Ka Fapa nih vei 23 rori thu in sut nan….!
Putar kim 80 lai kim zo mi pa cu a fapa zirnak sang zet a neitu milian zet thawn sofa tokham parah cun an totlang lai ah an inn sangkaate par ah cun vate a ra fu ih, a pa cun “Ka fa, ziang saw a si?” tiah a sut.
A fapa cu “Tlangaak va a si khi” tiah a fapa in a pa cu a hei sim. Rei lo teah, a pa cun “Ziang saw a si?”tiah a fapa cu a hei sutsal. A fapa cun “‘Ka Pa, Tlangaak va a si’ tiah mitute rori ih ka lo sim zo kha teh!” tin a sawn.
Tawkfang rei hnuah “Ka fa, ziang saw a si?” tiah a veithumnak a sutsal lala. Cucun a fapa cun “Ka pa, Tlangaak va a si ti ka lo sim zo ko ual. Tlangaak va! tiah thingheng nawn in awkam hrozet cun a sawn. Rei hlanah, “Ka fa, ziang mi saw a si?” tiah a sut kel thu cu a veilitnak a sutsal bet lala tikah, a fapa cu a supaw thei nawn lo ih, mithmaise remrem in a pa cu a zoh ih, hung ding phahin a pai hnenah, “Ziangah saw i sut cia bang thu cu tuletu i sut leuhleuh e! Tlangaak va a si tiah veiziatzat cawk lawmmam saw sim na duh. I sutbet nawn hlah aw”tiah a pa cu awkaa hraang ngaingai in a sawn.
A pa cu a hung ding ih cikpak loten a ihnak khaan sungah a lut ih a thingkuang sung ih a ret mi kum reipi zo ta a dairy țophnop nawn pi cu a lak. A ra suaksal ih a fapa hnenah “Hih cabu sungih ka hminsin mi thu hi vun siar hnik aw” tin a kut zungin a siar dingmi cahmai cu sawt phahin a fapa cu a pek.
Cui cabu(Dairy) sungah cun hitin ngan a si; “Tuisun ah ka fapa thawn kan sofa tokham parih kan totlang lai ah Tlangaak va cu kan sangkaa te parah a ra fu ih, ka fapa te cun ‘Ka pa, ziang saw a si?’ tiah vei 23 rori sut cia bang thu tuletu i sut. Asinan thinsauten hnisuamsin ka fapa duhtak pom phahin vei 23 ten i sut mi ka sim. Ka fapa te hi ka duhdawt tuk ee!”
Cui ca a siar phah ah a fapa lungthin cu a zup thluh ih a hmai sur le sur loin, a hmur le a kaa sur țiația in, a biang ah mitthli for kuahko phahin a pa cu a vun pom ih a pa cu ngaidam a dilsal lohli.
Hminsin: Nu le pa nih fale an duhdawt dan le, fala in nu le pa kan duhdawt daan a danglam nak a si.
Ruallenuh, na nu si maw, na pa si maw…thu a lo sut cia bang mi cingaw nawn loin a lo sutsal cingcing ih, a lo sim cia pangmi thu a lo simsal le a relsal tik ah hni suamsiten ngai men aw. Na thinheng hlah. Kawk pangpang hlah.
Na nauhak laiah, na umhar pang ding tiah na kiangte ah um ringring tahratin thuanthu phun zakim a lo sim ih thunuam phunphun a lo ruah kha ngilh pang hram hlah.
Cu ruangah, na nu le na pa upat aw, an thusim ngai aw. Duhdawt aw. Thinharnak pawl pek/tuar ter hlah aw. An zawnruah hna thiam aw. Na duhdawtnak kha a takin langtar aw. An kiangte ah um țheu awla, thu phunphun titi pi țheu aw. Kaw dang ram hlanpi ih um na si le, phone thawn si maw, be cingcing aw. Na nulepa lungawiter aw. Hni kuahko ding hnihsuah saisak aw. Ziangahtile na suak hlanah khawvel ah kum reipi rak um zo an si ih, kum reipi an lo nungdampi thei nawn lo ding. Thih hnu ih țah awk le sirawk in sullam a nei nawn lo! Mitampi cu nulepa thi hnu lawngih lungfim kan tam thei tuk kha!!!
Zuk:: Original
