Arcang Uang aw Sual
Russian canganthiam hminthang, leitlun ih nunthuleng nganthiam ropibik Leo Tolstoy in uanawk a ṭhatlozia tarlangnak ah thuanthu pakhat a sim. Hitin a si.
Leidawm ding ih penkhawm mi caw-ek parah arcang no pahnih nasate’n an sual aw ciamco. Pakhattu cu malte a cakvak deuh. Na deuh ih a sirh thei ruangah a rei hlan ah arcang pakhat cu a tlan. An sualawk ṭheh tikah a nehtu arcang cu arbawh le arpi pawl in an ra pan vualvo ih an ra fak hai.
Fala le nuho ih fak vualvo a vun hlawh cun arcang no cu a hnar a puar. Venghnen hmuan pawl ihsi khal ih hmuh thei thluhnak hmun fang-inn diphun parah a kai. Cu thluh in a thla khawng durdo in hitin a uang aw: “Hinah zoh hnik uh. Kan hmuan ih lalbik ka si hi. Hmuan dang ihsi teh in tawng ngam nan um maw? Ka siak a zum ṭha ti aw nan um asile ra suak hnik uh. Zo ka si ti……”
A khuang ṭheh man lo. Rilrawng ih rawl hawl rero muvanlai pakhat in a ketin khohkhah zet thawn a run thiar ih a bu ah zuanpi in a deh.
Laknak: Pay Myint – Tanphou Htarr-at-thaw Ayarmyarr, Yangon: Sarpay Lawka, 2004.
Siang Lian Uk Kianghrol
