Nikhatah Thaute pa cu tivapi pakhat ahhin sur a vorh so rero. Cutiih a vorh rero lai ahcun a saklamih sin mikei pakhatin sur a run vorh suk kha a hmu. Lamzinah an tongaw thlang. Mikei pai’ nga awh mi hmuahhmuah cu an lu a bul thluh. Thaute pa cun, “Ka rual na nga kaih mi cu ziangah ha an lu a bul thluh?” a ti. Mikei pa khal cun, “Ka surah an lu a tang i ka hnuh nakah” a ti san men. An pahnih cun “Tlung tlang uh si” an ti i an tlung khat.
Thaute pa cu a rualpi pa mikei a si ti a theih ruangah a ṭih nawn. Lamlakah i deh pang ding ti a phang. Curuangah tawkfang an fehin, “Ka rual ka ek ka va thawh ding. Hisin i rak hngak ringring aw” a ti i lam thlangah a pial. A ek cu tam nawn a thawh ta i hrikpi pakhat a paarah a toh ta i amah cu an inn zin zawhin a thupte’n a tlan hlo. Mikei pa cun, “Maw ka rual, hung thlang aw hen law” a vun ti. Hrikpi cun, “E law” a hun ti. Tawkfang a rei in a hung cuang lo i mikei pa cun, “Maw ka rual hung thlang aw hen law” a vun ti leh. Hrikpi cun, “E law” a hun ti thotho. Tawkfang a rei in a hung thleng cuang lo i “Maw ka rual hung thlang aw hen law, na va rei ve” a vun ti thotho. Hrikpi cun, “Ka hung lai” a hun ti. Hung thlen suak ti a neih lo ruangah mikei pa cu a thin a heng i a umnakah ka vung deh lawlaw ding ti’n a vung hawl. A ek lawng a vung hmu. A ek paarah cun hrikpi pakhat a vak kurhko rero a hmu. “Nangmah hrikpi maw cu tiangtiang ka lo hngah” a ti i a thawi. A ek tek cu a pet i a ka-ah a lut pang. Vun cepcep na khaw a thaw lutuk i a ek tiang cun a ei thluh. A ek hman hitluk thaw, a mai sa cu ziangtluk in ha a thawt ding a ti i a nehin a dawi.
A feh vivo i netabik ahcun a inn a va thleng. Thaute pai nupi le a fanu pahnih cun ṭumhmun ah sum an rak deng. Mikei pa cun, “Na pa teh a um maw?” a ti hai. Annih khal cun “innsungah a um” an rak ti. Innsungah a vung lut i tawkfang an umkhawm hnu ah mikei pa cun thaute pa cu a deh. Rei nawn an um hnuah nunau sumdeng pawl cun innsunglam an thawmvang a va dai ve, vung zoh hnih uh an ti. Vung bih na hai khaw mikei pain a pai sa le an cikhawn a rak hmeh rero kha an vung hmu. “Ka nu, mikei a si, ka pa a deh i a sa a ei rero lai” an ti. A nu cun a ṭih i zamrangin kan tlan ding a tiih a fanu pawl thawn an tlan.
An tlaan nak ahcun sakhi an hi tong phah. Nufathum te cun, “Pu sakhi pu sakhi, in seh aw” an va ti. Sakhi cun, “Bang na cih ta hiam?” a rak ti. Nufathum te cun “Tlangah pu sakam kei mual tang zui denden kituah ung e” an va ti. Sakhi cun “Cu bang ruro cu kei in seh thei ka ti lo. Va kal au la mual khum tan” a rak ti. Nufathumte cu an feh sal. Tawkfang an va fehin zukneng an hi tong lala. “Pu zukneng, pu zukneng in seh aw” an ti. “Bang na cih ta hiam?” a rak ti leh. “Tlangah pu sakam kei mual tang zui denden kituak ung e” an va ti. Zukneng cun, “Kei in seh thei ka ti lo, va kal au la mual khum tan” a rak ti. Nufathumte cu an feh sal lala. Tawkfang an feh hnuah Savom an hi tong lala. “Pu Vom pu vom in seh aw” an ti. “Bang na ci ta hiam?” a rak ti. “Tlangah pu sakam kei mual tang zui denden kituak ung e” an ti. Savom cun a ṭih i “Kei i seh thei ka ti lo, va kal au la mual khum tan” a rak ti. Nufathumte cu mangbangin bawmtu nei loin an feh vivo.
Tawkfang an feh hnuah sahluk an va tong sal. “Pu sahluk, pu sahluk in seh aw” an va ti leh. “Bang na cih ta hiam?” a rak ti leh. “Tlangah pu sakam kei mual tang zui denden kituak ung e” an ti. Sahluk cun a zoh a zoh hai i a zang an fak. A si le lungtum pakhat cio hun pu au la hung kai au a ti. An nufathumte cun lungtum pakhat ciar an pu i sahluk umnak ahcun an hung kai. An nufathum ten a bu sungah a thuhih an lungtum pawl cu lengah a ret.
