Veikhat lai ah khua pakhat ah midik le mifel zet pacang pakhat a um ih khuasungmi zate ih upat le ṭihzah zetmi khal a si. Nikhat cu khualal hnenah thubuai pakhat a thleng. Cuih thubuai cu thudang a si lo nupa ṭongkam elawknak ruangih suakmi thubuai a si.
Thubuai neitu nupa cu khualal inn an thleng ih nupi in khualal hnenah hitin a sim hmaisa: “Upat ṭihzah tlak lalpa, ka pasal hi mihlothlau tak a si. Ni tin zu a in ih, hnaṭuannak ihsin a ngahmi paisa khal in ap dah lo. Paisa hmel khal ka hmu dah lo. Tisa nomcennak a uar tuk. Rualpi pawl thawn duhtawk in a ngahmi paisa a hmang ṭheh ringring. Culawng si lo in in hmuhsuam. A caancaan ah thihnai suak ko in in thawi ṭheu. Curuangah ka pasal hi nun in simsak aw.”
Cutikah khua lalpa cun tawkfang nawn a ruat hnuah, “Aw…cuti a si ahcun na simmi hi a dik rori a si,” tin a ti.
Lalpa ih simmi kha a pasal in a theih tikah “Ee…a cang thei lo. Hiti cun lalpa in ka nupi ih simmi par lawngah thudik a ṭhen dingah cun hih thubuai ahcun ka sung tengteng ding. Keimah lamih thudik ka neihmi ka sim ve a ṭul,” a ti ih lalpa hnenah, “Upatmi lalpa, ka nupi hi paisa a neihmi hmuahhmuah cu paisa thap leknak ah a hmangral ṭheh. Culawng asilo, kan neihmi thilri pawl khal a pawng, a zuar ṭheh. Curuangah hnaṭuannak ihsin ka ngahmi paisa pawl hi a hnenah ka ap paih nawn lo. Mi lom khal a thiam lo. Cun rawl a suan tik khalah a ut/kang ringring. Curuangah ka vel/thawi ngah pang ṭheu. Nupi hlothlau taktak a si. Curuangah ka nupi hi nun in simsak tengteng a ṭul ding,” a ti.
Cutikah lalpa cun tawkfang nawn thu a ruat hnuah, “Aw…cuti a si ahcun na simmi tla a dik rori a si,” tin a ti.
Cuih thu cu lalpa ih hnenumpa in a thei ih, “Ah…lalpa, nan simmi hi ṭha ten na ruahsal a ṭul ding. Ziangahtile a nupi ih simmi khal “A dik rori” na ti; a pasal ih simmi khal “A dik thotho” na ti. Hih thubuai hi ziangtin thuṭhencatnak na tuah ding?” tin a sut.
Cutikah lalpa cu a hnenumpa a vun zoh ih, “Hnenumpa, na simmi tla a dik ve thotho,” a ti lala.
Zirh Duhmi
Buainak/thubuai ṭhenkhat a sia lam zawng hlir hnakin a dik lam zawng ih zoh/hmuh thiam hi a ṭhatnak tampi a um ṭheu.
Zo zo khalin buainak pakhatkhat kan ton tikah “Mai’ hmuhdan hi a dik a si” timi ruahnak kan nei ṭheh. Curuangah thudik timi cu kapkhat lawng ihsin zoh ding a si lo ih, kaphnih ihsin zoh thiam a ṭul.
Kehlam mit lawng meng ih kan zoh ahcun vorhlam ih thil ummi pawl fiang ten kan hmu thei lo ding.
Kanmah lam hmuhdan lawngih a dik kan timi pawl hi thudik ngaingai an si ṭheh hrih lo. Midang pawl khal naater lo, mah le mah khal a diknak hmun ih umtu le midang pawl khalih thlirdan khalah “a dik” a si ahcun cumi cu “thudik ngaingai/taktak” a si.
Hram: Light of Truth/4.4.2018
Lairawn Meifar
(40/2019)
