Nga Pakhat Ruangah
Vei khat lai ah a rem aw zet mi ram pahnih an rak um. An kiang ah ram tumpi pakhat a um ve. Cui’ ram tumpi cun ram rem aw pahnih cu do neh a duh. Curuangah a do neh theidan ding kalhmang an hawl.
Cui ram tumpi ahcun ralrelthiam hminthang pakhat a um ti a si. Cu pa cun cui’ ram pahnih cu a hranpa tete’n a va tlawng. A va tlawn tikah anmai’ ram lawng ih a um mi nga pakhat a keng tel.
Ram pakhatnak a va thleng. Ralrelthiam cu siangpahrang rori in ruai ropi thawn a rak mikhual. Cutikah ralrelthiam cun an ram ihsi a rak ken mi nga cu siangpahrang hnenah a pe. Cui’ nga cu tipithuanthum ṭihnung zet hmun ihta a si thu, ralkap tam zet hmang ih kaih mi a si thu, cui’ nga ih mei zim (tidai leuh-hlaunak) cu a thawt zet thu, a mei ei-ngahtu cu hualvan maksak ropi zet neitu a si thu a sim. Cumi ni ah siangpahrang cun nga cu a cohlang. A ei cu thaisun ih ei ding ah a ret. Cuvek nga cu an ram ih an hmuh dah lo mi a si ruang khal ah a si.
Asinan cui thuthang cu ram pahnihnak tiang in a va thleng. Curuangah ram pahnihnak ih siangpahrang khal in cui’ nga ih mei zim cu ei ve a cak. Cutin cumi ram ahcun a va tlawng. A thaizan ah siangpahrang cun nga cu ei ding ah a rawhter. Khatlam ram ih siangpahrang khal nga thuthang thei ih ra tlawng a si phah thawn, nga ei cut caan ah a ra thleng hrim.
Siangpahrang pahnih cu nga ei phah, zu in phah, nuamtawl phah in an kom aw. A netnak ah nga mei zim lawng a tang thlang. A mei thuhla cu an pahnih in an thei veve. Curuangah ‘keimah ka ei ding’ ti’n an cuh aw ih an to aw. Asinan ram pakhatnak ih siangpahrang in inntek ka si si ti’n a ei.
Zan a rung thlen tikah ram pahnihnak ih siangpahrang cu ralrelthiam cun a tukforh. Siangpahrang khal in ‘kei hmuah in unau vek in ka ruat lai ah, anih cun khavek in a ti siang’ tiah a thin a heng ve.
Ralrelthiam cun siangpahrang dang pakhat khal cu a tukforh lala. A rei hlan ah ram pahnihnak ih siangpahrang cu a tlung ih, an ram a thlen vete’n ral a phuang. Ram pahnih cu an do aw thlang. Thla thum sung ah doawk cun an bang zet. Cutikah ram tumpi ih ralkappawl an ra ih ram pahnih an ra do.
Asinan ram pahnih cu an kom aw sal ih, ram tumpi cu an do. Anma’ theih-nel mi hmunram a si ruangah siseh, raldo thiamnak an neih ṭhat ruangah siseh, ram tumpi ih ralkappawl cu an dawi kir thei. Ram pahnih khal cu an rem aw sal.
Zan khat cu ram pahnih kom in ralnehnak kan lawm ding tiah ruai ropi an tuah. Ram pahnih ih siangpahrang khal an tel veve. Zu in phah, ei phah in, an nuam aw hai. Culai fang ah cabuai par ah nga em hmin mi pakhat a ra thleng. Cu lala. Nga danglam thotho a si. Siangpahrang pahnih cu an mithmai an zoh aw ton veve. Cu thluh in nga ih mei zim zawn cu an zoh tlang lala ti a si.
Sirhsan: Mg Sai – “Nga Pakhat Ruangah”
Siang Lian Uk Kianghrol
