak le remdaihnak khal a hmu fawn. Cutin zuksuaithiam cun leitlun ih thil mawibik cu a suai khawsuak thei. Cui’ thil mawibik cu a innsang lala kha a si. Cumi hnak ih mawi mi thil dang a um lo.

Sirhsan: The Most Beautiful Thing in the World

Siang Lian Uk Kianghrol

13 Replies to “Leitlun ih Thil Mawibik”

  1. Pingback: EBET
  2. Pretty part of content. I simply stumbled upon your weblog and in accession capital to say that I acquire
    actually enjoyed account your weblog posts. Anyway I will be subscribing on your
    augment and even I achievement you get admission to constantly quickly.

Leave a Reply

Your email address will not be published.