Khuahlan lai ah kutrin/tin zoh thiam zet pakhat a um. Cupa cu a zohmi zate deuh thaw hi a dik ih a hmin a thang ngaingai. Nikhat cu mi pakhat a hnenah a ra ih, “Atu hrawng hi ka vansia tuk. Ziang ziang tuah khal sehla ka hlawhtling dah lo. Mi vansia le hlawhtling thei lo ding milai maw ka si hrimhrim ding. In bom thei asile zangfah ten in bawm hram aw,” tin zangfah a dil.
Cutin tin zoh thiampa khal cun, “Asile…na kehlam kutrin in hmuh hnik aw. Ka zoh pei cu,” a ti ih cupa in a kehlam kutrin cu a vun hmuh. Tin zoh thiampa in a vun zoh ih, “Himi kutrin hi fala le tlangval duhdawtawknak a si; cun himi hi sipuazi lam khihhmuhtu a si. Cun himi hi vansiatnak hmuhtu, vanṭhatnak hmuhtu a si. Cun himi hi cu na ṭhansonak ding lamzin khihhmuhtu a si,” tin a sim rero.
A sim ṭheh tikah, “Hmailam ih na sidan ding na thei duh maw?” tin a sut ih cupa in, “Thei duh” tin a ti. “Cutiih na theih duh asile na kut kha napin hum awla, vun pharhsal aw,” tin a fial. Cupa khal cun a kut kha napin a hum ih a vun pharhsal.
Cutikah tin zoh thiampa in, “Mitu ih na kutrin pawl khui ah an um?” tin a sut ih cupa in, “Ka kut sungah an um ṭheh ko,” tin a let. Tin zoh thiampa in hitin a sut lala: “Cuti asile hmailam ih na sidan ding teh khuiah an um si ding?” tin a suh tikah cupa cun kutrin/tin zoh thiampa in ziang a sim duh ti kha a theifiang cih.
Zirh Duhmi
Vanṭhat le vansiat hi ziang ruangah a cang ti hi simfiang ding a har ngaingai. A ngaingai ahcun kan kut sungah a um ṭhehmi a si. Kan parah a ṭhum aw ṭheh. Hmailam ih kan sinak ding hi kutrin/tin zoh thiam pawl par khalah a um lo. Kanmah parah a um ṭhehmi sawn a si.
Credit to: Thettan Cho//ttcinspirationalstories
Lairawn Meifar
(45/2019)
