RAL DAWN LE TUM SING TUANBIA

Ral Dawn Le Tum Sing Tuanbia

Hlan liopi khua pakhat ah nuva an um i fapa pakhat te an ngei. A min ah Ral Dawn a si. Ni khat cu Ral Dawn le a pa lo ah an kal. Lo an thlawh lioah anhling thei hmin dawh te khi Ral Dawn nih a hei hmuh. Cu thei cu rau dirdiar tein sen duk var khin a var i ai dawh ngai. Cu thei dawh te cu dah ngai tiah a hei lawh. “Ka pa, mah thei dawh tluk nungak dawh vawlei cungah an um hnga maw?” tiah a hal. “Kha tluk dawh kha cu ahohmanh an um lo, thlang ah Tum Sing bel a um” tiah a ti. Cu tikah cun a mui hmuh lo hmanh in a duh colh.

Ral Dawn cu Tum Sing kawl ah a kal. Biarpi tak nu khua a phan. “Ral Dawn zei na ti lai” tiah a hun ti. “Tum Sing ka thi lai” tiah a leh. “Keimah hi Tum Sing ka si hung ka thi” tiah Ral Dawn muidawh cu a hun duh tuk ah a hun ti. Ral Dawn nih cun a thei hmin putmi he cun a hei zohkhek i ai khah lo caah a lanhtak. A kal than i Puantlang tak nu khua a phan “Ral Dawn zei na ti lai” tiah a hun ti. “Tum Sing ka thi lai” tiah a leh. “Keimah hi Tum Sing ka si hung ka thi” tiah Ral Dawn muidawh cu a hun duh tuk ah a hun ti. Ral Dawn nih cun a thei hmin putmi he cun a hei zohkhek i ai khah lo caah a lanhtak. Cun Tawnlo tak nu khua a phan “Ral Dawn zei na ti lai” tiah a hun ti. “Tum Sing ka thi lai” tiah a leh. “Keimah hi Tum Sing ka si hung ka thi” tiah Ral Dawn muidawh cu a hun duh tuk ah a hun ti. Ral Dawn nih cun a thei hmin putmi he cun a hei zohkhek i ai khah lo caah a kaltak. Cu hnuah Tum Sing khua cu a hung phan. Tum Sing cu congnak puan a rak tak len ko. Ai dawh tuk ah hin Lasi nungak ko a ol, a congnak puan tahmi zongin ai dawh dih. “Ral Dawn zeidah na ti lai” tiah aw nem ziaimai tein a hun hal. “Tum Sing ka thi lai” tiah a hun ti. Tum Sing nih cun “Ee” tiah a hun ti. Ral Dawn nih cun ai dawh tuk i a si țheu lai, tiah a theihhmin nakhmanh cun ai dawh deuh i, Ral Dawn zong cu padawh minthang ngai a si ve i voikhat hmuhnak te ah an i duh ning cu chim khawh a si lo.

“Ka nu le ka pa lo in a hung tlung lai i, Tum Sing nih zuhui, zureu an pe maw tiah an in hal tikah a ka pe lo na ti lai” tiah Tum Sing nih Ral Dawn cu a ti. Zuhui fati thlum bik cem le zureu thaw bik cu ri deng in a dinh. A nu le pa cu an hung tlung i an thil an i thumh cangka in an konglam cu an hung i hal. “Nunu nih zuhui zureu hna an in pe lo maw?” tiah mawng nawn in a thu ko mi Ral Dawn cu an hun hal. Ral Dawn nih cun nungak chinmi bia cu al a duh lo caah “A ka pe lo” tiah a ti. “Nunu zeicahdah zu hna cu na rak pek lo, vun tuah piak” tiah an ti. Tum Sing nih cun Ral Dawn cu a mitsir in a vun venpah in merh nawn in a hun zohpah in zuhui cu a hun tuahpiak. Ral Dawn cu tuang laicer ah cun lunghmui ngaiin a thu ko. Zuhui cu a hei ei. Zureu a hun tuahpiak than. A ding kho tuk ti lo a ti tuk cang.

A thaizing ah cun Tum Sing nu le pa cu lo ah an kal țhan. Lo an thlawh lioah khin “Tum Sing nu le pa, Tum Sing kan dawt nan ti le Ral Dawn nih tlang kua tlang hra a liampi” tiah vate nih an pawng in a awn lengmang. Tum Sing nu nih “Tum Sing pa, vate cu zei a ti len ko hen, Tum Sing kan dawt kan dawt nan ti le Ral Dawn nih tlang kua tlang hra a liampi a ti len ko cu ngai ve hmanh” tiah a ti. Tum Sing pa nih cun, “Na lo thlawh zuam lo tuk ah, lo cu thlo ko” tiah a ti.

Ral Dawn le Tum ing cu Ral Dawn te khua lei ah cun zingkate in an kal i, lam tantim an phak hnuPinu tikhor an phak ah “Ka ngun chin khup ka philh” tiah lau lengmang in Tum Sing nih cun a hun ti. Ral Dawn nih “Khan, ka vung lak lai, lam pawngah hin rak um law rak ka hngak, ai chokvaimi na hmuh hna tikah ahohmanh rak chawn hna hlah” tiah a chimhtak.

