Butlak Pahnih
Vei khat ah butlak tampi bur khat cu hramlak ah khual an tlawng hai. Hramlak pakhat ihsin a dang pakhat ih va ṭhawn tum an si. An feh rero lai ah a hmaisa ih feh butlak pahnih cu tikhur hlun thuk zet pakhat ah an tla pang. Tikhur cu a thuk zet ruangah butlak dang pawl cun, “Khati khan thih cilh mei uh, tingaihnak a um ual lo,” tiah an vun auh.
Asinan tikhur sungih butlak pahnih cun an thazang neih hmuahhmuah suah ih kai soh thei sal an tum. A tlunlam ih um butlakpawl cun, “Kai tum duh hlah uh, a cang thei lo ding,” an ti thotho.
Butlak pahnih cu an khir thok. Pakhat deuh cu a zuan a zang deuh. A khir sang thei. Asinan a khir rero lai ahcun a tlunlam ih butlakpawl cun, “Na thazang a bang lak men, thih cilh men aw,” tiah an rak auh rero. Tikhur suahka kiang a thlen cun a bang zet thlang. A netnak ahcun a kaisuak thei lo ding ti’n a zum ve ih a vung dawp that lawlaw.
Butlak pahnihnak a hung kai ve. Butlak dang pawl cun, “A ol lo ding, thihpi men aw,” an rak ti thotho. Cui’ butlak cu khir so phah, cawl phahphah in, a hung kai ih, a netnak ahcun tikhur leng ah a hung thleng. An zate’n an mang a bang thluh.
Cutikah butlak dang pawl cun, “Nang khal a pakhatnak butlak vek khan na thihpi men ding si hmang kan ti, kan lo auh rero kha na thei lo maw?” tiah an sut.
Cui butlak cun theih hmel lo mithmai thawn, “Kei cu hnaset ka si. Nan zatei’ tha in pek hluarhlo rero ka hmuh tikah ka tha a tlung ih, a par ka hung thlen theinak a si,” tiah a sim.
Vei hnihkhat ahcun hna kan ṭuannak ah kiangkap ih in soiselnak tivek a um can ah hnaset tun san ṭul can tla a um ve.
Sirhsan: Mg Sai – “Butlak Pahnih”
Siang Lian Uk Kianghrol
