Lungawinak ih Thuthup

2 min read

Lungawinak ih Thuthup

Mi ṭhenkhat cu dinhmun ṭha ah an ding ko nan an thinlung sungmuril cu a ippik ringring ṭheu.

Thuanthu pakhat ah hitin a um.

Putar pakhat in a thih zawng ah a fapa ko in, “Ka fa, kei cu ka lo cem san thlang ding. Na hringnun a hahdam aipuan ka beisei,” tiah a sim.

“Ka pa, ziangtivek in nung sehla lungawinak ka ngah ding timi i sim aw”

“A lenglam khawvel ah feh awla, lungawi aipuannak kalhmang cu minungpawl in an lo sim ding”

A pa putar a thih hnu ah a fapa cu lungawinak hawl ding in khual a tlawng. Lamzin ih tiva kap hmun pakhat a thlen tikah tiva kap ah rang pakhat a hmu. Rang cu a ṭawl in a tar zet. Rang in, “Naupa…khui na feh tum?” tiah a sut.

“Lungawinak ka hawl tum. Khuiah a um ti in sim thei pei maw?”

“Naupa….ka lo sim ding. Ka nauhak lai ah hrampi note ei, le tidai fimte in ding lawng ka rak thei. Rawl kuang sungih ka lu ka dak vete’n rawl cu ka hmai ah a ra thleng cih ṭheu. Ih ding, ei ding ti bak lo cu ziang dang hman ka rak ngaihsak lo. Cumi lai ah leitlun ih mi lungawibik ka si ding tiah ka rak ruat. Asinan tu ahcun ka kum a upat tikah minungpawl in in hnong. Curuangah ka lo cah duh mi cu na no lai ah na nonalnak kha sunsak aw. Keimah vek in na nonalnak kha a lak in hmangral men hlah. Midang in na hrangih famkim cia ih an lo timtuahsak mi thilri par ah nuam aw men hlah. Ziangkim ah thazang, taimaknak suah in zuam ding a si. Midang hrangih kan pekhlan mi kanmai’ lungawinak kha thin diriam le lungkim zet ih cohlan thiam a ṭul. A hnok ding phang hlah. Cumi lawng ah na dam sung in lungawinak na ngah thei ding.”

Mino cu rang thawi’ an ṭhenawk hnu in a feh peh vivo. Lamzin ah rul pakhat thawn an tong aw. Rul cun, “Khui na feh ding?” tiah a sut.

“Lungawinak ka hawl zik. Khuiah a um ti in sim thei pei maw?”

“Ka lo sim ding. Kei hi ka neih mi tur ruangah ka rak uang aw ringring. Mi hmuahhmuah ih in ṭih ruangah kei hnak ih turu an um lo tiah ka rak ruat. Asinan ka ruahdan cu a rak dik lo. Ngaingai ahcun minungpawl in thah hiar khop in in hua. Curuangah minungpawl ka hrial a ṭul. Ka ṭih a ṭul. Naupa, na kaa khal ahkhan tur a um. Ṭongfangpawl thawn minungpawl tuar natnak thlenter ding ih tuah lo ding in na ralrin a ṭul. Cumi lawng ah na dam sung in ṭihphannak timi a um nawn lo ding. Minung hrial ih relh rero khal a ṭul lo ding. Cumi lawng ah lungawinak timi na ngah ding.”

Rul ih rel mi a ngai thluh in mino cu a feh peh lala. A feh vivo ih thingkung pakhat parah thla hmul rong pawl no nei in a mawi zet mi vate pakhat a va hmu.

“Khui na feh ding, naupa?”

“Lungawinak ka hawl tum. Khuiah a um ti i sim thei pei maw?”

“Naupa, na umdan cu khualtlawng thazang bangtuk na bang. Na hmai ah leivut an khat, na hnipuan khal an tlek, na thinlung khal a bang hmel fawn. Hivek pianhmang thaw cun mi rungra pawl in an lo hrial ding. Cuti a si ahcun lungawinak thawi’ nan tonawk ngah ka zum lo. Ka lo sim ding…thinlung khal tel in, na taksa parih leivut pawl kha thenfai awla, felfai zoh mawi zet in tuah aw ta aw. Cumi lawngah na kiangkap ih thil dang khal an zoh mawi vivo ding. Cumi tik ahcun lungawinak cu na hnenah a ra ding.”

Mino cun theithiam ngah in inn ah a tlung. Lungawinak hi hmun tin ih va hawl ciamco a ṭul lo. Lungawinak cu mai’ awm sung ah a phum aw ti a theithiam. Lungawinak na duh ahcun na thinlung sungmuril ihta hawl hmaisabik aw tiah………..

Hram: He Yue-Qing ih “Thinlung hrang Arsa Uam Ti”
Lehnak: Nine Nine Sanay ih Facebook Wall ihsin.

Siang Lian Uk Kianghrol

Leave a Reply to Anonymous Cancel reply