Ramthim Arsi (J. Lal Nei Sum)
Mifim, midingfelzet le midang zawnruah thiam zettu milian maktara pa pakhat cun a khawpipawl thawn a runinn nuam tak ahcun a lennak centlang le rawl eitlang dingin innsang pakhat hnu pakhat a sawm hai vingvo.
A pakhatnak innsang cun phur emem in an khua milianzetpai’h inn ah hni suamsawn an pan. Cui milianpa cun a kotkaa ihsin mithmai pan siansiten a rak hmuak hai ih, an kut kai phahin awkam nemzetin a biak hai. Cuticun sunvuten milianpai runinn nuam ah cun zalentakin an sungkurun in an duh mimi an ei, an in, an tawktham, an lek, an zoh, an hmang ih anmah hrang ahcun khawvel an cen cu a si ta mei.
Zanlam a hungkim tlang tikah milianpa cun ‘nan inn ih nan tlun hlante ah keimah thawn rawl kan eitlang ta pei ih, cule zanrian ei țheh in ka innsungta thil nan duhbikmi nan lakta pei ih nan tlung leh pei’ tiah a ti hai. Cuticun zanriah thawtak cu an eitlang ih, an duhbikmi thil cu an sungkua in an lakta ciarciar ih anmai inn lam cu pan ding milianpa inn ihsin an suak.
Milianpa cun a inn ih an suah zawngah,’Malten i hngakta hrih uh’ a ti ih, an zaten an biangah veikhat ciarin a bengthluh hai hnu lawngah a tlunter. Cui thuhla cu an khawpipawl hnenah an va simzarh.
Cuticun a khuasung mi zaten innkhat hnu innkhat a sawm thluh hai ih, hmaisabik innsungsangte hnenih a thil tuah mi vek cun an tlunzik zawngte ah a beng thluh hai.
Veikhat cu an khuasung ih putarpa can a kim thlangih, cui putarpa khal cun sawmnak vekin milianpa inn ahcun a feh ve. Kotka ihsin amah rak hmuaktu milian cu putarpain a hmu veten amah in a biak hmaisa ih, ‘kei vek putar men khal na inn rori ah rawl ei i sawm ruangah ka lungawi tuk aw” tiah a ti ih, a cibei.
Cule sunvuten milianpa inn sungah cun a duhmimi in le ei dingin le tuah dingin zalennak an pek. Asinan cui putarpa cun nomcen lam hnakin milianpa kiangte ah cun a va to ih thuhla phunphun an reltlang. An pawlkomawknak le biakawknak ah nitlak hman an thei man lo. ‘Keivek men khal na can sunglawi tak i pek peih ih, i pawlkom peih ruangah ka lungawi tuk’ tiah putarpa cun a hung ti.
Zanriah ei a cu tikah milianpa cun putarpa hnenah, ‘Ra aw, keimah thawn zanrian kan eitlang pei’ a ti. Putarpa cun ‘zohman in ka hnenah rawl eitlang an peih dah lo nan, nang cun rawl thawbik in do men lawng si loin keimah thawn rawl i eipi peih ruangah ka lungawi’ a hung ti lala.
Rawl an ei țheh in milianpa cun ‘na tlung hlan ah ka inn sungih thil na duhbik mi lak aw’ tiah a ti. Putarpa khal cun a duhbikmi a lak phahin, ‘ sunvun na inn ah nuam takin in umter, ka duhmi rawl thawthaw in do, nangmah rori khalin i kom peih, zanrian i eipi bet ih hleiah ka duhbik mi thil i lakterbet cu ka lungawi tuk aw’ tiah milianpa hnenah a ti ih kotka lam cu a pan.
Milianpa cun cui putarpa cu a beng ve lo tikah putarpa cu a mangbang ih, ‘milianpa, ka thlung hlante ah midang na beng vekin i beng ve ta lo ding maw?’ tiah a hung sut. Cule milianpa cun ‘asile rak um hrih’ a ti ih laksaung dang a pekbet ih a tlunter. Cutikah putarpa cu ‘milianpa ziangruangah saw midangpawl na beng vekin kei tla i beng lo ih hleih ah, laksaung lamlam cu i pekbet?’ tiah mangbang nawn in a hung sut.
Milianpa cun ‘Ka pu, nangmah hlanih rawl ei ka sawmmipawl cun ka inn an ra cen ih ka neihmi thilpawl an ei an in nan, a neitu keimah i pawkom peihtu an um lo. Cule zohman in lungawi thu in simta lo. Hih tlukih ka zawnruahnak theithiam lotupawl cu miaa nunsimtlak an si tiah ka bengta hainak san a si. Asinan nang cun ka inn kotkaa sung na lut ihsin lungawi thu i sim ih, ka neih mi thilripawl aiin khal keimah rori i pawlkom fawn ih hleiah, na tlung zawngte khalah lungawi thu i simta bet ruangah ka lo beng lo ih hleihah laksaung dang khal ka lo pekbetnak san a si’ tiah a ti.
Hminsin :: Unaulen uh, ka phun lo cingin Pathian in a fa dinhmun ah i cohlang ih, a neih mi thlasuah tinkim i center ih hlei ah, amah Pathian thawn pawlkomawk theinak canțha kan nei cingin, lungawi thu sim hna thiamlotu le thlasuah neihtu Pathian aiin a thlasuah thilripawl hi ka duhdawt sawn pang maw?
