MIKHUAL, SUAMHMANG LE RAAL TUM BIK CAWMTU PUTAR PA

Khuahlan laiah Siangpahrang pakhat a rak um. Aram sungih nunkhuasak le khurkhua theih a duh. Cule nikhat cu ram haal dingin senpi vantlang bangin, lamcaw a fuun ih a pok. Khua tam nawn a palțheh hnu-ah, a baang thlang ih khua pakhat ah a cambang. Khuataw lamih pitar le putar tei’ inn ah a vung riak. Pitar cu kum 70 lai a si ih putar cu kum 80 lenglo a si. Umpi an nei nawn lo. An fale pawl inntlei an suak țheh zo.

Cutikah putar pa cu a ti thei tawk te in hna a țuan hniaphno ih pitar nu’n tirawl a zalhsak țheu. Kuak fawp lo, zu in lo, mi țangțha a si ruangah a harhdam zet. Fanau nei lo le umpi nei lo ih an hnațuan cu mikhual pa’n a hmuh tikah lamhar zet le thinpem zetin a um. Putar pa le țong mal, pitar le tlok tam; an remcang ko pam. Ninga lai a caam hnu-ah tlun a cu thlang ih zankhat cu mikhual pa cun, putar pa kha zanvar thu a sut. An thusuhawkmi cu hi ti in a si.

Mikhualpa cun, “Ka pa! Na kum le a tam; rei pi nung ding le na si fawn lo. Nanmah nupa te lawng nan si fawn; Ziangahso hi tluk lawmman ih hna na țuan?” ti ah a suut. Putar pa in, “Ka fa! Mikhual, suamhmang le ral cawmnak ah pan teh maw!” ti in a letsal. Mikhual pa cu a mang a bang tuk ih putar pa cu a mit țhep lo in a zoh keukeu. Cule a um thei nawn lo ih, “Ka pa! Hiti rori ih surhan kian lo le niling sensa lakah mikhual, suamhmang le ral cawm ding ih hna ka țuan, na timi cu fiang tein i sim law!” ti ah a ti.

Cule putar pa cun, “Ka fa! Mikhual ka timi cu ka fa le panga an si, fapa pahnih le fanu pathum ka nei, tu le fa tla hleinga ka nei zo, kumhleiriat, kumkul lenglo ciar ka rak cawm hngai. Asinain atu tiang i cawmtu an um lo. An pipu le an nirang, le an sungkhat cawm ah an hlawh a pelh. Ka van a sia aw! Cun, an neih lo caan ah in ra diil; an fa le thawn an ra ei țheu. Cu lawng si hrih hlah; an duhmi an labet lai. Samsal ti khal um dah hlah, Nu le pa ti pan cu kan rak peek ko. Fa le hrangah sian lo kan nei lo. An duhmi an ngah le an ei biangbiang cun mai’ inn ciar le khua ciar ah an tlungsal. Cuihrangah mikhual ka tihngainak a si”, ti in thinsau tein a letsal. Mikhualpa cun, “Ka lung a awi tuk! Asile suamhmang na ti mi teh!” ti in a sut.

Putarpa cun, ‘Suamhmang ka timi cu, mai’ țuan le bom ti le um lo; Ti le rawl te hman misondahlotu, lal le khuabawi pawl; duh tik caan ih siah ra khongtu, ngunkhuai ra hlam țheu ih, ‘Kan nei hrih lo” ti pang hman ih, a hro ih mihro; a dehthat mizal pawl kha lo ziang!’ ti in a let. Mikhualpa cu phuhrungaw nawn le mithmai sia nawn in a um. Cule a mithmai a hun remsal ih, “Asile ral na timi teh?” ti in a sut lala. Putarpa cun, “Ral ka timi cu ka nupi hi lo ziang maw! Nupi le pasal hi rual țha bik, nu le pa, ța le farnu bangtuk kan si caan a um ko. Si ding hrimhrim khal kan si. Asinain duhhamnak le zutvatnak kan neih ziozi pang ah cun ral tum bik ah kan cang thei.

Miphun, mimawhthluk le tlohciar kan hmang țheu sapbai lai. Thinhar caan ah hnemtu țha bik kan si na in, aisuah caan ah raal siava kan si cio ko. Cuihrangah raal ka tinak a si. Cubetbetah nu le in mi ih thil an daw ih, hni le puan tla an duh cun, sunsun zanzan in mi an ngeen. Tuahsak thei lo le, zalhsak theilo le mi an hro. An ngoltau. Hnațuan bang caan le dam lo caan ah cun, simrel ding ziang um maw, Tawhawk a si ko. Cu khal cu pianphung a si ko.” ti in sau nawnin a let.

Mikhualpa cun, “Ka pu ka lung a awi tuk. Kei hi nan Siangphahrang ka si. Na thu simmi hi ka tlangsuak upa, mifim pawl ka polh ding. Zo khal sim hrimhrim hlah. Na sim le ka lo that ding. Cun, atu hi nan cawmawknak ah sui tangka thawngkhat ka lo țhen. Rei pi a lo daih ding”, a ti ih zaan țhim ah an thuruah an baang. Athaizing khuavang hlanah mikhualpa cu a rak tlung hlo. An nu cun, “Mikhual hlolak. Lungawi thusim te hman thiam lo”, ti in tlok phah in meisa a muah rero. Putarpa cu siim deuh ih a ih ruangah tho thei lo in a zau ruahri men. An nu a tlok tam tuk ih a celh nawn lo. Cunah bang thlang seh a ti ih, sui tangka pakhat a peek, “Heh! Na duhduh va lei law!” a ti. An nu cu lungawi le aipuang in a zuanghlo.

Siangphahrangpai’ tlangsuak pawl cu, cu laifangah cun thusuhmi let thei dingin an zuam ciamco. An theih le rank kai ding le laksawng ngah ding an si. An lak ih mi tawkhrok bik cu “Kan Siangphahrang mualmi in a mahte ziang thei ta hlah’. Mi ih simmi a si ko ding”, a ti ih khua tin ah a vaak. Netabikah cun a va theingah ih pitar kha sui tangka thawnghnih ka lo pe ding a va ti. Cucun pitar cun, an pai nunnak ziang siar lo in a rak simțheh. Reiloteah ralkap an ra ih putarpa cu Siangphahrangpai’ hmai-ah an suahpi. Siangphahrangpa cun, “Putarpa, ziangah na sim? Thih na țih lo maw?” a ti. Putarpa cun, “Bawipa! ka lo sim zo ko. Kan nu in sunsun zanzan ih i suh ruangah ka celh lo ih ka sim. “Mi dang sim hlah,’ ka ti na in a duhhamnak in a neh ih, sui thawnghnih duh ah a sim a si ko. Na duh le i that si pei cu. Hi loziang raal tum bik cawm ka si, ka lo ti kha”, ti in a let. Siangphahrangpa cu, “Ha ha! Ka pu! Mifim tak na si. Nupi hi raal, pasal khal raal kan si thei na timi ka zum lo ih keimai fialmi a si. Na tawk! Ka lo that lo ding. Na nunsung nan nu thawn keimah ka lo cawm ding”, a ti. Cucun putarpa cu a thawpi a suah hlumhlo ih, “Bawipa! Ka lung a awi, na nun sau hram seh! a ti ih, upatnak a hun pek.

MIKHUAL, SUAMHMANG LE RAAL TUM BIK CAWMTU PUTAR PA