A Fimmi Thuro
Khuahlanlai ah Sakap thiam zet pa a rak um. Hramlak a feh tinten Thuro a kai i bawm sungah a ret ringring țheu. Lei a duhtu pawl hnenah a va zuar țheu.
Nikhat cu Thuro pakhat a kai i a hlan vek thotho in a rualpi dang pawl hnenah a von ret ve. Thuro hrekkhat pawl cu ziangtin kan suak thei dingih khuiah a ong a um ding tiah an khoih, an pet i an zuang. A hrek lala cu rawl an ei i nunnuam ten an to men. Asinan thuro pakhat cu bawmsung a thlen malte in rawl tla ei lo suaknak ding tivek khal hawl lo in a um. Ziangtin ka um le ka luat thei ding ti lawngte a ruat.
Sakap pa cun rawl khal a pek rero ko nan a ei lo. Suaknak ding khal hawl lo in daiten a to men tikah, “Hi mi thuro hi a dam lo a si ding a lengah ka suah dingih a lengah ka umter ding” a ti. Bawm cu a vun ong i a vun kai. A kai khalah daiten canglo ten a um. Sakap pa cun “A damlo ngaingai a si hi, a zam thei cuanglo ding” a ti i thlahdarh zetin thingpar ah a hei ret.
Thing tlun a hei ret i malte ah thuro cu a thaaum mi zate hmang in a zuang hlo tikah Sakap pa kut in a luat thei.
Note:: Nannih khal nan ram le nan miphun hrangah tin hna nan țuan tikah nan tumtahmi kha nan tlensuah theinak ding ahcun ei le in, sum le pai lawng si loin nan thinlung tak in nan țuan ding. Na miphun pawl in thansonak an hmuh theinak dingah le nunnuam zet ih an nun thei nak ding ahcun a fimmi thuro vekin nan fim ve a țul a si. Cuticun nan tumtahmi cu nan thlengsuak thei ding a si.
