Thil Thupi Bik Pathum
Milai pawl ih kan nunnak ah hin thil thupi tampi an um. Cuih thil thupi pawl lakah khurkhua zir in an thupit bik caan a um țheu. An thupitdan khal cu an bangrep thei lo. Asinain a tlangpi thu ih diktheimi cu a um ve. Cu mi thu thei duh ah siangpharang pakhat cu ‘hermit’ timi, mah lawng hramlak um (yateh-pa) mifimpa hnenah, amah humhualtu ralkap tla thawn an va feh. A ralkap pawl cu lamhla nawn ah ralveng phah in an tangta.
Hermit mifimpa cu duum fate a rak tuah rero. Cu lai ahcun siangphahrangpa cun a vun naih ih, “Ka pa! Na dam cak maw?” ti in upatnak thawn a biak hmaisa. Hermit cun, “Ka damcak sokhaw. Nang teh? Poihai dang teh na nei maw? Ziang so ka lo bom thei ding?” ti in mithmai pan tein a rak sawn. Siangphahrang cun, “Ka pa, na man lo zet ding na in, leilung tlunih thil thupi bik hi ziang an si pei, ti lo suh ka duh ih ka ra lo pan a si,” ti ah a ti. Hermitpa cun let lohli lo in a hnațuan a peh.
Siangphahrang khal cun a thiam tawkin a rak bawm ve. Theih rang duh cing cun hermit pa cu a sutbet ngam nawn lo. Caan a rung liam, ni a tla zik thlang! Hermit cun a let hrih cuang lo. Cu laifangah pacang țha pakhat, thi le hnai thawn, hriamhma pu in an kiangah a rung riil. Cu pa cu ‘zinghnam zawhte kaihtak’ a bang. Thinphang le baang zet cing cun, “I ruun uh law! Ka thi ngaingai ding,” a ti ih a thei-aw nawn lo. Cule hermit le Siangphahrang te pahnih cun thinpem zetin an tuamhlawm. Hermitpa cun tlangsam le thinghram ih tuahmi sivai thawn a tuamhlawm. Sabit ti mal te tla a tul.
Cucun a mit a hung mengtheisal. Cule nauhak siraw bangin Siangphahrangpa ih kut cu a kut hnih tein a țang ah a pom ih, “Bawipa! I ngaithiam hram aw! ka sual tuk, kei hi khuahlan ih a lo dodaltu pawl, rak hotupa ih fapa ka si. Ka pa na rak thah ruangah phuhlam dingin naam thawn ka lo rak bawh. Na rei tuk ih khua thim hlanih lo that dingin, lo ra pan ka tum. Ka relhnak ihsin ka suah tikah, na ralkap pawl in in rak hmu ih naam thawn in run hual. Pahnihthum cu hma ka baih man na in; an thiam, an ral a țhat hlei ah na parah rintlak in an țang. Ka neh thei lo ih hi ti in hriamhma tuar in ka rung thleng. Nangmah le hermitpa um lo uh la ka thi zo ding. I runtu le i nuntu hi nangmah na si. Ka nun sung, thih ngam in, na sal bangtukrori-in ka lo rian ding” ti ah a ti. Hermit cun Siangphahrangpa cu na thei zo ko lo maw! ti in a zoh keukeu.
Siangphahrangpa cun um thei nawn lo in, “ Ka pa! ka thu suhmi i let thlang hram aw, ka tlun a cu zo,” ti ah a ngen. Hermit cun “Na thu suhmi cu na theingah hrih lo maw?” ti ah a ti. Cule, Siangphahrangpa cun, “Ka pa! ka theifiang lo!” ti ah a ti. Cui’ si cun hermitpa in hi ti in a simfiang: “Siangphahrangpa! Na hrangih caan thupi bik cu hnațuan i bom lai caan a si. Hnațuan thupi bik cu, ka hna i bom hi a si ih mi thupi bik cu keimah hi ka si. I bawm ta lo aw la, na ralpa in a lo thatngah ding. Cun a pahnihnak ah, na ralpa ih hriamhma na tuamhlawm; thi lo tein a nungdam, minung nunnak na runngah. Cuihhleiah ral cu sal țhabik ah a cang. Cuihhrangah “Mi thupi bik cu mai’ kiang ummi minungpi a si ih, hnațuan thupi bik cu an hrangih an țulmi tuahsak hi a si”, cule caan thupi bik cu minung hrangih thil țha nan tuah lai caan te hi a si, tiah a letsal. Siangphahrangpa cun, “Ka pa ka lung a awi tuk. Dam tein maw! a ti ih a ralkap pawl a ko ih a ralpa cu rang parah a retter. Cule lungawi tein a run-inn pan in an tlungta.
Credit to original owner
