GENIVI TUANBIA (VII)

2 min read

ZUMHAWKTLAK NU GENIVI Tuanbia Part VII

Berti a tin tlawmpal ahcun thong innka cu an rak hun i, pa hmaihmul pipi pahnih an kut ah vainam kaphnih har i hum bu in an hung lut. Sathau meiin an rak i vanh. Genivi nih ther lengmang in vanlei ah a kut a hler i, “Pathian na tang cungah rak kan pom ko” tiah thla a cam pah in a kal i pakhat pa nihcun a zulh. Uico hmul saupi nih khin a zulh hna. Genivi cu pa pahnih nihcun an kar lak ah an kal ter.

Cu caan cu favang lio te a si i arfi hna nih an thep dulhmalh i thlapa cu a van lio te a si. An kalnak lei ahcun minung thawng zeihmanh a leeng lo. king zirziar tein a um. Vainam aa putmi pa nih cun, “A hlat pah ko cang dir cang u” tiah a hawi pa cu a hun ti. An dihlak in an dir, “Genivi, na khuk i bil” a hun ti i Genivi nih cun a khuk aa bil. Mipa nih cun a naute cu a hun lak i a vainam cu a lek zukmak. Genivi cu a tho i a naute cu a va chuh; a tang ah fekte in a pom. Genivi cu van a cau i, ” Maw, Pathian rak kan zoh hmanh, Kei hi cu ka thih zongah ka naute hi cu a nunnak hun zuah hramhram ko” a ti. Vainam aa putmi pa sinah cun aa mer i, ” Zei kan ti hnga hi naute hi cu na vainam phor tlak zong a si lo, that hin hlah” tiah a nawl.

Cu tikah mi pahnih cu an i zoh i a hawipa Keinz nih Kunz cu, “A si tak, ka dua, a naute hi cu vainam phor tlak hmanh a si lo” tiah a ti. Kunz nih cun, “An pahnih in kan thah ko hna lai” tiah a ti. A hawipa nih cun, “Hi nu hi na theih hnu ah zei sualnak hmanh a tuah balmi zong a si lo. Na fapa a dam lo lio zongah khan an zohkhenhtu bik na bawinu a rak si” tiah a nawl. Kunz nih cun a duh hlei lo, “Kan thah hna lo ahcun kanmah pahnih hi pei kan thih lai cu; a si lo ah that loin um hna usihlaw hi tuupi chungah hin zeidah an ei hlei lai” tiah a ti. Keinz nih cun hna bei dong loin ” Ngaihmanh Kunz, a ti ning ka thiam. Na uico hi kan thah lai i kan vainam ah hin a thi kan neh lai i uico mitmu hi kan chuah lai i hihi Genivi mit a si kan ti lai. Hi hna nufa nunnak hi ruat tuah. Hi hna nufa thisen chuahter hi ka ngamh hrim lo. Sertu Pathian nih a kan hmuh ko” tiah a ti. Kunz nih, “Golo nih thei sual sehlaw tah? tiah a ti. A hawipa nih cun, “Na bia paoh ah Golo na chim lengmang. Pathian nakin maw na țih deuh. Hi nawl peknak hi a dik bal lai lomi a si cu na theih ko, tiah a ti. Cu ti cun Kunz nih cun, a si ah, na khua khan cu a țha, a herh a si ah cun kan pahnih in ta kan in te ko rua lai” a ti i a uico cu a thah.

“Nan nufate in Pathian nih in veng ko hnaseh, mangțha u” an ti tak hna i an tlun tak hna. Golo umnak an va phanhah cun Kunz nih cun, “Genivi mitmu cu kan hun phorh kha” a ti. Golo cu thinhun in a tho i a vainam aa lak i, ” Hi hnuah Genivi kong nan chim than ahcun nan thi lai. Kal dih u, ka pawngah aho hmanh um hlah u” tiah a vainam cu a lek i a thawl dih hna. An kawidua lunglawm tein an tiin. Golo cu khua a ruatthan i “Genivi hi auh than khawh sisehlaw ka kutdong vialte hmanh ka pek ko hnga” tiah a ti.

 

Ref :: John Siam Lian

One Reply to “GENIVI TUANBIA (VII)”

  1. Pingback: เกม 3D

Leave a Reply to Anonymous Cancel reply