Tum Sing cu tikhur pawng thingkung nganpi cungah a kai i Ral Dawn cu a hngak. Cu lioah cun tithan ah Pinu a hung. Ti a hun than ah khin Tum Sing thla cu tikhor chungah a hmuh. Amah tla ah a rel i, “Pinu an ka ti, taangtu an ka ti, keimah cang cun kai dawh tak te zimzai” tiah a ti i a lam utmat. Ti a than khawh cun a kal. Cu hnuah Pinu rual cu ti an hung than i cutin cun an ti i an lam i an kal lengmang. A hnubik ah Pinu pakhat cu cutincun a um ve lioah Tum Sing nih cun ai tuar ti lo i “Keimah thlapi hna” tiah a hun ti. Pinu nih cun a cunglei cu a hun zoh i Tum Sing cu an hun hmuh. A kai hnawh i a seh. Tum Sing thi dor khat te cu vawlei ah a tla i umkung ah a kheu i a thei pakhat te a tlai. Pinu cu Tum Sing thilthuam cun ai thuam i a rak um ziarzuar ko.

Ral Dawn cu a hung tlung i a hun hmuh tikah Tum Sing muisam cu a lo ruam lo nain zei ti awk a hngal lo. “Ra kun, kan kal lai” tiah a ti. An kal lai ah Ral Dawn nih cun um thei te cu a lawh i a zal chungah ai sanh. Pinu cu a hun utmat tikah, “zeicaahdah Tum Sing na kut ai tawisau” tiah Ral Dawn nih a hun hal. “Zei tikah dah Ral Dawn he kan i kuh reh len lai ka tinak ah ka kut ai tawisau” tiah a ti. “Chinfual” tiah a hal hoi. “Zei tikah dah Ral Dawn nih a ka hmehpiak len lai ka tinak ah ai chinfual” tiah a ti. An kal lengmang i Ral Dawn hnulei ah cun Tum Sing cu bei lengmang in a kal. “Tum Sing, zeicaahdah na ke ai tawisau?” tiah a hun hal than hoi. “Zei tikah dah Ral Dawn te khua kan phak zokzok lai kai ngaih tuknak ah ai tawisau” tiah a ti. An khua cu an phan. Ral Dawn nih um thei cu thlanglei vamping ah a thlai.

Ral Dawn le Tum Sing cu lo ah an kal. An tlun hlanah ti than cia le mei țha tein kau cia in a um i rawl zong chuan cia in a um. Ral Dawn cu a khuaruah a har ngai.

An in chak nuhmei nu cu “Ahodah rawl a rak kan chumhpiak tu hi a si, nangmah nih hlah maw na rak kan chumhpik hna” tiah a ti. “Aw, keimah nih ka rak in chumhpiak hna” tiah a ti. Cu tikah cun, “Rawl hung ei ve” tiah Ral Dawn nih a hei uah i a hung ei ve. Cuticun lo an kal karah rawl chumh cia in a um lengmang. Nifate in lo an kal kar i rawl a rak chum lengmangmi cu ahodah a si set hnga, tiah Ral Dawn nih ni khat cu Pinu lawng cu lo ah a kalter i inntang in a bawh. Zanlei ah zanriah chumh a cut ah vamping i ai thlaimi umte cu nungak dawh ngaite ah ai cang i rawl a chum le Ral Dawn nih cun a thli tein a hnulei in a pel i a hunkuh cut. “Hung ka thlah” tiah a ti. “Thlah hlah, ka nupi pei na si len cu” tiah fek thup in a kuh chinchin. Ka thlah sual lai ti a phang tuk i a tha dihlak in a kuh a reh chinchin. Cu tikah cun Tum Sing nih cun zei ti tuah awk a hngal lo i “Ka thlah ne ko cang, na nupi ka si ne ko kun cang lai” tiah a ti len nain a zum lo. A thabat a celh lo hnu ceu ah a thlah. Rawl a chumhmi cu an ei i chakchang ah an nuva an i kup an i rek i an it ko. darbel khap kua in ti an khin i a tlok hluahmah.

Pinu cu mui lai ah ruahpi sur lakah cin hiamhuam in a hung tlung i a thing phurhmi cu innleng ah “ka tlur” tiah a hun ngalh. Innchung a hung luh ahcun chakchang i a rak i kup komi a hun hmuh hna “Ta le far te an i kup ta tite” tiah a hun ti hna. Ral Dawn nih a samthih inntang awng ah ai thlahter i Pinu cu “vung char ta” tiah a fial. A vung lak lioah tisa tlok cun a toih i a ai ruangmang. Ral Dawn nih cun “Pinu pum cu na duhnak in i tuah seh” tiah Tum Sing cu a ti. Sum ah a phomh a phomh i innthlang dum chungah a hlonh. A hlonhnak hmun ah cun anhling a kheu. Anhling no cu Tum Sing nih a lawh i buti ah a chumh. Bel cu a hung tlok hluahmah i “porh, porh, kek, kek” tiah a tlok. “Cu ngelcel cu” tiah a cawi i innthlang ah a thlet dih. A thletnak hmun ah cun saisua a kheu. Ral Dawn cu khualtlawn ai tim. A kal lai ah “Khi saisua hnah khi na ha in cik lai ci” tiah Tum Sing cu a chimh tak.

Ni khat cu Tum Sing cu lo ah kal ai tim. Chuncaw funnak hnah a hal len i a tong lo. Cu tikah innthlang saisua hnah hi seh ka tawh ko tiah a va kal. A vapa i a chimh takmi bia cu a philh. a tin in a tei len i a tei kho lo. A ha in a hun cik tikah a lei a tan i a thi.

Ral Dawn cu a hung tlung. A nupi a thihnak kong cu kuami nih an chimh. A nupi thlan cu a hawl. Vapel hngakchia rual nih than hmun cu an chimh. A cawh i Tum Sing ruak pawngah cun a ih hnuah a hrukpi in a thin laicer ah ai chun i a thi ve.

Ref: Chin Tuanbia App