GENIVI TUANBIA (V)

3 min read

ZUMHAWKTLAK NU GENIVI Tuanbia Part V

Sau nawn thong a tlak hnu ahcun, zun ek hlonhtu hna zong nih a umnak cu an dai thlanh ngai cang. Mimuihmai a hmu hrimhrim lo khan khi a si cang. Mi țhalopa, cenghngia tumpi Golo belte nih cun khua can khua can ah hin a hung veh tawn i “Genivi na muihmai le na taksa hna hi minung muihmai le taksa hmanh a lo ti lo. Keimah he um ti na duh ahcun kaan chuahter lai i na va pa tu cu lam in kan bawh lai i kan rak thah te ko hnga. Duhawk zong a tlak ti lomi hi kan duh kan dawt rih ko hnga” tiah nih bu in a hung chimhpah tawn.
 
Genivi nih, “Pathian mithmuh i midepde sinak cun minung hmuh i misual si cu ka thim deuh. Ka sual ti hngalbu i Siangpahrang thutdan i thutnak cun hi thong chung i thih hi kaa thim deuh” tiah a leh. Golo bianih cun a thinlung hi fei chunh in a chunh. Tlawmpal ah khin a thinlung ah a hung pemmi cu, ” Ka chung ah hin nau a cuang ti cu a fiang. Ka din ei ning le ka umthut ning ka ruah ah ka paw chung nau te hi pum tlingin a chuah ding bal a si lo. A chuah zong ah zei rawl in dah ka cawm lai, ti khi a ruah țhan. A lung retheih hnemtu ah a khuk aa bil i Pathian sinah thla a cam țhan.
 
A ruah bantuk te cun nau te cu a hung chuak i a angki leng aa poih riangmang i a naute cu a tuam. A naute cu a tangah a chiah i ” Ka fate, ceu hmu lo ding nih ceu na hmuh hi ta. Midang bang in zualnak tha hmanh na ngeihtung lo, katang te ah hin it zirziar ko kun a ti pah in a mitthli cu kurkur in a tla.
 
A cil a hun dawpter i Pathian sinah hi ti hin thla a cam “Dawtnak in a khatmi ka Pathian, fate na ka pek i kaa lawm hri hran ko. Sihmanhsehlaw a cawmnak le a zohkhennak dingah zeitin dah ka ti kun lai. Nangmah nih na ka pek bang, nangmah ta si ko seh. Atu nangmah sinah ka rak in pek than. Na Biakinn chung hmanhah ka rak chuahpi kho lo. Nang cu khua zei poah ah na um i ka umnak thonginn mui chungin, na kut thiangah kan rak in chanh. Ka nunnak hi dih ko hmanhsehlaw, ka fa tu cu nangmah sinah kan pek cang, a ti hnu in, tidin ding hrai khat te an pekmi cu a lak i a lu ah a thlerh i Baptistma a pek.
 
“Ka Pathian, ka fate hi ka tak lum zong nih a lumter kho ti lo. Nangmah nih lum tein rak ka kuh piak ko kun a ti i min a sak colh. A min ah Dolreich a ti, a sullam cu, sifak nain mirum, tinak a si an ti. Genivi nih a naute cu a cawi a oih pah khin, “Ka nau sian lote na rumnak bik cu thonginn ceu um lonak mui chung i na rak chuah hi a si ko hi ta. Zohtu zong na ngei lo, vangcung i na Pa ti ko lo cu thilpetu zong na ngei lo, na ngeihchun cu na mitchung i na mitthli hi a si ko. Ka dawt te hi ti te hin kan kuh ko lai,” a ti pah khin a fate hmai cu a hun zoh i, “Bawipa, fate na ka pekmi muihmai te hi hun zoh ve tuah. Hi khuamui chung i sau tuk um hi cu hun siang hin hlah ka Pathian hi bia ka chim hi ka zumhnak a tlawm caah si hin loin na cungah kaa hnohnak tu si ko seh ka fate i hngilh hliahmah ko, tiah a ti.
 
Ni tam nawn an si cang. Genivi nih cun a nau te aa cawi i awng bite in ceu a rami zawn ahcun a va dirpi i a nau te hmui cu a va zoh i a naute cu a hung ni. A nu nih cun, “Ka dawtte, ka sian lo, harnak thei lo te, kha ti te khan nang tal cu merh siarmar ko kun, kan sifak ko hmanh sehlaw kan Pathian cu a rum ko, na thin phang hlah ka dawtte” tiah a ti.
 
Golo cu a ra than i, “E, Genivi, nau te he na rak um cang. A pawi lo. Atu hi na can țhabik cu a si. Na fate kha na dawt a si ahcun, kei hi rak ka duh ko cang. Ka bia na ngaih lo a si ahcun na fate zong kha a thi ko lai. Lainawng na si ko lai,” tiah a hung ti than. Genivi nih cun, ” Ka Pathian hmai le ka vapa le ka nu le ka pa hmai i thil sual tuahnak hnak cun vawlei thong i thihhi ka duh deuh” tiah a leh. Golo cu a thinhun in a chuak vurmar i thonginn khar cu a leng lei in a hrenh than.
Ref:: Rev. John Siam Lian

Leave a Reply to Anonymous Cancel reply