Mikei pa cu Thaute pai sa a ei thluhin a nufa pawl khal ka deh lawlaw ding a ti i va zoh na khaw an rak um nawn lo. An nehin a dawi sal lala. Sakhi a hi tong i “Nufathumte na rak hmu maw?” a ti. Sakhi cun “Hmu hlah” a rak ti. Mikei pa cun, “Mai kiang tei ra tlan rak hmu lo thiam cu” a ti i a mah a deh. A feh sal i zukneng a hi tong sal. “Nufathumte na rak tong maw” a va ti. Ka tong lo a rak ti lala. Mikei pa cu a thin a heng. “Mai kiangte i ra feh hmu lo cu a ti i ” a deh i a sa a ei thluh men. Savom a hi tong sal. “Nufathumte na rak hmu maw” tiah a sut. Savom khal cun, “Ka hmu lo” a rak ti. “Mai kiang i ra hmu thei lo” a ti i amah a deh i a sa a ei thluh.
Mikei pa cun a hi dawi vivo thotho. Sahluk thing paarah a hi hmu. “Nufathumte na rak hmu maw” tiah a hun sut. “Ka hmu lo” a vun ti. Mikei pa cun, “Na bu sungih kha ziang saw a si?” tiah a sut sal. “Ka lungthu” a vun ti san. Mikei pa khal cu “Nufathumte i neh thingpar a kai ruangah an um ding ti a zum i sahluk umnakah a hung kai ciammam thlang. Sahluk cun a hung thlen zawngah mikei pai calpadar ah a deen i mikei pa cu a tla. A hung kai sal lala. A thlen zawngah a den lala i leilungah a tla sal thotho. Mikei pa cu a na tuk thlang. A thin a heng sinsin i amah sahluk thawn ka deh thluh hai ding a ti i a hung kai sal thotho. Sahluk cun a tha neihsunin a rak deen sal lala i mikei pa cu a tuar nawn lo i a thi.
Nufathumte’ an lungawi daan cu simcawk a silo. An thawpi an suah thlang. Sahluk cun mikei pai vun cu a hih i ṭhaten a caar hnuah a zuar. Khaw pakhatah a va thleng. “Saphaw e ka zuar e” a va ti. “Ziangzatah na zuar” tiah an rak sut. “Sepi ah” a va ti. Pawn deuhah hei zuar awla, “Sepi hnih na khawng ding” an rak ti san. “Saphaw ka zuar e” tiah a va au lala. “Ziangtin na zuar” tiah an rak sutih “Sepi hnihah” a va ti. An zoh an zoh i pawn deuhah hi zuar aw la Sepi thum na khawng ding an rak ti. Khaw pakhat cu a va thleng leh i “Saphaw ka zuar e” a va ti. “Ziangtin na zuar?” tiah an rak sut leh. “Sepi thumah” a va ti. A saphaw an zoh ih mikei phaw a rak si. A umnak cu mikei khua a si thlang. Mikei pawl cun kan rualpi phaw ti an thei i amah kha an kai taang. Arcir sungah an khum.
Mikei pa cun ”tuizaan ka zaanriah ding, ṭhate’n rak kil au law” tin a fale pawl kha a tiamta ih rapcung tluunah an thlai. Sahluk cu a van sang. Tuizan ka thi thlang ding. Suah le tlaannak le a um ta lo a ti i a thin cu a turin a tur. Khua a sim cuahco thlang a tal rero i tal man a um lo. Culaiah mikei nauhap pate cun cui sahluk tilte ei ka va duh ve a thaw tuk ding a bang a ti. Sahluk cun, “Ei na duh awkah i phorh au la ka til ka lo hleh tlak sak ding” a vun ti. Mikei nauhakpa te khal cun, ”Siseh law” a ti i sahluk cu an lak i an vun phorh. An phorhsuah ngahin namte va la hnik uh, ka til ahnakah a ti i namte an hawl sungah a tlan hlo. Mikei pa cu a hung tlung i sahluk sa ei ding cun a ha a tatin a tat. Hni suamso pin hung tlung na khaw a sahluk retmi a vun zon i a rak um nawn lo. A fale pawl cu “Sahluk ka ret ta mi khuiah ha nan heih” tiah a sut hai. A faate pawl cun sunah a til ei kan tum i kan phorh i in tlansan an ti. Mikei pa cun, “Kan cem aw” a ti i a thinhengin a faale pawl lehlam cu a kawk ciamco hai.
Sahluk cu inn ziin zawhin a tlung hlo. Nufathum te thawn nuam zetin an um tlang ta.
Ref:: Thuanthu Roling Cabu
Salai Pa Sang
Zuk :: Original neitu ta
