Bawhlung Parih Hmin

Siang Lian Uk Kianghrol

Minung 50 hrawng a tel mi Relkhawmnak Puai pakhat ah hruaitu in an zate’n a ko khawm ih, bawhlung pakhat cio a pe. Cu thluh in bawhlung parah anmai’ hmin cio a nganter hnu ah, bawhlung zate’n pindan pakhat sungah a retkhawmter thluh.

Cuthluh in minung 50 cu pindan sungah vung lut in mai’ hmin ngannak bawhlung cio kha minute 5 sungih hawlsuak ding in a fial. An zate’n an nor aw, an nek aw, an cuh aw ih mai’ hmin ngannak bawhlung hawl in an buai celcel. Asinan minute 5 a kim tiangah zohman in an bawhlung cu an hawl hmu ngah lo.

Cutikah hruaitu in minung 50 cu an lak ngah mi bawhlung pakhat cio la mei ding ah a fial. Mai’ lak ngah mi bawhlung par ih hmin neitu sawn kha a hawlter hai. Cutikah minute malte sungah an zate’n mai’ bawhlung cio an ngah hai.

Cutikah hruaitu cun, “Minung nun khal hivek thotho a si. Mi tin in mai’ lungawi aipuannak bawhlung cu khuiah a um ti thei hnai lo in, hmarngai le taima zet in an hawl ciamco. A taktak ahcun kan lungawi aipuannak diktak cu midang ih lungawi aipuannak parah a ṭhum aw. Midang pawl lungawi aipuannak pe aw. Nuam ding in tuah aw. Cutik ahcun na hnen khal ah lungawi aipuannak a ra thleng ve mei ding. Nunnak ih a tumtah mi cu himi hi a si ko lo maw?”

Bulhram: Did You Know?
Laknak: Myanmar Youth Media Club