Pangangpawl Thuanthu

1 min read

Pangangpawl Thuanthu

Far kung par ih um pangangpawl cu an kaa ihsin manrang an suahter ih thingkung par ahcun bu sak in an um. Zanlam ah an bu ihsin an ra suak ih far hnahpawl ei ding in rawl umnak ah a tlar in an feh hai. A dungthluntu pangangpawl cun hruaitu ih fehnak zin ihsin lungrualte’n an thlun vialvo ṭheu.

Hmaihruaitu pangang cun a feh phah in a fehnak hmun tin ah manrangpawl a khak suak vivo. Cumi lawng ah khuitawk an thlen khal ah, ziangtluk ih hla ih an feh khal ah, tlunlam ah lamzin an hlo lo ding.

France ram ih insect (cucik) lam mithiam Jean-Henri Fabre (1823-1915) in zirhliahnak pakhat a rak tuah. A tlar ih feh rero pangang pawl cu pangpar bel tumpi pakhat ah a hruai hai. Pangangpawl in pangpar bel vei khat an hel (vel) thluh ciah in hmaihruaitu ih khaksuak mi manrangpawl a ṭhiathloh ih, pangpar bel kimvel ih um mi manrangpawl lawng a tanta. Cuihnu ah pangpar bel laifang ah far hnah pakhat a ret.

Pangangpawl cu pakhat hnu pakhat in manrangpawl umnak lamzin thlun in an feh ih, pangpar bel cu an hel rero. Manrangpawl an thlun vivo ahcun lamzin an hlo lo ding timi zumnak thawn an hel nolh rero. Cutin ni hra sung a ret hai. Pangangpawl cun rawl cu anmah thawi’ peng ziat hlatnak ah a um ti thei lo in, manrang umnak lamzin lawng thlun in an feh rero ih, a netnak ahcun rilrawng in an thi thluh.

Mi ṭhenkhat cu cui’ pangangpawl thawn an bang aw. Fehtumnak hmuitin nei lo in midang ih fehnak dung lawng an thlun rero men. Cutivek ih fehpawl cu tupi ramngaw sungih hlo nauhak men bang in lung-aa le mangbang anhai in a netnak ah an talbuai ṭheu.

Sirhsan: Nine Nine Sanay ih “Pangang Thuanthu”

Siang Lian Uk Kianghrol

Leave a Reply to Anonymous Cancel reply