Khawnbawl Fim Pali

2 min read

Khawnbawl Fim Pali

Siang Lian Uk Kianghrol

Hlan lai ah ram pakhat ih siangpahrang hnenah thuron upa a ṭuantu khawnbawl fim zet pali an rak um. Siangpahrang cun ram mipipawl hnen ihsin ngunkhuai tampi lak a tum. Cumi cu khawnbawl pali cun cuvek ih tuah a ṭhat lo thu an sim tikah siangpahrang cu a thin a heng. Curuangah khawnbawl pali ih neihsiah thilripawl le an sinakpawl a hnukkir sal thluh ih, khawlipi ihsin a dawisuak.

Khawnbawl pali cu khawlipi thawi’ a hlatnak hmun ram ṭhing lakih an veivah lai ah kala-uk pakhat tubaite ih a rak fehnak lamzin pakhat an va thleng. Cutikah khawnbawl pali cun kala-uk thuhla sirhsan in thuhla phunphun an titi hai. Kala-uk thuhla an rak rel lai ahcun sumdawng pakhat a ra thleng ih, a kala-uk a hloh thu a ra sim.

Cutikah khawnbawl pakhat cun, “Na kalauk cu a ke khatlam a bai ti aw?” tiah a rak sut. Khawnbawl dang pawl khal in, “A vorhlam mit a caw ti aw?” ti’n siseh, “A mei a tawi ti aw?” ti’n siseh, “A pum sungah nat a tuar ti aw?” ti’n siseh, an rak sut hai.

Cutikah sumdawng cun, “Aw. Si. Kei hnakin nanmah in thei sawn ual. Khuitawk ah nan hmu?” tiah lungawi zet in a sut hai.

“Khuitawk hman ah kan hmu lo. Asinan lamzin par ahcun a kenehpawl kan hmu,” tiah khawnbawl pakhat in a sawn.

“Hmu fawn si lo in ziangtin kei hnakin nan thei sawn thei? Ka kala-uk nan ru ih nan zuar hloh a si tengteng ding. Siangpahrang hnenah ka lo hek ding,” tiah sumdawng cun thinheng zet in a hro hai.

Sumdawng cun a sim mi vek in a tuah cih. Siangpahrang in khawnbawl pali cu a ko sal ih, dik zet ih nan phuanawk lo asile thawng ka lo thla hai ding, tiah a hro hai.

“Kala-uk hmu dah fawn lo in ziangtin a ke a bai, a mit a caw, a mei a tawi, a pum a na ti nan thei thei,” tiah siangpahrang in a sut hai.

Cutikah khawnbawl hmaisabik cun, “Kala-uk ih keneh pathum lawng an tang ti ka hmu ngah. Curuangah a ke pakhat a kiak a si ding tiah ka ruat,” tiah a sawn.

Khawnbawl pahnihnak khal in, “Lamzin kehlam kap ih a um mi thinghnahpawl lawng a ei  ti ka hmu ngah. Curuangah a vorhlam mit a caw a si ding tiah ka ruat,” a ti.

Khawnbawl pathumnak khal in, “Kala-uk fehnak lamzin tluan ah thisen for maltete ka hmu ngah. Fikfa in an keu ruangih thisen suak a si hmang ding. A keutu fikfapawl a thai tlan thei lo ruangah a mei a tawi tuk a si ding tiah ka ruat,” tiah a sim ve.

Khawnbawl palinak khal in, “Kei cun kala-uk in a hmailam ke pahnih thawn leilung na zet in a pal ih, a dunglam ke cun dimte’n a pal. Kala-uk ih taksa sungah damlonak a um ruangah a dunglam ke a hnuk in a hnuk deuh a si ding tiah ka ruat,” tiah a sawn.

Khawnbawlpawl ih simphuan mi pawl a theih tikah siangpahrang cun khawnbawlpawl ih fimzia a hmu ih a lung a awi zet.

“Hitluk ih a fim mi khawnbawl pali ih thuron kha rak cohlang ding ka si. Mipi hnenih khon ding mi ngunkhuai khal ṭhulh sal si seh. Khawnbawlpawl khal ka hnenah hna ṭuan sal hai seh. Nannih khawnbawlpawl khal in kumkhua in i kaihruai uh,” tiah thupek a suah.

Sirhsan: The Book of Knowledge Vol.6

4 Replies to “Khawnbawl Fim Pali”

Leave a Reply to Anonymous Cancel reply