Ramthim_Arsi (J. Lal Nei Sum)
Rualvah hnihte cu nelrawn lakah khual an tlawngtlang ih niling senkang lakah tihal le rilrawng phah thawn thu an elawk. Pakhat deuh pa in a hngirțeu supaw thei loin, a rualpa ih hnakhang ah “Pathlaih***” tiah a vun beng hlukhli.
Cutikah biangbeng tuartu pa cun mit țhep fohfawn a biang cu domaw phahin a to lohli ih, vutnel parah cun “Tuisun ah ka rualpa in, ka biang ah natakin i beng” tiah a kutzung in ca a ngan.
Biakaw tuk vak lem nawn loin, an khualtlawn cu an sumzawm vingvo. Hla nawn ah tikhur thukzetmi pakhat an tawn dukdi ih, biangbeng tuartupa sawn cu tidai in hmaisa dingin tikhur lam panin a tlan, tikhur sungah tidai um le um lo zohhliah dingin a sungthuk cu an vun bih ih, cui tikhur cu a ropzet zo mi a si ruangah rin lo pin pokkhupin a vun tla zikte zawngah a rualpa cun a dunglam in a vun dir man fangfang ih tikhur sung tlathat ding mi rori cu a rualpa in a runsuak ngah.
Cui biangbeng tuartu tikhur sungih tlathattu ding pa cu a rualpa hnenah lungawi thu a sim țheh veten, tikhur kiang ih a um mi lungto parah “Tusun ah ka thi dingmi rori ka rualpa in i runsuak a si” tiah ca a ngan lala.
Cutikah a rualpa cun um men thiam nawn loin, “Ziangah saw ka lo beng lai ah hmuah vutnel parah ca na ngan ih, atu na nunnak ka lo runsuak ah hmuah Lungtho parah ca na ngan?” tiah a sut.
Cun biang bengtuartu le ca ngantu pa cun ” Ka biang i beng lai ah khan, ka thin na tuk ih ka hminsin. Asinan cui kan hminsinnak cu vutnel parah a si ruangah rei hlante ah ngaidamnak thli a hung hrang tikah, cui vutnel parih ka hminsin mi cu a phiatfai thluh ih ka hngilhsal lohli.
Asinan ka nunnak i rundam tikah ka lungawi tuk ih ka hminsin, cui ka hminsinnak cu Lungtho parah a si ruangah ziangtik hman ah a piatsal nawn loih, ka parih thil țha na tuahmi cu ka hngilh thei dah nawn lo ding! tiah a sawn.
Hminsin:: Mi in kan parah thil țha lo an tuah tikah hngilhsal lohli ding kan si. Asinan mi in kan parih thil țha an tuahmi cu ziangtik hmanah va hngilhsan ding kan si hrimhrim lo.
Midang hrangih thil țha kan tuahsakmi hminsin lo in, kan parih thil țha an tuahmi hminsinsak sawn ding kan si!
Pathian in na parih a tuah mipawl siseh,
Na nulepa le na unau sungkhatpawl in siseh, na rualpi si maw lole na theih dah lomi khal in na parih thil țha an rak tuah dah mi kha ziangtik hmanah va hngilh pang hlah!
Zuk :: Original
