Zanṭim Lai ih Demde
Hitik hlan ah Holland ram ih khua pakhat ah nuhmei fapa thlangval pate a um. An umnak khua cu tipi thuanthum hnakin a niam sawn. Curuangah an khua tlun in tidai khamnak hruangpi an dawl.
Nikhat ni cu cuih nuhmei fapa tlangval pate cu khualeng ah a vak. Khua a thim zik zawngah an khua ih ummi ti hruang phardawlpi lamah a feh. Cuih ti hruangpi ih hmunkhat ah ong fate a um ih cuih ongte ihsin tidai fate tak in a put suakmi a hmu. Tlangval pate cun hihi ziangtin ka tuah le a ṭha ding tin a ruat. Khua sungah tlaanin khuami pawl va sim sehla tin a ruat. “Asinan khuasang mi ko dingih ka feh lai ah ti putnak ong tum sinsin in tihruang kuai sehla kan khua cu tii in a khuh thluh ding sikhaw,” tiah a ruat lala. Curuangah ti ngaihnak a thei lo ih netabik ahcun khua ah feh nawn loin a kut zungte thawn cuih tiput cu a phit.
Khua a tlai vivo nain tlangval pa te cu inn ah a tleng nawn lo. Cutikah a nu cu a mang a bang tukih an khuami pawl a sawm hai ih a fapa cu an hawl. Zan varte an hawl nan an hmu lo. Khuaruahhar in an um. Netabik ah an khualu ih ti hruang lamah an feh tikah tlangval pate cu a kutte thawn tiput a kham ih a taksa ṭhong ṭhengṭheng in an hmu. A taksa a khal ṭheh ih a thi zikte. Mipi cu an mang a bang tuk. Zanvar ten hih nuahak pate in a nunnak a pek ruangah kan khua kan himnak a si hi, tin an lung a awi tuk. Cutin nuahak pa te cu “Paral T’ha na si” ti’n an ti ih amah upatnak ah “Zanṭim Lai ih Demde” tin upatnak hmin an pek.
Demde timi cu zan khawthim lakih a vangmi rannung pakhat a si. Amah cu fate takte si hmansehla zan khawthim lakah a mawi zetmi tleunak petu a si. Midang ṭhatnak hrangah nun a hmangtu cu Zanṭim Lai ih Demde mawite kan si.
